Read Northwest Gbaya GIMA 58 Bible Online

GIMA 58 - Northwest Gbaya bible

GIMA 58

¹Gima ko David ha̧ wan-duk-zu-gima Miktam. Ger gima’ɛ nɛɛ nɛ́ ɗoŋ gima: Ká mɛ ɗaŋ mɔ na.

²O gasawi, gɔna-kita k’ɛ́nɛ́ nyɛma sɛnɛ nde? Ɛ́nɛ́ gɔn kita gɔn zu o bíí nɛ yuwar-a nde?

³Weyaa, wen nɛ̀ kɔ̧ see'nɛ́ mɛ‘i, bo nɛ deemɔ nɛ yuwar-a ɛ̀nɛ̀ kii na, wen tom k’ɛ́nɛ́ zaŋnu’ɛ kànà nɛ́ nasa bíí mɛ de ŋgamɔ in wa ɓɛɛ.

⁴Wa kànà nɛ́ wi-ɗaŋ nɛ̀ kɔ̧ zaŋ nàà kɔ-wa mɛ tɛnɛ; a̧ra̧-a̧ ko o wi-ndela nɔ‘i ku̧u̧ naŋ-a nɛ̀ tɛ kóó wa mɛ tɛnɛ.

⁵Ma̧a̧da̧ a̧a̧ tɛ-wa hee ma̧a̧da̧-gɔ́k ga; wa hɔɔ ŋmaa in firi nɛ̀ kpe zer

⁶wen ká a̧ tɛɛ zii dɔmamɔ ko wan-sa-gɔ́k nɛ̀ yɔ́k a̧ mɛ ba a̧.

⁷Sɔ̧, ɛ̀nɛ̀ gbín gba̧a̧-nin-wa yinɛ; ɛ̀nɛ̀ dák o gake-nin o dila nɔ‘i yinɛ mbɛt, GASA WAN;

⁸ɛ̀nɛ̀ dé ha̧ wa yak hee yì nɛ fok yaknɛ'ɛ ga, wa a̧ gbín hee zɔ̧ nɛ̀ kɛsi ɓɛɛ wi i̧sa̧ gbin nduku-nduku’ɛ ga!

⁹Wa a̧ yák hee laɓan nɛ̀ gbo lɔti̧ɔ̧ɔ̧ mɛ yar nɛnɛ ga; wa a̧ hɔ ŋmaa in hɔɔ-bem nɛ̀ wa ko nɛ̀ wɔr nɛ̀ zɔk tɛ wese na ga.

¹⁰Nyimsea k’ɛ́nɛ́'ɛ tík zu wa hee gasa hara-búk ga; a̧ a̧ dí̧ wa yaknɛ hotoŋ-hotoŋ hee mɔ'ɔ nɛ‘i zuɗi nɛ̀ naakɔɓa a taŋ'ɛ ga.

¹¹O wi-de-mɔ nɛ yuwar-a tɛ kpa desee tɛ zɔka kifa-er k’ɛ́nɛ́ ha̧ o wi nɔ‘i; wa tɛ fɔr naŋ-wa nɛ̀ tɔk-tɛ o wi-ɗaŋ,

¹²ɓɛɛ bíí tɛ tɔ̧ ndé: «Wi-de-mɔ nɛ yuwar-a tɛ kpa demɔ nɛ̀ mbetɛ, wen Sɔ̧, wan-gɔn-kita a̧a̧ sɛnɛ zu nù'ɛ.»