Read Northwest Gbaya GIMA 56 Bible Online

GIMA 56 - Northwest Gbaya bible

GIMA 56

¹Gima ko David ha̧ wan-duk-zu-gima Miktam, ŋgimbi nɛ̀ o be Filistii bá só nɛ̀ David sɛn Gat. Ger gima’ɛ nɛɛ nɛ́ ɗoŋ gima: Gbaku̧i zu o gasa te mɛ nyɛi̧a fara mɛ.

²Ɛ̀nɛ̀ dé ko ha̧‘m Sɔ̧, wen bɔnɛ nɛ̀ o bíí de nɛ‘m’ɛ, o wi-nukur'am de nɛ́ ŋmaa in am hegɔɔ zɛ de nɛnɛ;

³wese kpɔk kpɔk o wisɛn kɔ‘m nasi nɛ‘m, o wi-tik-zu'm ɔ dɔka nyɛmna.

⁴GASA WAN, ŋgimbi nɛ̀ kíì ba'm, mi e ta nɛ̀ ɛnɛ.

⁵Mi zɔn Sɔ̧ tɛ wen kɔ̧-a̧; mi e ta nɛ̀ Sɔ̧, ɓɛɛ kíì de'm na. Ge a̧ bíí tɛ de nɛ‘m ge?

⁶Wa ɗaŋ nɛ́ wen tɛ‘m wese lɛŋ; ɓaa taamɔ kɔ-wa kana nɛ́ kia war mɛ gbɔs'am ɓɛɛ;

⁷wa ba nɛ́ keta'm nɛ̀ hu̧sa̧-a̧ ɓa nɛ̀ pata'm nɛnɛ kii nɛ̀ war mɛ gbɛ‘m.

⁸Wa beka zɔk so bɔnɛ oi ŋga-see kɔ-wa'i na? Sɔ̧, ɛ̀nɛ̀ é ha̧ nyimsea k’ɛ́nɛ́ mɛ tik zu o wi nɔ‘i.

⁹GASA WAN, ɛ́nɛ́ zɔka bia-a kɔ‘m na nde? Ɛ̀nɛ̀ mɔ́í̧ mi̧i̧kɔ̧a̧-ɗaŋsee kɔ‘m lɛŋ a kɔ̧ dak, ɛ́nɛ́ zɔk.

¹⁰Wese n'am sa sara sitɛ‘nɛ́, ɓɛɛ nyɛɛm, o wisɛn kɔ‘m zika tɛ si ɗoŋ. Kɔ‘m, mi iŋa kànà Sɔ̧ a̧a̧ ɗoŋ am;

¹¹mi zɔn Sɔ̧ tɛ wen kɔ̧-a̧, mi e ta'm nɛ̀ GASA WAN tɛ wen kɔ̧-a̧.

¹²Mi e ta nɛ̀ Sɔ̧, ɓɛɛ kíì de'm na. Ge a̧ bíí tɛ de nɛ‘m ge?

¹³Sɔ̧, mɔ n'am ha̧a̧ so nú mɛ de h’ɛ́nɛ́‘i, mi tɛ de kana; mi tɛ ha̧ ha̧a̧mɔ-dee-osoko h’ɛ́nɛ́,

¹⁴wen ɛ́nɛ́ kpasa'm tɛ fio ha̧‘m mɛ duk ti'nɛ́ tɛ sa̧a̧mɔ duka-kpasa.