Read Northwest Gbaya GIMA 80 Bible Online

GIMA 80 - Northwest Gbaya bible

GIMA 80

¹Gima ko Asaf ha̧ wan-duk-zu-gima. Ger gima’ɛ nɛɛ nɛ́ ɗoŋ gima: Geŋa[17] nɛ́ mɔɔ-nyɛŋɛ.

²Wi-dai-Israɛl, ɛ̀nɛ̀ zii! Ɛ́nɛ́ wi-mgbɔ-Israɛl hee mɔ-dai ga, wan nɛ̀ duk zu damti nɛ̀ o keribim[18] tɔi e ŋgɔn’ɛ,

³ɛ̀nɛ̀ nyɛ́k ti Efraim, Bɛnjamin in Manase, ɛ̀nɛ̀ kúr nɛ̀ ŋgai k’ɛ́nɛ́, ɛ̀nɛ̀ tɛ́ɛ̀ gbak yɛ.

⁴GASA WAN ko gíí wi-biro, ɛ̀nɛ̀ mgbɔ́ yɛ pii ɗoŋ tɛ‘nɛ́, ɛ̀nɛ̀ dé ha̧ sɔnti'nɛ́ mɛ nyɛk zu yɛ h’ɛ́ɛ́ kpasi.

⁵GASA WAN, Sɔ̧ ko gíí wi-biro, see'nɛ́ tɛ ɓɔn tɛ nyima-a zu o wi-wor'nɛ́ ɓɔnsɛnɛ nde?

⁶Kam-nyɔŋ in yí-nɔɔ n’ɛ̀nɛ́ ha̧a̧ ha̧ wa nɛ́ mi̧i̧kɔ̧a̧.

⁷Ɛ́nɛ́ dee h’ɛ́ɛ́ mɛ ya nɛ́ mɔɔ-zaŋ-wen ko o bíí nɛ̀ ya zik yɛ, nɛ́ mɔ'ɔ nɛ̀ o wisɛn k’ɛɛ mam nɛ ɛɛ.

⁸GASA WAN ko gíí wi-biro, ɛ̀nɛ̀ mgbɔ́ yɛ pii nɛ ɗoŋ tɛ‘nɛ́, ɛ̀nɛ̀ dé ha̧ sɔnti'nɛ́ mɛ nyɛk zu yɛ h’ɛ́ɛ́ kpasi.

⁹Ɛ́nɛ́ zuɗa so ŋma gun nyak-dɔ̧ɔ̧ nɛ̀ Egiptɛ mɛ, nɛ́ɛ̀ gun tɛ ŋma de nù n’ɛ̀nɛ́ ndaka so o tugun bíí sɛnɛ yinɛ. Nyak-dɔ̧ɔ̧‘i ɓɔa ɓɛɛ yu nɛnɛ dumgba-dumgba dam zu nu lɛŋ;

¹¹nɛ́ mɔ'ɔ nɛ̀ gi̧ɔ̧ nyak-dɔ̧ɔ̧‘i kpee zu o gasa kaya lɛŋ, ɓɛɛ o gbaa-er-a kaɓali daŋ kpe zu o gbatui[19] ko Sɔ̧;

¹²nɛ́ mɔ'ɔ n'aa gbaa er-a hegɔɔ hɔ nú gba-tɔp, ɓɛɛ o be gbaa-er-a yu hegɔɔ hɔ nú nana-yì mɛ.

¹³Wen ge s’ɛnɛ gbina bɔɔ mɔ nɛ ɓora a̧ yínɛ́'ɛ ge, sa o wi-ɓir-war lɛŋ nɛ̀ yak fara'i ɓi nɛ́ waya-a yaknɛ'ɛ ge?

¹⁴O ŋgake nɛ́ mɔ'ɔ nɛ̀ daŋ kɔ‘i nɛ́ kɔ̧́ kombo mɛ ɗaŋ nɛ̀ nyak-dɔ̧ɔ̧‘i lɔkɔti-lɔkɔti’ɛ, o saɗi-zaŋbɛɛ lɛŋ gar nyɔŋ nɛnɛ hú̧s-hú̧s.

¹⁵GASA WAN ko o gii wi-biro, ɛ̀nɛ̀ píí ɗoŋ pii tɛ ɛɛ! Ɛ̀nɛ̀ pí̧ yí‘nɛ́ nɛ̀ yiwese mɛ tɛnɛ, ɛ̀nɛ̀ zɔ́k nyak-dɔ̧ɔ̧'ɛ a'i!

¹⁶Ɛ̀nɛ̀ pɛ́m nyak-dɔ̧ɔ̧ n’ɛnɛ guna so nɛ̀ wii-er'nɛ́'ɛ;

¹⁷o bíí zuɗa nyak-dɔ̧ɔ̧‘i pi̧ tɛ wee bíí wee gbulɛɛ hee kora ɗɔr ndai ga. K’ɛ̀nɛ̀ kai sɔnti'nɛ́ zɔk nɛ wa, ɓɛɛ wa tɛ kum gbuɗuk.

¹⁸Er'nɛ́ a̧ pɛ́m wi nɛ̀ duk nɛ̀ war wii-er'nɛ́, ɛ̀nɛ̀ pɛ́m bem ko Adam n’ɛnɛ ha̧a̧ so ŋgai ha̧ a̧'ɛ;

¹⁹ɓɛɛ kinii ɛɛ beka yak nyɛi̧ nɛ̀ ɛnɛ ɓɔna. Ɛ̀nɛ̀ kpásí yɛ ɓɛɛ ɛɛ tɛ sa nin'nɛ́!

²⁰GASA WAN ko gíí wi-biro, ɛ̀nɛ̀ mgbɔ́ yɛ pii ɗoŋ tɛ‘nɛ́, ɛ̀nɛ̀ dé ha̧ sɔnti'nɛ́ mɛ nyɛk zu yɛ h’ɛ́ɛ́ kpasi.