Read Northwest Gbaya GIMA 63 Bible Online

GIMA 63 - Northwest Gbaya bible

GIMA 63

¹Gima ko David ŋga-gbárà Juda mɛ.

²GASA WAN Sɔ̧, ɛ́nɛ́ nɛ́ Sɔ̧ kɔ‘m, mi kii nɛ́ ɛnɛ, mi de nɛ́ wɔ‘nɛ́, mi ndak nɛ́ ɗoŋ‘nɛ́; mi hɔɔ ŋmaa in kora nu nɛ̀ yì bo sɛnɛ na.

³Mi kɔ̧ɔ̧ mɛ nɛ tɛ‘nɛ́ kɔ̧ sa̧a̧-fara k’ɛ́nɛ́ ha̧‘m mɛ zɔk ŋgayamɔ in gasamɔ k’ɛ́nɛ́.

⁴Kɔ̧ɔ̧mɔ k’ɛ́nɛ́ dee gan duka-a kɔ‘m kpasa; mi tɛ zɔn kànà ɛ́nɛ́.

⁵Mi kɔ̧ɔ̧ mɛ zɔn'nɛ́ ŋgimbi lɛŋ n'am biti duk kpasa; mi tɛ ha̧ er zɔn nɛ̀ nin'nɛ́.

⁶Mi tɛ kpa desee ɓɛɛ see-am tɛ ga̧ hee mi nyɔŋa nɛ́ de zɔr-zɔr nɔ̧́-kpoo in mbɔ-gba̧a̧ ga; mi tɛ de nyɛŋɛ bíí nɛ̀ gima-zɔn'nɛ́.

⁷Mi ta mɔ wen ɛ́nɛ́ ŋgimbi n'am ɔ nù gɔn gado kɔ‘m; kà‘m tun mɛ zɛ, mi ta kànà nɛ́ ɛ́nɛ́

⁸wen nɛ́ ɛ́nɛ́'ɛ yee ɗoŋ am, ɓɛɛ mi tɛ hu̧si ɗɔɔ gi̧ɔ̧-tɛ‘nɛ́ de nɛ̀ nyɛŋɛ;

⁹Sɔ̧-tɛ‘m duk kɔ‘i katɛ‘nɛ́ dɔ̧ɔ̧ ɓɛɛ nɛ́ wii-er'nɛ́ a̧ ha̧ ŋgai ha̧‘m.

¹⁰Hegɔ o wi nɛ̀ ndak am mɛ gbɛ‘m'i, wa a̧ zír si fara ko o fio mɛ;

¹¹wa a̧ gɔ́m wa nɛ gba-paa gbɛ lɛŋ, o ɓoŋgo a̧ nyɔ́ŋ wɔr-wa zakati nɛ nù;

¹²ɓɛɛ wannu tɛ kpa kɔ‘i desee tɛ Sɔ̧; wi nɛ̀ e ta nɛ̀ Sɔ̧ tɛ kpa zɔnamɔ ŋgimbi nɛ nú o wi-ndela nɔ‘i tɛ kpe.