Read Northwest Gbaya GIMA 76 Bible Online

GIMA 76 - Northwest Gbaya bible

GIMA 76

¹Gima ko Asaf ha̧ wan-duk-zu-gima; gima nɛ̀ kunde pɛ́r-a nɛtɛ nɛtɛ.

²Wa iŋa Sɔ̧ zaŋnu ko Juda, nin-a ɔ hura zaŋnu ko Israɛl.

³Wa dee tua kɔ̧-a̧ sɛn Salɛm, fara-duk kɔ̧-a̧ nɛ́ Siɔŋ.

⁴Mɛ̀ nɛ́ sɛn hi̧i̧ á̧ à̧ gbina nɛ̀ biro ɗaŋ nɛ̀ góò in ŋgee ká bá nɛ̀ o gba-paa kɔ-wa.

⁵GASA WAN, ɛ́nɛ́ nɛ́ zɔm gasa sa̧a̧mɔ nɛ̀ duk nɛ́ mɔɔ-gɔn-ɗɛɗɛ-wi; tɛ mɔ‘i ɛ́nɛ́ dee ha̧ o wisɛn mɛ siŋ o zɔm dɔka mɔ kɔ-wa a nù

⁶ha̧ o bíí k’ɛ́nɛ́ mɛ kai nɛ̀ mɔɔ-oi-biro. Ɛ́nɛ́ dee ha̧ o yaa-ŋgo-biro kɔ-wa mɛ tir a nù nɛ̀ fio gbéyéŋ, ɓɛɛ tɛ oi ndaa o wi-biro mɔk gbɛlɛsuwɛɛ.

⁷GASA WAN, Sɔ̧ ko Jakob, nɛ́ tuɓa da̧ k’ɛ́nɛ́'ɛ dee ha̧ o nyaŋa in o keekee kɔ-wa mɛ gbasi yumbi a zu ŋmaa.

⁸Ɛ́nɛ́ nɛ́ zɔm mɔɔ-kíì; wi nɛ tɛ yor ti'nɛ́ ŋgimbi nyimsea k’ɛ́nɛ́ nɛ́ o?

⁹Ɛ́nɛ́ dee ha̧ o bíí mɛ zii gɔna-kita k’ɛ́nɛ́ nɛ̀ yiwese mɛ;

¹⁰ŋgimbi n’ɛnɛ kur mɛ gɔn kita kpasi nɛ̀ o wi-mɔka-see, nù duk nɛ̀ kíì selele.

¹¹Nyimsea ko bíí tɛ duk nɛ́ mɔɔ-zɔn'nɛ́, ɓɛɛ ɛ́nɛ́ tɛ mɔi̧ oi ndaa bíí nɛ̀ tɛ kpasi ɗɔɔ nyimsea k’ɛ́nɛ́ sitɛ‘nɛ́.

¹²Ɛ̀nɛ̀ há̧ nú‘nɛ́ ha̧ GASA WAN Sɔ̧ k’ɛ́nɛ́, ɓɛɛ ɛ̀nɛ̀ dé mɔ nyɛm nɛ̀ ɗoŋ ha̧a̧nú k’ɛ́nɛ́‘i mbɛt. Ɛ́nɛ́ o bíí lɛŋ nɛ̀ ya zik Sɔ̧, ɛ̀nɛ̀ káí ha̧a̧mɔ k’ɛ́nɛ́ tɛnɛ ha̧ a̧, wan nɛ‘i tɛ yu dɔ-zu-nɛ-wee!

¹³Nɛ́ a̧ a̧ ba ɔmi ko o be-wan yinɛ; a̧ nɛ́ zɔm mɔɔ-pi̧-kíì tɛ o wannu zu nù'ɛ.