Read Northwest Gbaya GIMA 44 Bible Online

GIMA 44 - Northwest Gbaya bible

GIMA 44

¹Gima ko o bem ko Kore ha̧ wan-duk-zu-gima.

²GASA WAN Sɔ̧, o zɔmdáa k’ɛɛ wee so ɗoŋ mɔ lɛŋ n’ɛnɛ dee so ŋgimbi kɔ-wa ɓeemɛ; wen-aa ɛɛ zia nɛ̀ zer yɛ.

³Ɛnɛ ndaka o tugun bíí yinɛ tɛ nù'ɛ nɛ̀ er'nɛ́, ɓɛɛ ɛnɛ ha̧ fara kɔ-wa ha̧ o zɔmdáa k’ɛɛ, ɛnɛ usa bɔnɛ ha̧ o dukbíí nɛtɛ nɛtɛ, wen ha̧ wa mɛ kpa fara,

⁴wen bó nɛ́ o zɔmdáa k’ɛɛ baa nù nɛ̀ gba-paa kɔ-wa na, bó nɛ́ ŋgai mɛ er-wa a̧ kpasa wa na mbɛt; ɓɛɛ nɛ́ ŋga er'nɛ́ mɛ wiiko in sa̧a̧mɔ sɔnti'nɛ́ a̧ kpasa wa, wen ɛnɛ kɔ̧ɔ̧ so wa nyɛmna.

⁵Sɔ̧ kɔ‘m, ɛ́nɛ́ nɛ́ wan kɔ‘m; nɛ́ ɛnɛ'ɛ baa ha̧ ŋgai ha̧ Jakob mɛ gan o wisɛn kɔ‘i;

⁶ɛnɛ dee h’ɛ́ɛ́ mɛ yo o wi-kur-zu yɛ nɛ̀ nù, ɓɛɛ nin'nɛ́ ha̧a̧ ŋgai h’ɛ́ɛ́ mɛ i̧si̧ o wi-kur-zu yɛ nɛ̀ naŋ mbɛt.

⁷Mi e ta nɛ kusaa-góò ká bá nɛ̀ gba-paa kɔ‘m na mbɛt.

⁸Nɛ́ ɛnɛ'ɛ dee h’ɛ́ɛ́ mɛ gan o wisɛn k’ɛɛ; ɛnɛ pi̧i̧ ziimɔ zu wa mbɛt,

⁹ɓɛɛ wese'i ɛɛ dee nyɛŋɛ nɛ̀ nin Sɔ̧ zɔn nɛ̀ nin-a hegɔɔ zɛ de nɛnɛ.

¹⁰Ɓɛɛ ɛ̧ɛ̧ kinii’ɛ, ɛ́nɛ́ ee yɛ duk; ɛ́nɛ́ ee yɛ hee geemɔ ga, ɛ́nɛ́ nɛ́ biro in o wi-biro k’ɛɛ ɓɔna.

¹¹Ɛ́nɛ́ dee h’ɛ́ɛ́ mɛ yu mɔ yak ti o wi-kur-zu yɛ, ɓɛɛ nɛ́ mɔ'ɔ nɛ̀ wa kaia demɔ k’ɛɛ yaknɛ hee see-wa kɔ̧a̧ ga.

¹²Ɛ́nɛ́ kaia ɛɛ ha̧ wa hee saɗi nɛ̀‘i kai nɛnɛ mɛ gɔn’ɛ ga, ɛ́nɛ́ pɛsa yɛ sót-sót dam mgbara o tugun bíí.

¹³Ɛ́nɛ́ ɗɔra dukbíí k’ɛ́nɛ́ hee ŋma mɔ nɛ̀ bó nɛ́ gasamɔ yí‘nɛ́ na ga.

¹⁴Ɛ́nɛ́ dee ha̧ o wi nɛ ya zik yɛ mɛ da̧ yɛ, zɛkɛɗi nɛ̀ ɛɛ, mam nɛnɛ.

¹⁵Ɛ́nɛ́ ee yɛ nɛ̀ mɔɔ-tɔ̧-tua-wen ko o tugun bíí; ɛ́nɛ́ dee h’ɛ́ɛ́ mɛ ya nɛ́ mɔɔ-sɔr ko o bíí mbɛt.

¹⁶Ŋgimbi lɛŋ mi yar nɛ̀ zuma zu wen ziimɔ nɛ ba'm, ɓɛɛ foe kpee yí‘m wen dara ko o bíí;

¹⁷wa ɗaŋa nin-am, wa sɛn nɛ‘m, ɓɛɛ wa kii nɛ wen in am mbɛt.

¹⁸O mɔɔ nɔ‘i lɛŋ tika zu yɛ, ɓɛɛ tɛ-ɛɛ bi ɗoŋ‘nɛ́ na, ɛɛ yak zu nɔɔ-tɔk k’ɛɛ in'nɛ̀ɛ́ na;

¹⁹see yɛ kifi si ɗoŋ na, naŋ yɛ e yuwar k’ɛ́nɛ́ duk na mbɛt,

²⁰ɓɛɛ nɛ́ mɔ'ɔ n’ɛnɛ a̧ka̧ yɛ a nú di̧i̧ ko gboo, ɛnɛ kpee zu yɛ nɛ̀ tum-fio.

²¹Kà tɛ-ɛɛ a̧ bí so ɗoŋ Sɔ̧ k’ɛɛ h’ɛ́ɛ́ mɛ nyɛi̧ so er yɛ sitɛ ŋma gɔni sɔ̧ gáà,

²²ɓɛɛ bó nɛ́ Sɔ̧ nɛ̀ iŋa ndaa hu̧sa̧mɔ kɔ̧ see-wi lɛŋ'ɛ tɛ̀ɛ́ iŋ so na nde?

²³Mɛ̀ nɛ́ fio zu'nɛ́ a̧ ɛɛ fe nɛnɛ wese lɛŋ'ɛ; wa de mɔ in yɛɛ hee o sami nɛ̀‘i tɛ gɔn ga.

²⁴Ɛ̀nɛ̀ tún, GASA WAN! Wen ge s’ɛnɛ ɔ ya ge? Ɛ̀nɛ̀ kúr! K’ɛ́nɛ́ e yɛ wɔkɔrɔ na!

²⁵Wen ge s’ɛnɛ hu̧si sɔnti'nɛ́ nɛ̀ ɛ́ɛ́ ge? Wen ge sa tɛ‘nɛ́ bi bɔɔ ɗoŋ bɔnɛ in kɔsa k’ɛɛ'ɛ ge?

²⁶Wen ɛɛ yoo nù tɛ fuunu, nyak zaŋ yɛ lata ɓɔn tɛ nù.

²⁷Ɛ̀nɛ̀ kúr ŋgɔn! Ɛ̀nɛ̀ gbák yɛ! Ɛ̀nɛ̀ kpásí yɛ wen zu dee demɔ k’ɛ́nɛ́.