Read Northwest Gbaya GIMA 5 Bible Online

GIMA 5 - Northwest Gbaya bible

GIMA 5

¹Gima ko David ha̧ wan-duk-zu-gima; gima nɛ o mɔɔ-dɔm.

²GASA WAN, ɛ̀nɛ̀ zíí wen kɔ‘m! Ɛ̀nɛ̀ tá mɔ zu gɔfamɔ kɔ‘m.

³Ɛ̀nɛ̀ yéŋ zer'nɛ́ tɛ sara kɔ‘m zii nɛ tiger-am, Wannu kɔ‘m, Sɔ̧ kɔ‘m! GASA WAN, nɛ́ ɛnɛ a̧‘m kɔfi!

⁴Mi iŋa ɛnɛ zii tiger-am zii ɓɔnsɛnɛ mɛ tutuyɛ! Mɛ gɔna-ndaa-zan mi ɗafa mɔ pɛm nɛ̀ ɛnɛ, ɓɛɛ mi zɛma'nɛ́.

⁵Ɛ́nɛ́ nɛ́ Sɔ̧ nɛ kɔ̧ ɗaŋmɔ na! O wi-ɗaŋ bó nɛ́ bíí k’ɛ́nɛ́ na,

⁶o wi-ŋmaŋ-tɛ beka yor ti'nɛ́ na. Ɛ́nɛ́ sɛna o wi-de-mɔ de na lɛŋ!

⁷Ɛ́nɛ́ gbɛ o wi-ndela gbɛɛ. GASA WAN sɛna o wi-gbɛ-zu in o wi-ɔr-mɔ kai nɛ̀ mɔ er bíí.

⁸Kɔ‘m, nɛ́ tɛ̀ gasa kɔ̧ɔ̧mɔ k’ɛ́nɛ́ a̧‘m yee nɛ tua k’ɛ́nɛ́! Nɛ́ mɔ'ɔ n'am yuu kíí‘nɛ́ gu nù ti'nɛ́ sɛn kɔ̧ sa̧a̧ tua k’ɛ́nɛ́.

⁹GASA WAN, tɛ deemɔ k’ɛ́nɛ́ nɛ yuwar-a ɛ̀nɛ̀ mgbɔ́‘m, wen o wisɛn kɔ‘m pɛm nɛ‘m; ɛ̀nɛ̀ ɗáfí yuwar k’ɛ́nɛ́ sɛn ti'm.

¹⁰Ŋma kpasawen bo kɔ̧ nú o wi nɔ‘i na; mɔ kɔ-wa lɛŋ nɛ́ gbɛɛ-zu, kɔ̧ war ger-wa nɛ́ pɛsi-fio mgbóm-mgbóm, wen mɛ kɔ̧ nú-wa lɛŋ nɛ géé yɔka-wen.

¹¹Sɔ̧, ɛ̀nɛ̀ gɔ́n kita zu wa ha̧ ee-nú kɔ-wa mɛ tik zu-wa woyo; ɛ̀nɛ̀ ndák wa yinɛ wen ɗaŋmɔ kɔ-wa yaka zale, in wen kura-a nɛ wa kur zu'nɛ́‘i.

¹²O wi nɛ hu̧si ká̧ tɛ‘nɛ́ a̧ ya nɛ desee, wa a̧ de tortɛ ɓɔnsɛnɛ! O wi nɛ kɔ̧ɔ̧ nin'nɛ́ de nɛ́ nyɛŋɛ wen ɛ́nɛ́ nɛ wan-pɛm-wa.

¹³GASA WAN, nɛ́ ɛ́nɛ́'ɛ tok de yoŋgo zu o wi-de-mɔ nɛ yuwar-a. Ɛnɛ ɓora wa nɛ dee demɔ k’ɛ́nɛ́ hee mɔ'ɔ nɛ ŋgee kpe nɛ ɗoŋ wi’ɛ ga.