Read Northwest Gbaya GIMA 59 Bible Online

GIMA 59 - Northwest Gbaya bible

GIMA 59

¹Gima ko David ha̧ wan-duk-zu-gima Miktam. Ger gima’ɛ nɛɛ nɛ́ ɗoŋ gima: Ká mɛ ɗaŋ mɔ na, ŋgimbi nɛ̀ Saul toma so nɛ o bíí kɔ‘i mɛ nɛɛ kpe David e nù kɔ̧ tua kɔ̧-a̧ mɛ gbɛ a̧ yinɛ.

²Sɔ̧ kɔ‘m, ɛ̀nɛ̀ kpás'am er o wisɛn kɔ‘m, ɛ̀nɛ̀ pɛ́m am er o wi nɛ̀ nas'am;

³ɛ̀nɛ̀ gbó‘m yinɛ er o wi-de-ɗaŋmɔ, ɛ̀nɛ̀ kpás'am er o wi-gbai-tɔk tɛ-wi a nù.

⁴Ɛ̀nɛ̀ zɔ́k hee mɔ'ɔ nɛ wa kii mɛ gbɛ‘m yínɛ́'ɛ ga. O wi-ŋgai nɔ‘i mɔi̧ nɛ ŋmaa bá nɛ̀ keta'm; GASA WAN, bó nɛ́ mi dee ŋma ɗaŋmɔ kóó ŋma yɔɔ-kaya na mbɛt.

⁵Mi de ŋma mɔ in wa na, ɓɛɛ nɛ́ mɔ'ɔ nɛ̀ wa ma nɛ̀ yì pii tɛ‘m nduɗɛɛ kɛr nɛ‘m sɛɗɛɗɛ tɛnɛ'ɛ! Ɛ̀nɛ̀ tún, ɛ̀nɛ̀ zɔ́k mɔ‘i ɓɛɛ ɛ̀nɛ̀ yé ɗoŋ am!

⁶GASA WAN, Sɔ̧ ko o gii wi-biro, Sɔ̧ ko Israɛl, ɛ̀nɛ̀ kúr! Ɛ̀nɛ̀ dé bɔnɛ in o wi nɔ'ɔ nɛ̀ iŋ‘nɛ na’ɛ! K’ɛ́nɛ́ de ko ha̧ o wi-sáká-yí in o wi-e-ɗɔra tɛ‘m nɔ‘i na.

⁷Ga̧a̧mɔ lɛŋ wa pii nɛ ɗoŋ woyo, yar nɛnɛ nɛ̀ ɗoŋ ye, de nɛ̀ da̧ hee o toyo ga.

⁸Ɛ̀nɛ̀ zíí ɗaŋ wen kɔ-wa! Nú-wa ɔ baa hee tɔ̧́ɔ̧́-nú-pai ga ɓɛɛ wa tɔ̧ sitɛ ŋmaa nde: «Ŋma wi-zii-wen k’ɛɛ so bɔɔ sɛnɛ?»

⁹GASA WAN, k’ɛ́nɛ́, ɛ́nɛ́ zɛkɛɗi nɛ̀ wa, ɛ́nɛ́ mam nɛ o wi nɔ‘i nɛ̀ iŋ‘nɛ na'i.

¹⁰GASA WAN, ɛ́nɛ́ nɛ́ ŋgai kɔ‘m, yí‘m a̧a̧ tɛ‘nɛ́. Ŋga fara-duk kɔ‘m kànà nɛ́ tɛ Sɔ̧.

¹¹Sɔ̧, wi nɛ̀ kɔ̧a̧‘m nyɛmna'i a̧ tɛ‘i, ɓɛɛ a̧ tɛ de ha̧‘m mɛ zɔk tika-a ko o wi nɛ̀ hai am tɛnɛ‘i.

¹²Sɔ̧, k’ɛ́nɛ́ gbɛ wa yinɛ na, ká tɛ dukbíí kɔ‘m tɛɛ bi ɗoŋ gbina biro k’ɛ́nɛ́. Ɛ̀nɛ̀ ndák wa pɛsi sót-sót nɛ̀ ŋgai k’ɛ́nɛ́, ɛ̀nɛ̀ dé ha̧ gba̧a̧-tɛ-wa mɛ gbin, GASA WAN, ŋgee-gui-mɔ k’ɛɛ,

¹³wen mɔ mɛ kɔ̧ nú-wa nɛ́ ɗaŋmɔ, mɔ nɛ̀ wa tɔ̧ lɛŋ kànà nɛ́ ɗaŋ wen; ŋmaŋa-tɛ kɔ-wa a̧ sí ɗoŋ zu wa.

¹⁴Nyimsea k’ɛ́nɛ́'ɛ kúm wa lɛŋ ká‘i zɔk géé zɔka oi-wa ɓɔna, wen ɗaŋa nin'nɛ́ nɛ̀ wa ɗaŋ‘i in wen-ndela mɛ kɔ̧ nú-wa za̧i̧a̧! Nyimsea k’ɛ́nɛ́'ɛ gbɛ́ wa ha̧ o bíí zaŋnu lɛŋ mɛ iŋ ndé: kànà nɛ́ Sɔ̧ kpɔk ɓɛɛ a̧ ɔ wan zu o bíí ko Jakob.

¹⁵Ga̧a̧mɔ lɛŋ wa píí nɛ ɗoŋ woyo, yar nɛnɛ nɛ̀ ɗoŋ ye, de nɛ̀ da̧ hee o toyo ga.

¹⁶Zɔ́k wa wo! Kɔ-wa kànà nɛ́ dee da̧ nɛnɛ kii nɛ̀ nyɔŋmɔ hɔ fara nɛ̀ zaŋ-wa tɛ sur!

¹⁷Ɓɛɛ kɔ‘m, mi bíí nɛ gima zɔn nɛ̀ ŋgai k’ɛ́nɛ́; mɛ tutuyɛ lɛŋ mi sumburi nɛ́ dee demɔ k’ɛ́nɛ́, wen ɛnɛ nɛ́ ŋga fara-duk kɔ‘m; ŋgimbi bɔnɛ ɛ́nɛ́ nɛ́ fara-hu̧si kɔ‘m.

¹⁸GASA WAN, ɛ́nɛ́ nɛ́ ŋgai kɔ‘m, mi kuli nɛ mɔɔ-mbɛr h’ɛ́nɛ́; ŋga fara-duk kɔ‘m kànà nɛ́ tɛ Sɔ̧, Sɔ̧ nɛ̀ yor ɗoŋ-am'i.