Read Northwest Gbaya GIMA 51 Bible Online

GIMA 51 - Northwest Gbaya bible

GIMA 51

¹Gima ko David ha̧ wan-duk-zu-gima;

²ŋgimbi nɛ wi-tɔ̧-wen oi nú Sɔ̧ Nataŋ nɛ̀ɛ́ nɛnɛ mɛ tɔ̧ wen ha̧ David zu ɗaŋmɔ n'aa dee so in Bɛtseba.

³Tɛ̀ demɔ k’ɛ́nɛ́, ɛ̀nɛ̀ dé ko ha̧‘m, GASA WAN; nyɛm nɛ̀ ɗoŋ yora-ɗoŋ-wen k’ɛ́nɛ́, ɛ̀nɛ̀ bí ɗaŋmɔ kɔ‘m yinɛ.

⁴Ɛ̀nɛ̀ fɔ́r ndiŋmɔ kɔ̧ see-am yinɛ ha̧‘m mɛ duk nɛ̀ sa̧a̧-a̧; ɛ̀nɛ̀ bí yɔɔ-kaya kɔ‘m yinɛ.

⁵Mi iŋa ɗaŋmɔ kɔ‘m wen ɗaŋmɔ kɔ‘m'i duk ɓɔn yí‘m;

⁶ɗaŋmɔ n'am dea'i, mi dee kànà h’ɛ́nɛ́. Mɔ nɛ̀ de tɛ‘nɛ́ na, nɛ́ mɔ‘i a̧‘m dea. Hegɔ gɔna-kita k’ɛ́nɛ́ zu'm duk nɛ̀ yuwar-a nɛ̀ ŋma kafɛ bo sɛnɛ na.

⁷Nɛ̀ nàà kɔ‘m baa nɛ̀ zaŋ-am kó nɛ‘m, mi kànà nɛ́ wi-ɗaŋ.

⁸Ɛ́nɛ́ kɔ̧ɔ̧ ha̧ kpasawen mɛ duk kɔ̧ see-wi; hegɔ ɛ̀nɛ̀ úsí ɗuka iŋa-mgbara-mɔ ha̧‘m.

⁹Ɛ̀nɛ̀ fɔ́r see-am nɛ̀ sa̧-ndiŋ ha̧‘m mɛ duk nɛ̀ sa̧a̧-a̧ hee talum[10] ga; ɛ̀nɛ̀ zúí am ha̧ tɛ‘m mɛ sa̧.

¹⁰Ɛ̀nɛ̀ dé ha̧‘m mɛ kpa desee ha̧ gba̧a̧-tɛ‘m nɛ gbina so tɛ wen k’ɛ́nɛ́‘i mɛ nak yɔyɛ nɛ̀ tortɛ woyo.

¹¹Ɛ̀nɛ̀ wɛ́r yí‘nɛ́ si mgbɔɔr zu yɔɔ-kaya kɔ‘m; ɛ̀nɛ̀ bí ɗaŋmɔ kɔ‘m lɛŋ yinɛ.

¹²Sɔ̧ kɔ‘m, ɛ̀nɛ̀ dé ha̧ see-am mɛ duk nɛ̀ sa̧a̧-a̧; ɛ̀nɛ̀ há̧ mbe taamɔ nɔɔ-ŋgiɗi ha̧‘m.

¹³K’ɛ́nɛ́ ndak am yinɛ sɛn ti'nɛ́ na, k’ɛ́nɛ́ ba Sa̧a̧ Ɔmi k’ɛ́nɛ́ yinɛ tɛ‘m na mbɛt.

¹⁴Ɛ̀nɛ̀ kpás'am wen ha̧‘m mɛ kpa desee tɛ gbaka mɔ k’ɛ́nɛ́ woyo; ɛ̀nɛ̀ há̧ taamɔ ha̧‘m wen ha̧‘m mɛ mbo zu h’ɛ́nɛ́.

¹⁵Mi tɛ usi yuwar k’ɛ́nɛ́ ha̧ o wi-de-ŋgazu, ɓɛɛ o bíí nɛ a̧ra̧ so tɛ pii ɗoŋ tɛ‘nɛ́.

¹⁶Sɔ̧, wan-kpas'am, ɛ̀nɛ̀ kpás'am tɛ fio, ɓɛɛ leɓ‘am tɛ zɔn deemɔ nɛ̀ yuwar-a k’ɛ́nɛ́.

¹⁷GASA WAN, ɛ̀nɛ̀ hú̧í̧ nú‘m ha̧‘m mɛ bìì gima-zɔn'nɛ́.

¹⁸Wen bó nɛ́ ɛnɛ kɔ̧ɔ̧ ha̧‘m mɛ ɗafi nɛ́ ɛnɛ na; kóó kà bó só ha̧‘m mɛ dɔ kpoo-sɔ̧ h’ɛ́nɛ́ mbɛt gáà, bó nɛ́ ɛ́nɛ́ tɛ̀ɛ́ kpɛk so kpɛk na.

¹⁹Sɔ̧, ɗafa-sɔ̧ kɔ‘m nɛ́ see-am nɛ̀ ŋmana'i, wen k’ɛ́nɛ́, ɛ́nɛ́ e see-wi nɛ̀ ŋmana tɛ geemɔ na.

²⁰Tɛ desee k’ɛ́nɛ́, ɛ̀nɛ̀ dé demɔ ha̧ Siɔŋ, ɛ̀nɛ̀ bá Jerusalɛm e ŋgɔn woyo nɛ oi garo lɛŋ;

²¹ɓɛɛ wa tɛ ɗafi'nɛ́ n’ɛnɛ tɛ kpa desee sɛnɛ. Wa tɛ dɔ kpoo-ɗafi-sɔ̧ h’ɛ́nɛ́, wa tɛ dɔ ŋma nɛ̀ oi kii-aa, ɓɛɛ wa tɛ gɔn wiwii-ndai zu fara-ɗafi-sɔ̧ h’ɛ́nɛ́ mbɛt.