Read Northwest Gbaya GIMA 37 Bible Online

GIMA 37 - Northwest Gbaya bible

GIMA 37

¹Ko David. Ká see-mɛ tu̧ zu o wi-ɗaŋ na, ká mɛ a see mɔ ko o wi-gbɛ-zu na;

²ɓan na wa ɔ̧ka̧ kaɗi hee zɔ̧ ga, ɗoŋ-aa nyɛi̧ na, wa kora hee zɔ̧ yí-mbuu ga.

³Mɛ̀ é ta nɛ GASA WAN, mɛ̀ dé demɔ; mɛ́ tɛ duk zu nù'ɛ nɛ̀ de-a, ŋma mɔɔ-de-mɛ bo na.

⁴Tortɛ kɔ-mɛ a̧ duk tɛ GASA WAN, ɓɛɛ mɔ nɛ̀ see-mɛ kɔ̧ɔ̧ lɛŋ a̧ tɛ ha̧ mɛ.

⁵Mɔ nɛ̀ tɛ kpa mɛ lɛŋ, mɛ̀ é er GASA WAN, mɛ̀ é ta nɛ a̧, ɓɛɛ a̧ tɛ de mɔ ha̧ mɛ;

⁶a̧ tɛ de ha̧ deemɔ nɛ yuwar-a kɔ-mɛ mɛ duk ɓɔn yí bíí, dee demɔ kɔ-mɛ tɛ nyɛk ɓɔn yí bíí hee wese ga.

⁷Mɛ̀ dúk nɛ̀ oi nú-mɛ ti GASA WAN, ɓɛɛ mɛ̀ é ta nɛ a̧; ká see-mɛ tu̧ zu o wi nɛ̀ mɔ kɔ-wa nɛ́ nɔ̀ nɛ̀ de-a na, in zu o wi nɛ̀ de mɔ nɛ̀ gɔna kɔ̧ zaŋ na.

⁸Ká see-mɛ dui na, ká see-mɛ ɗaŋ na mbɛt; mɛ̀ é nyimsea duk wen ɗaŋsee beka gbak mɛ na.

⁹Wa tɛ ndak o wi-ɗaŋ yaknɛ, ɓɛɛ o wi-e-ta nɛ GASA WAN tɛ ba nù ko o wi nɔ‘i.

¹⁰Dekpaa tikiɗi ɓɛɛ wi beka zɔk o wi-ɗaŋ ɓɔna; ɛnɛ tɛ kii mɛ zɔk wa, ɓɛɛ ɛnɛ beka iŋ oi-wa ɓɔna.

¹¹Nɛ́ o wi-mɔka-see a̧ tɛ ba nù oi-wa, ɓɛɛ wa tɛ ya nɛ̀ desee tɛ ga̧a̧mɔ.

¹²O wi-ɗaŋ e nú mɛ de ɗaŋmɔ in wi-de-mɔ nɛ yuwar-a, wa nyɔŋ nɛ goko zu a̧

¹³ɓɛɛ GASA WAN mam kɔ‘i wa mam, wen a̧ iŋa wese fio ko o wi nɔ‘i hɛɗa kaɗi.

¹⁴Kà o wi-ɗaŋ dak gba-paa kɔ-wa, mɛ gɔm nɛ̀ o wisan in o wi-kɔsa, kà wa ŋgaŋ góò kɔ-wa mɛ gbɛ nɛ̀ wi-de-mɔ nɛ yuwar-a,

¹⁵gba-paa kɔ-wa'i tɛ gɔn nɛ́ ger-wa woyo, ɓɛɛ kusaa kɔ-wa tɛ gbin a nù ŋgɛrɛm-ŋgɛrɛm.

¹⁶Be kpaamɔ ko wi-de-mɔ nɛ yuwar-a tikiɗi gana dɔka kpaamɔ ko wi-ɗaŋ,

¹⁷wen ɓaa wi-ɗaŋ tɛ gbin ɓɛɛ GASA WAN tɛ yor ɗoŋ wi-de-mɔ nɛ yuwar-a.

¹⁸GASA WAN pɛm kɔ‘i nɛ duka-a ko o wi-de-mɔ nyɛm sɛnɛ, ɓɛɛ mɔɔ-oi kɔ-wa tɛ duk ɓɔnsɛnɛ;

¹⁹foe beka de wa ŋgimbi bɔnɛ na, wɔ beka ba tɛ-wa ŋgimbi kaɓa na mbɛt.

²⁰Ɓɛɛ o wi-ɗaŋ tɛ fe kɔ‘i wen wa nɛ́ o wi-sɛn GASA WAN; wa tɛ ɔ̧k kɛsi hee mbɔɗi zɔ̧ nɛ̀ kor nɛnɛ'ɛ ga, wa tɛ yambali hee zi-wee ga.

