Read Northwest Gbaya GIMA 68 Bible Online

GIMA 68 - Northwest Gbaya bible

GIMA 68

¹Gima ko David ha̧ wan-duk-zu-gima.

²Sɔ̧'ɔ̧ kúr ɓɛɛ o wisɛn kɔ̧-a̧ a̧ pɛsi sót-sót, o wi-sɛn-a a̧ yu mɔ ti a̧ yak.

³Ko o wi-ɗaŋ kànà nɛ́ pɛsa-a nduɗɛɛ yak hee mɔ'ɔ nɛ̀ zi-wee pɛsi nɛnɛ dam fara lɛŋ'ɛ ga; kɔ-wa kànà nɛ́ yela-a hee mɔ'ɔ nɛ̀ ndíá yeli nɛnɛ ká̧ wee’ɛ ga, kɔ-wa nɛ́ kuma-a mbɔlɔlɔ ti Sɔ̧ mɛ.

⁴Ɓɛɛ o wi-de-mɔ nɛ yuwar-a ya kɔ‘i ti Sɔ̧ mɛ de nɛ nyɛŋɛ; wa bíí nɛ gima-tortɛ kpíɗí nɛ̀ yɔyɛ-desee.

⁵Ɛ̀nɛ̀ bíí gima ha̧ Sɔ̧, ɛ̀nɛ̀ kuli mɔɔ-mbɛr nɛ̀ nin-a! Ɛ̀nɛ̀ hú̧í̧ yuwar ha̧ GASA WAN nɛ̀ duk zu bu-zan zir nɛnɛ tɛnɛ‘i! Ɛ̀nɛ̀ dé nyɛŋɛ ti GASA WAN, ɛ̀nɛ̀ zɔ́n a̧!

⁶Sɔ̧ nɛ̀ duk kɔ̧ sa̧a̧ fara-duk kɔ‘i mɛ nɛ́ dáà ko o be-oi in wi-ye-ɗoŋ o ko-gera;

⁷Sɔ̧ nɛ́ wi-ha̧-fara ha̧ o wi nɛ ya gba̧a̧ zu-wa ɛ̀nɛ́-wa. A̧ gboo o wi-zɔɓɔ yinɛ ɓɛɛ wa ya nɛ̀ desee, ɓɛɛ ko o wi-de-ŋgazu nɛ́ pofa-a nɛ̀ ŋga-gbárà nɛnɛ.

⁸Sɔ̧, nù naka so ŋgimbi n’ɛnɛ mgbɔɔ nɛ dukbíí k’ɛ́nɛ́ ɓir nɛnɛ yak nɛ ŋga-gbárà,

⁹ɓɛɛ kórò zuɗi ɓululu tɛ tɛa-a k’ɛ́nɛ́, hee mɔ'ɔ nɛ̀ dee so sɛn Sinai ga, Sɔ̧ ko Israɛl!

¹⁰Ɛ́nɛ́ ha̧a̧ dɔka demɔ h’ɛ́ɛ́ hee kórò nɛ̀ hɔ a zu nyɔnɔ k’ɛɛ'ɛ ga; ɛ́nɛ́ dee ha̧ mɔɔ-oi k’ɛ́nɛ́ nɛ̀ faɓa so'i mɛ dɔk siti,

¹¹ɓɛɛ nɛ́ mɔ'ɔ nɛ̀ o bíí k’ɛ́nɛ́ nɛ̀ yaa so nɛ́ o wisan dee ye sɛn fara n’ɛnɛ ɗafa so ha̧ wa tɛ kɔ̧ɔ̧mɔ k’ɛ́nɛ́.

¹²GASA WAN ha̧a̧ wen kɔ‘i ha̧ o betom kɔ‘i mɛ okoo-a mɛ tɔ̧: «Sɔ̧, wan-ŋgayamɔ lɛŋ, ndaka o gii wi-biro a taŋ sót-sót. O wannu in o wi-biro kɔ-wa pɛsa pamyala yu mɔ yak ɓɛɛ nɛ́ o okoo a̧ kɛ̧ɛ̧ mɔɔ-oi-wa nɛ̀ er ŋmaa lɛŋ, ɓɛɛ ɗafi tɛ-wa nɛ̀ mbɔi-tɛ duk nɛnɛ kɛɗu-kɛɗu hee tɛndɛɛ[14] ga; wa aa de ŋgol-ŋgol kísí tɛ-wa hee mɛ̀ nɛ́ ɓɔrɔ nɛ̀ gbisi zu kaya Tum[15] ga. Ɓɛɛ k’ɛ́nɛ́, ɛ́nɛ́ tɛ ɔ ɓɔn kɔ̧ tua-ŋgui nde?»

¹⁶Kaya Basaŋ só nɛ́ kaya ko Sɔ̧? Bó nɛ́ géé kaya-ŋmaŋ-tɛ na?

¹⁷K’ɛ́nɛ́ o kaya-ŋmaŋ-tɛ nɔ'ɔ, wen ge s’ɛnɛ e kaya nɛ Sɔ̧ hoka mɛ duk sɛnɛ tɛ geemɔ géè ge? GASA WAN tɛ duk kànà zu kaya'i kpoo nɛ kpoo.

¹⁸GASA WAN tɛɛ nɛ zu kaya Sinai pii kɔ̧ sa̧a̧ tua kɔ‘i nɛ̀ o dɔka keekee kɔ‘i nɛ̀‘i nyɛm mɛ tɔr na.

