Read Northwest Gbaya GIMA 79 Bible Online

GIMA 79 - Northwest Gbaya bible

GIMA 79

¹Gima ko Asaf. Sɔ̧, o tugun bíí nɛ̀ iŋ‘nɛ na hura mɔɔ-oi k’ɛ́nɛ́; wa dee ndiŋ a kɔ̧ sa̧a̧ tua k’ɛ́nɛ́, wa dee ha̧ Jerusalɛm mɛ kifi duk nɛ́ bɛɛ-oi.

²Wa ha̧a̧ wɔr o wi-de-tom k’ɛ́nɛ́ ha̧ o nɔ̧́í̧ mɛ yiwese mɛ nyɔŋ, in mur-tɛ o wi-yu-kíí‘nɛ́ ha̧ o boko-nam mɛ zaŋbɛɛ mbɛt;

³tɔk tɛ o bíí k’ɛ́nɛ́ fok nɛ̀ nù hee yi ga ɗoŋ Jerusalɛm mɛ, bíí-gun-wa bo na.

⁴O wi nɛ̀ ya zik yɛ da̧ nɛ ɛɛ zɛkɛɗi nɛ̀ ɛɛ mam nɛnɛ.

⁵GASA WAN, nyimsea k’ɛ́nɛ́ tɛ ɓɔn kànà nɛ́ ɓɔna-a zu yɛ ɓɔnsɛnɛ? Ɛ́nɛ́ tɛ duk kànà tɛ dee gɔya tɛ yɛ si ti hee wee ga nde?

⁶See'nɛ́ a̧ ɗáŋ zu o wi nɛ̀ iŋ‘nɛ na'i, in zu o tugun bíí nɔ‘i nɛ̀ ɗafi'nɛ́ na mbɛt'i,

⁷wen wa kɛra o bezaŋ Jakob kum nɛ̀ wa, ɓɛɛ wa ɗaŋ o mɔɔ-nù kɔ-wa lɛŋ.

⁸K’ɛ́nɛ́ e wen kɔ̧ see'nɛ́ in yɛɛ wen yɔɔ-kaya ko o zɔmdáa k’ɛɛ na. Kɔ̧ɔ̧mɔ k’ɛ́nɛ́ a̧ yé ɗoŋ yɛ wen kinii ŋgai-tɛ-ɛɛ kaɗa nɛ̀ oi.

⁹Sɔ̧, wan-kpasi-ɛɛ, ɛ̀nɛ̀ gbák yɛ wen ha̧ nin'nɛ́ mɛ hur; GASA WAN, ɛ̀nɛ̀ bí o yɔɔ-kaya k’ɛɛ yinɛ, ɛ̀nɛ̀ kpásí yɛ tɛ ha̧a̧nú k’ɛ́nɛ́.

¹⁰Wen ge sa o wi-iŋ Sɔ̧ na tɛ tɔ̧ ndé: «Sɔ̧ kɔ-wa a̧a̧ bɔɔ déè ndé‘i» ge? Ɛ̀nɛ̀ kífí er ha̧ wa oi tɔk tɛ o wi-de-tom k’ɛ́nɛ́ nɛ̀ wa gbaia so a nù.

¹¹Gɔfamɔ aia-nú ko o bara a̧ daŋ sitɛ‘nɛ́, ɛ̀nɛ̀ ɓár o wi nɛ̀ wa kaia so mɛ gbɛ yinɛ nɛ̀ ŋga er'nɛ́.

¹²Ɛ̀nɛ̀ dé mɔ ba nú o wi nɛ ya zik yɛ war mɔɔrɔ-ɗoŋ-yiitoo, GASA WAN, oi gasa dara nɛ̀ wa da̧a̧ nɛ̀ ɛnɛ‘i;

¹³ɓɛɛ war k’ɛɛ, dukbíí k’ɛ́nɛ́ nɛ̀ ya nɛ́ mɔ-dai k’ɛ́nɛ́, ɛɛ tɛ de osoko h’ɛ́nɛ́ bíí nɛ gima-zɔn'nɛ́ kpoo nɛ kpoo.