²¹Kà wi-ɗaŋ ba nyamandoi er ŋma bíí kaɗi, a̧ ha̧ mɔ‘i si ɗoŋ ha̧ wan-aa woyo ɓɔna, ɓɛɛ ko wi-de-mɔ nɛ yuwar-a kànà nɛ́ dee ko in ha̧a̧ mɔ ha̧ bíí,

²²o wi nɛ̀ GASA WAN toka de yoŋgo ha̧ wa tɛ ba nù, ɓɛɛ o wi n'aa foma tɛ yɔ.

²³Nɛ́ GASA WAN a̧ yak ti ha̧ o bíí kɔ‘i; wa ya nɛ̀ de-a, ɓɛɛ yuwar nɔ̀ kɔ-wa dee tɛ-a mbɛt.

²⁴Kà wa yó nù, ɓɛɛ wa ɓɔn fara-a na wen GASA WAN kasi nɛ er-wa.

²⁵Mi duka so nɛ ŋgaiwi, ɓɛɛ nɛ́ mɔ'ɔ n'am sɔka kaɗi’ɛ, ɓɛɛ mi tɛ zɔk kɔ‘m ŋma wi-de-mɔ nɛ yuwar-a nɛ̀ Sɔ̧ era e duk sɔɔ géè ɓɔn na, kóó bezaŋ-aa fara kɔfi nyɔŋmɔ nɛnɛ na mbɛt.

²⁶Ko wi-de-mɔ nɛ yuwar-a kànà nɛ́ dee ko in ha̧a̧ mɔ ha̧ bíí, ɓɛɛ Sɔ̧ tok nɛ́ de yoŋgo ha̧ o bezaŋ-aa nɛnɛ.

²⁷Mɛ̀ yú ɗaŋmɔ, mɛ̀ dé nɛ́ demɔ, ɓɛɛ mɛ tɛ kpa fara-duk nɛ̀ tɛ duk ɓɔnsɛnɛ,

²⁸wen GASA WAN kɔ̧ɔ̧ kɔ‘i nɛ́ deemɔ nɛ yuwar-a, a̧ e o wi-mbo-zu ha̧ a̧ duk na. A̧ tɛ ɗaŋ o wi-de-mɔ de na ɓɔn sɔɔ géè, a̧ tɛ zuɗi o bezaŋ wi-ɗaŋ a nù lɛŋ;

²⁹o wi-de-mɔ nɛ yuwar-a tɛ ba nù, ɓɛɛ wa tɛ ya tɛ nù‘i ɓɔnsɛnɛ.

³⁰Wen ko wi-de-mɔ nɛ yuwar-a nɛ́ iŋa-mgbara-mɔ, wen n'aa tɔ̧ lɛŋ nɛ́ kpasawen;

³¹heembea ko Sɔ̧ a̧a̧ kɔ̧ see-aa, ɓɛɛ naŋ-a beka mbali ŋmaa na.

³²Wi-ɗaŋ mbaɗi nɛ wi-de-mɔ nɛ yuwar-a kii nɛ̀ war mɛ gbɛ a̧ yinɛ,

³³ɓɛɛ GASA WAN e ha̧ wi-de-mɔ nɛ yuwar-a'i mɛ tik kɔ̧ er wi-ɗaŋ‘i na, a̧ e ha̧ wen mɛ tik a̧ na mbɛt.

³⁴Mɛ̀ é ta nɛ̀ GASA WAN, mɛ̀ bá nɛ́ yuwar kɔ̧-a̧, ɓɛɛ a̧ tɛ gbo mɛ er wi-ɗaŋ yinɛ; a̧ tɛ ba mɛ e ŋgɔn ha̧ mɛ mɛ ba nù'ɛ, ɓɛɛ a̧ tɛ zuɗi o wi-ɗaŋ yinɛ.

³⁵Mi zɔka so ŋma wi-ɗaŋ nɛ̀ a̧a̧ nɛ̀ ŋga-see nyɛmna nɛ̀ kura yor zéŋ hee gbatui Libaŋ ga.

³⁶Duka, ha̧‘m ɓir yak fara'i woyo wó, yàà, a̧ bo ɓɔna; mi kia a̧ takaɗi, mi kpa a̧ na.

³⁷Mɛ̀ zɔ́k ɗoŋ mɔ ko wi-de-demɔ, mɛ̀ zɔ́k mɔ ko wi-de-mɔ nɛ yuwar-a ai! Ga̧a̧-wi tɛ kpa bezaŋ nɛ dɔka-a,

³⁸ɓɛɛ o wi-de-ɗaŋmɔ tɛ kum kɔ‘i lɛŋ; GASA WAN tɛ zuɗi o bezaŋ wi-ɗaŋ a nù yinɛ.

³⁹Sɔ̧ nɛ́ wi-kpasi o wi-de-mɔ nɛ yuwar-a, a̧ nɛ́ ŋga fara-duk kɔ-wa ŋgimbi bɔnɛ.

⁴⁰Nɛ́ GASA WAN a̧ gbak wa, nɛ́ a̧ a̧ gbo wa; kà wa hu̧si ɗoŋ-aa, ɓɛɛ a̧ kpasa wa er o wi-ɗaŋ.