Read Northwest Gbaya GIMA 55 Bible Online

GIMA 55 - Northwest Gbaya bible

GIMA 55

¹Gima ko David ha̧ wan-duk-zu-gima nɛ̀ o kunde pɛ́r-a nɛtɛ nɛtɛ.

²GASA WAN Sɔ̧, ɛ̀nɛ̀ yéŋ zer'nɛ́ tɛ wora'nɛ́ n'am wor'i; k’ɛ́nɛ́ kpe zer'nɛ́ tɛ aia-nú kɔ‘m na.

³Ɛ̀nɛ̀ zíí wen nú‘m, ɛ̀nɛ̀ kífí nú ha̧‘m. Taamɔ kɔ‘m yɔa tɛ aia-nú.

⁴Kà‘m zii ger o wisɛn kɔ‘m in tuɓa da̧ ko o wi-ɗaŋ, ɓɛɛ tɛ‘m naka. O wi nɔ‘i pi̧a'm tɛ kɔsa, wa tɔ̧ nɛ ŋga-wen a zu'm nɛ̀ nyimsea.

⁵See-am to too kpɛl kpɛl, bele-fio zara'm pi̧ nù;

⁶gasa kíì hɛra'm, gba-gbana-bele baa'm mbɛt,

⁷ɓɛɛ sa'm tɔ̧: «Kà‘m kpá so wɔr-ɓaa'm hee wɔr-ɓaa gbaku̧i ga, mi tɛ̀ɛ́ bu̧i̧ so yaknɛ sɔ̧i̧i̧ a̧‘m ɔ́m.

⁸Mi tɛ̀ɛ́ yu mɔ yak nɛ̀ nyɛi̧a-a mɛ́ nɛ̀ɛ́ ɔ sɛn ŋga-gbárà mɛ,

⁹ɓɛɛ mi tɛ̀ɛ́ kpa so fara-hu̧si sɛnɛ wen ká gba búk-kórò tɛɛ ɗaŋ am.»

¹⁰GASA WAN, ɛ̀nɛ̀ sákálí ee-zu-mɔ kɔ-wa, ɛ̀nɛ̀ kpáí tɔ̧ɔ̧-wen kɔ-wa, wen mi zɔka dee ŋgamɔ in kpɛri dɔka saaye kɔ-wa nyɛmna;

¹¹bɔnɛ in gɔɔmɔ a̧a̧ saaye'i mbɛt. Mɔɔ nɔ‘i zik nɛ̀ mgbara kira nɛnɛ nyɛŋtɛŋ zɛ nɛ̀ wese.

¹²Mɔɔ-ɗaŋ a̧a̧ zaŋ-aa'i mbɛt; nasa ŋmaa in wula ŋmaa nyaŋ bee-gara kɔ-wa na.

¹³Kà bó só nɛ́ ŋma wisɛn kɔ‘m a̧ da̧‘m wó, mi tɛ̀ɛ́ nɔ ŋgiɗi mɛ ga̧ see-am; kà bó só nɛ́ ŋma wi-kur-zu'm a̧ kura zu'm gáà, mi tɛ̀ɛ́ hu̧si;

¹⁴ɓɛɛ mɛ̀ nɛ̀ mɛ́, mgbák gbama-a kɔ‘m, gba de sɛm kɔ‘m'i,

¹⁵wan n’ɛɛ ya so in ŋmaa kpɔk sɛn kɔ̧ tua ko Sɔ̧ mgbara o giiwi mɛ‘i, nɛ́ mɛ a̧ de mɔ‘i.

¹⁶Fio'o tik zu wa! Wa a̧ zir nɛ̀ zu-kpasa si ye ko o fio mɛ wen mɔ nɛ̀ duk tɛ-wa nɛ́ ɗaŋmɔ.

¹⁷Ɓɛɛ kɔ‘m, kà‘m sá mɔ sitɛ Sɔ̧, ɓɛɛ a̧ kpasa'm.

¹⁸Mɛ tutuyɛ, mɛ wese see-zu, in mɛ ga̧a̧mɔ lɛŋ, mi ai nɛ́ nú gɔfi nɛ̀ mɔ sitɛ a̧ ha̧ a̧ mɛ zii tiger-am.

¹⁹A̧ gɔna zu'm nɛ̀ ga̧a̧mɔ kɔ̧-a̧ tɛ biro nɛ̀ wa kii in am'i; oee bíí nɛ̀ dɔka zu'm wa!

²⁰Sɔ̧ tɛ zii tiger-am; nɛ́ a̧ nɛ̀ duk zu damti kɔ̧-a̧ nɛ̀ ku̧u̧naŋ-a mɛ tɛnɛ‘i a̧ tɛ yo wa nɛ̀ nù. O wi nɔ‘i beka kifi see-wa ha̧ Sɔ̧ na wen yuu-kíí Sɔ̧ bo tɛ-wa na.

²¹Gbama-yari so'i nyɛi̧a er mɛ de ɗaŋmɔ in ŋma-a, a̧ ɗaŋa nɔɔ-tɔk kɔ-wa in ŋma-a yinɛ lɛŋ;

²²wen mɛ kɔ̧ nú-a yɔka gan nɔ̧́, ɓɛɛ mɔ mɛ kɔ̧ see-aa nɛ́ biro; wen ko wi’ɛi ɔ̧ɔ̧ nyɔ̧ɔ̧ gan gɔrɔ, ɓɛɛ mɔ nɛ̀ duk ɗɔɔ wen kɔ̧-a̧ nɛ́ tɔ̧ɔ̧-nu-za.

²³Mɛ̀ síŋ tui-ɗaŋmɔ kɔ-mɛ pi̧ zu GASA WAN, ɓɛɛ a̧ tɛ gbak mɛ; a̧ beka e ha̧ naŋ wi-de-mɔ nɛ yuwar-a mɛ mbali ŋmaa na.

²⁴Ɓɛɛ k’ɛ́nɛ́ Sɔ̧, ɛnɛ tɛ ir wa lɛŋ a kɔ̧ ɗuka gboŋgo; zɛ duka-kpasa ko wi-gbɛ-zu in o wi-ndela nɔ‘i beka dɔk zu nù'ɛ na. Ɓɛɛ kɔ‘m, mi e ta nɛ̀ ɛnɛ, GASA WAN.