Read Northwest Gbaya GIMA 74 Bible Online

GIMA 74 - Northwest Gbaya bible

GIMA 74

¹Gima ko Asaf. GASA WAN Sɔ̧, wen ge s’ɛnɛ pi̧ yɛ taŋ hegɔ ɓɔnsɛnɛ'ɛ ge? Wen ge s’ɛnɛ tuɓi bɔɔ da̧ a zu o bíí nɛ̀ ya nɛ́ mɔ-dai k’ɛ́nɛ́'ɛ ge?

²Tɛ‘nɛ́'ɛ mbaŋ ɗoŋ dukbíí n’ɛnɛ baa hok so nɛ̀ ku̧u̧naŋ-a mɛ, n’ɛnɛ baa gɔn zu wa mɛ ya nɛ mɔɔ-oi k’ɛ́nɛ́, bɛɛ ká tɛ‘nɛ́ bi ɗoŋ kaya Siɔŋ, fara-duk k’ɛ́nɛ́‘i, na mbɛt.

³Ɛ̀nɛ̀ hú̧í̧ naŋ‘nɛ́, ɛ̀nɛ̀ tɛ́ pii gba bɛɛ-oi’ɛ wen o wisɛn ɗaŋa o mɔ kɔ̧ sa̧a̧-fara k’ɛ́nɛ́ yinɛ lɔkɔti lɔkɔti;

⁴o wi-sɛn'nɛ́ yaa hiɗi nɛ̀ mɔ kɔ̧ fara-gasi'nɛ́ mɛ,

⁵ɓɛɛ wa yɔr kpoko-wen nɛ‘i tɛ iŋ nɛti na zu nú tua k’ɛ́nɛ́.

⁶Nɛ́ mɔ'ɔ nɛ̀ wa ndura o de yɔka-te kɔ̧ tua'i nɛ̀ kpi̧i̧ in dɔnɔ a nù lɛŋ;

⁷wa pi̧i̧ wee tɛ sa̧a̧-fara k’ɛ́nɛ́ dɔ a nù gbuɗuk. Mɔ nɛ wa dea'i pi̧i̧ ziimɔ zu nin'nɛ́, GASA WAN.

⁸Ɓɛɛ wa tɔ̧a̧: «Ɛ̀ɛ̀ kúm wa a nù war kpɔk ŋgaɓo!» Nɛ́ mɔ'ɔ nɛ̀ wa dɔɔ o fara-kpa-ŋmaa in Sɔ̧ zaŋnu’ɛ lɛŋ yinɛ.

⁹Kinii Sɔ̧ usi mɔ h’ɛ́ɛ́ hee kuti-a ga ɓɔna; o wi-tɔ̧-wen oi nú-a bo ɓɔna, ŋma bíí mɛ iŋ ŋgimbi nɛ̀ bɔnɛ'ɛ tɛ kaɗi nɛnɛ zu yɛ bo na mbɛt.

¹⁰GASA WAN, o wi-kur-zu yɛ tɛ duk kànà tɛ ɗaŋa nin'nɛ́ hegɔ ɓɔnsɛnɛ nde? O wi nɔ‘i tɛ fɛŋ kànà nin'nɛ́ yaknɛ sɔ̧ɔ̧i̧ nde?

¹¹Ɛ́nɛ́ daka bɔɔ er'nɛ́ si ɗoŋ wen ge? Ɛ́nɛ́ hu̧si bɔɔ wii-er'nɛ́ ɗɔɔ ti-kɔ-ɓaa'nɛ́ wen ge?

¹²GASA WAN, ɛ́nɛ́ nɛ́ wannu kɔ‘m nɛ̀ ku̧u̧naŋ-a mɛ tɛnɛ, ɛ́nɛ́ nɛ́ wan-kpasi o bíí zu nù'ɛ lɛŋ.

¹³Ɛ́nɛ́ mbaŋa so gba-tɔp tɛ ŋgai k’ɛ́nɛ́, ɛ́nɛ́ mbɔla zu ndiɓa ɗɔɔ yì.

¹⁴Ɛ́nɛ́ hɔ̧na zu ndiɓa'i, ɓɛɛ ɛ́nɛ́ ha̧ wɔr-aa ha̧ o gba-toyo mɛ nyɔŋ;

¹⁵ɛ́nɛ́ dee o be-zer in o foka gbar-gbar-yì. Ɛ́nɛ́ dee ha̧ o gasa nana-yì nɛ ɔ̧si̧ so na mɛ ɔ̧si̧ kor kútú-kútú.

¹⁶Wese in zɛ nɛ́ mɔ k’ɛ́nɛ́ wen mɛ̀ nɛ́ ɛnɛ'ɛ ee wese in sa̧a̧mɔ;

¹⁷nɛ́ ɛnɛ'ɛ gɔna mgbara nù lɛŋ. Ɛnɛ dee ŋgimbi bɛɛ in ŋgimbi ɓar mbɛt.

¹⁸Tɛ‘nɛ́'ɛ mbaŋ ɗoŋ ɗaŋa nin'nɛ́ nɛ̀ o wi-sɛn'nɛ́ ɗaŋ‘i, in dara nɛ o wi-ŋmaŋ-tɛ da̧ nɛ̀ ɛnɛ‘i mbɛt;

¹⁹k’ɛ́nɛ́ pi̧ gbaku̧i̧ k’ɛ́nɛ́ nù ha̧ boko-nam mɛ gbɛ na, ká tɛ‘nɛ́ bi ɗoŋ o wi-kɔsa k’ɛ́nɛ́ ɓɔn sɔɔ na.

²⁰Tɛ‘nɛ́'ɛ mbaŋ ɗoŋ ha̧a̧nú k’ɛ́nɛ́ h’ɛ́ɛ́ wen mɔ gana yɛ kaɗi, wen o be hu̧sa̧ fara nù k’ɛɛ'ɛ lɛŋ nɛ́ fara-de-ŋgamɔ ko o bíí;

²¹k’ɛ́nɛ́ e ha̧ wi nɛ̀ o bíí nukuri’ɛ mɛ si ɗoŋ si tɛ kɔ‘i nɛ̀ foe na, ɓɛɛ o wisan in o wi-kɔsa a̧ zɔn nin'nɛ́.

²²Ɛ̀nɛ̀ kúr, Sɔ̧, ɛ́nɛ̀ tɔ̧́ k’ɛ́nɛ́ ŋgaɓo! Tɛ‘nɛ́'ɛ mbaŋ ɗoŋ o wi-dawa nɔ'ɔ nɛ̀ ɗaŋ nin'nɛ́ hegɔɔ zɛ de nɛnɛ'ɛ!

²³Tɛ‘nɛ́'ɛ mbaŋ ɗoŋ tɔ̧ɔ̧-wen-dawa ko o wi-sɛn'nɛ́ in dee gitimɔ kɔ-wa nɛ̀ daŋ sitɛ‘nɛ́‘i mbɛt!