¹⁹GASA WAN, ɛ́nɛ́ kaia o bara nɛnɛ ɗoŋ‘nɛ́ daŋ nɛnɛ si zu kaya mɛ; wa ha̧a̧ kii-bíí h’ɛ́nɛ́ nɛ̀ mɔɔ-gɔm-er, ɓɛɛ ɛ́nɛ́ kai o wi-ŋgazu nɛnɛ si fara k’ɛ́nɛ́‘i mbɛt.

²⁰Ɛ̀ɛ̀ zɔ́n GASA WAN dam ɗoŋ wese lɛŋ wen nɛ́ a̧ a̧ zɔk yɛ, nɛ́ a̧ a̧ kpasi yɛ mbɛt.

²¹Sɔ̧ k’ɛɛ nɛ́ Sɔ̧-kpasi-bíí; kànà nɛ́ GASA WAN Sɔ̧ k’ɛɛ‘i a̧ kpasi bíí tɛ fio,

²²ɓɛɛ a̧ tɛ mbɔli zu o wi-sɛn-a; a̧ tɛ mbaŋ zu o wi nɛ̀ ŋmaŋ tɛ zu ɗaŋmɔ.

²³Nɛ́ mɔ'ɔ nɛ̀ GASA WAN tɔ̧a̧: «Mi tɛ kai wa nɛ̀ zu kaya Basaŋ mɛ pii ɗoŋ, mi tɛ kai wa nɛ̀ ɗɔɔ ɗuka gba-tɔp mɛ gbonɛ,

²⁴wen ha̧ mɛ mɛ pi̧ naŋ-mɛ ɗɔɔ tɔk tɛ o wi-sɛn-mɛ in ha̧ o toyo kɔ-mɛ mɛ ndal tɔk'i mbɛt.»

²⁵O bíí zɔka gbara-a ko o bíí k’ɛ́nɛ́, Sɔ̧, wa zɔka gbara-a ko o bíí ko Sɔ̧, wannu kɔ‘m, nɛ̀ gbar nɛnɛ si kɔ̧ sa̧a̧-fara kɔ̧-a̧.

²⁶O wi-bii-gima nɛka nɛti, o wi-mbɛr-mɔ nɛka ndaa-gɔtɔ, ɓɛɛ o be-zɔŋa nɛk kɔ-wa see-a mbɛt nɛ̀ be bi̧ɔ̧.

²⁷Ɛ́nɛ́, o wi-kɔ̧-gima, ɛ̀nɛ̀ zɔ́n Sɔ̧, ɛ́nɛ́, o bezaŋ Israɛl, ɛ̀nɛ̀ zɔ́n GASA WAN!

²⁸Bɛnjamin, be-ɗoŋ duka so hi̧i̧ mbɛt, nɛ́ à̧ á̧ duka ti ha̧ wa; o bezaŋ-wan ko Juda nɛka kɔ‘i nɛ̀ de dap-laa kɔ‘i, ɓɛɛ o bezaŋ-wan ko Zabulɔŋ in Nɛftalii yaa so kànà in wa mbɛt.

²⁹GASA WAN, ɛ́nɛ́ duka so kɔ̧ tua k’ɛ́nɛ́ zu kaya Jerusalɛm gbak nɛ̀ ɛɛ nɛ̀ ŋgai k’ɛ́nɛ́,

³⁰ɓɛɛ kinii ɛ̀nɛ̀ gɔ́n geŋa nyɛm nɛ̀ ɗoŋ ŋgai k’ɛ́nɛ́ ha̧ o wannu mɛ tɛ nɛ̀ dɔka-a mɛ ha̧ ha̧a̧mɔ kɔ-wa h’ɛ́nɛ́.

³¹Ɛ̀nɛ̀ násí boko-nam nɛ̀ duk poo toro'i, ɛ̀nɛ̀ násí o bíí nɔ‘i nɛ̀ ya hee o wiwii-ndai in o be-ndai ga'i; wa a̧ mɔ́k see-wa, wa a̧ káí o lɔr in bu-mbɔi tɛnɛ h’ɛ́nɛ́. Ɛ̀nɛ̀ pɛ́sí o dukbíí nɔ‘i nɛ̀ kɔ̧ɔ̧ biro hegɔ‘i sót-sót a taŋ.

³²O gasawi mɛ Egiptɛ tɛ gar tɛnɛ, ɓɛɛ o be Etiopii tɛ gɔm er sitɛ Sɔ̧ mbɛt.

³³O wannu zu nù'ɛ, ɛ̀nɛ̀ bíí gima zɔn nɛ̀ Sɔ̧! Ɛ̀nɛ̀ mbɛ́r o bi̧ɔ̧ zɔn nɛ̀ a̧!

³⁴Mɛ̀ nɛ́ a̧ a̧ ŋgan nyaŋa sɛn yiwese ŋgɔn mɛ kpoo nɛ kpoo; a̧ a̧ tɛ‘i, ɛ̀nɛ̀ zíí dika tiger-a!

³⁵Ɛ̀nɛ̀ zɔ́k ŋgai kɔ̧-a̧! Gasamɔ kɔ̧-a̧ a̧a̧ zu Israɛl, ɓɛɛ ŋgai kɔ̧-a̧ dama tɛ tura-zan lɛŋ;

³⁶Sɔ̧ nɛ̀ duk kɔ̧ sa̧a̧-fara kɔ‘i mɛ‘i, wi de zɛŋ in a̧ na! A̧ nɛ́ Sɔ̧ ko Israɛl! Nɛ́ a̧ a̧ ha̧ ŋgai in ŋgayamɔ ha̧ dukbíí kɔ̧-a̧. Ɛ̀nɛ̀ zɔ́n Sɔ̧!