Read Northwest Gbaya GIMA 39 Bible Online

GIMA 39 - Northwest Gbaya bible

GIMA 39

¹Gima ko David ha̧ Yedutun, wan-duk-zu-gima.

²Mi tɔ̧ɔ̧ so ndé, mi tɛ zɔk naŋanɔ kɔ‘m nɛ̀ de-a. Nú‘m beka tɔ̧ wen si hɛ̧ɛ̧ si hi̧i̧ na; ŋgimbi n'am tɛ kpa nɛ̀ ŋmaa in ŋma wi-ɗaŋ, mi tɛ gu er nú‘m n'am beka tɔ̧ wen na.

³Mɛ̀ nɛ́ hegɔ sa'm kpe nú‘m, sa'm duk nɛ̀ oi-nú‘m sɛ́ɛ́m, see-am gbɛŋa gan kuti-a.

⁴See-am duka hee wi aŋa nɛ́ wee a sɛnɛ ga, mi taa mɔ nyɛmna ɓɛɛ see-am kur búk, ɓɛɛ sa'm tɔ̧ ha̧ GASA WAN ndé:

⁵GASA WAN, ɛ̀nɛ̀ úsí ŋgimbi fio kɔ‘m ha̧‘m. Oi-zɛ duka-a kɔ‘m ɓɔna bɔɔ géè? Ɛ̀nɛ̀ dé ha̧‘m mɛ iŋ‘e fio nyɛi̧ nɛ̀ bíí na.

⁶GASA WAN, ɛ̀nɛ̀ zɔk; ɛ́nɛ́ ee ŋgimbi duka-a kɔ‘m zu nù'ɛ ŋgólók ɓɛɛ; pɛ duka-a kɔ‘m zaŋnu’ɛ nɛ́ geemɔ yí‘nɛ́. Bíí n’ɛnɛ zɔk nɛ̀ k’ɛ́nɛ́'ɛ nɛ́ géé búk géè.

⁷Bíí nɛ̀ duk’ɛ nɛ́ geemɔ hee gi̧ɔ̧ ga, gba̧a̧ mɔ bo tɛ-a na. A̧ pɔkɔsi nɛ tɛ-a mɔi̧ nɛ̀ mbɔi e; kà a̧ fe kaɗi, a̧ iŋ wi-nyɔŋa-a na.

⁸GASA WAN, nɛ́ ge a̧‘m tɛ pɛm bɔɔ kinii ɓɔ ge? Mi e ta nɛ̀ ɛnɛ;

⁹ɛ̀nɛ̀ bá ɗaŋmɔ n'am dea lɛŋ yinɛ zu'm. K’ɛ́nɛ́ e ha̧ o mgbelewi mɛ mam am na.

¹⁰Mi kpee nú‘m, mi hú̧í̧ nú‘m nɛ̀ ŋgɔn ɓukui na wen kànà nɛ́ ɛnɛ'ɛ de mɔ n’ɛnɛ kɔ̧a̧ ɓɛɛ.

¹¹Ɛ̀nɛ̀ bá nyasi k’ɛ́nɛ́ e nyɛi̧ nɛ̀‘m, wen mi zɔk nɛ́ bɔnɛ nyasi k’ɛ́nɛ́‘i nyɛmna.

¹²Gaia bíí k’ɛ́nɛ́ kànà nɛ́ mɔɔ-oi ɗaŋmɔ nɛ̀ kpa bíí'ɛ; ɛ́nɛ́ nɛ́ wi ɗaŋ mɔɔ-desee ko bíí hee mɔ'ɔ nɛ dɔya ɗaŋ nɛ̀ laa’ɛ ga. Nɛ̀ mbetɛ, bíí nɛ́ géé búk géè.

¹³Ɛ̀nɛ̀ zíí kɔfa-sɔ̧ kɔ‘m, GASA WAN; ɛ̀nɛ̀ yéŋ zer'nɛ́ tɛ saa sara kɔ‘m. K’ɛ́nɛ́ kpe zer'nɛ́ tɛ aia-nú kɔ‘m na, wen mi nɛ́ gɛnɛ ti'nɛ́ hee mɔ'ɔ nɛ o dáà kɔ‘m yaa so ndɛn nɛ̀ zu kao nɛnɛ ga.

¹⁴Ɛ̀nɛ̀ bá yí‘nɛ́ tɛ‘m yinɛ ha̧‘m ɔm benaŋ hɔ ŋgimbi n'am tɛ fe ɓɛɛ mɔ kɔ‘m kaɗa.