Read Northwest Gbaya GIMA 89 Bible Online

GIMA 89 - Northwest Gbaya bible

GIMA 89

²Mi tɛ bìì gima zɔn nɛ̀ yora-ɗoŋ-wen ko GASA WAN wese ɓɔnsɛnɛ; mi tɛ we ɗoŋ kpasawen k’ɛ́nɛ́ ha̧ o bezaŋ yɛ mɛ ɗoŋ kpoo nɛ kpoo.

³Mi'e ndé: «Kɔ̧ɔ̧mɔ k’ɛ́nɛ́ nɛ́ mɔ nɛ̀ duk kɔ‘i ɓɔnsɛnɛ'ɛ, ɓɛɛ kpasawen k’ɛ́nɛ́ tɛ duk hee mɔ'ɔ nɛ̀ yiwese duk nɛnɛ'ɛ ga.»

⁴Wen Sɔ̧ tɔ̧ɔ̧ so'e: «Mi nɔɔ tɔk in wi n'am hoka so nɛ̀ kanamɔ ha̧ David, wi-de-tom kɔ‘m:

⁵Ŋma bezaŋ-mɛ tɛ ɔ wan ɓɔnsɛnɛ; damti kɔ-mɛ tɛ duk kpoo nɛ kpoo.»

⁶GASA WAN, yiwese zɔn nɛ gasamɔ in kpasawen k’ɛ́nɛ́ tɛ mɔi̧a-a ko o sa̧a̧-wi.

⁷Nɛ́ o'o tɛ we zu nɛ̀ ɛnɛ ŋgɔn mɛ o? Nɛ́ o'o tɛ nyɛm ŋmaa in GASA WAN mgbara o sɔ̧ o?

⁸Tɛ mɔi̧a-a ko o sa̧a̧-wi, wi de zɛŋ nɛ̀ Sɔ̧ na, wen a̧ ɔ gasa; o wi-ya-katɛ-a ya nɛ̀ kíì.

⁹GASA WAN, Sɔ̧ ko gíí wi-biro, o'o nyɛma ŋmaa in'nɛ̀ɛ́ o? GASA WAN nɛ̀ a̧a̧ nɛ ŋgayamɔ, mɔ k’ɛ́nɛ́ lɛŋ kànà nɛ́ kpasawen.

¹⁰Nɛ́ ɛnɛ'ɛ de ha̧ kura-a ko gba-tɔp in zɔm pɛŋa-yì mɛ ga̧;

¹¹ɛ́nɛ́ nukura Rahab gbin gbɔlɔdɔk hee ŋma wɔr bíí a̧ wa gbɛa ga; ɛ́nɛ́ pɛsa o wisɛn k’ɛ́nɛ́ sót-sót nɛ̀ ŋga er'nɛ́.

¹²Yiwese nɛ̀ duk’ɛ nɛ́ k’ɛ́nɛ́, nù mbɛt nɛ mɔ k’ɛ́nɛ́; nɛ́ ɛnɛ'ɛ dee nù in mɔ lɛŋ nɛ̀ ya sɛnɛ,

¹³nɛ́ ɛnɛ'ɛ dee ká̧-zan-mɛ́-ŋgɔn in ká̧-zan-mɛ́-ɗɔɔ. O kaya Tabɔr in Hɛrmɔŋ sa nin'nɛ́ nɛ̀ desee.

¹⁴GASA WAN, ɛ́nɛ́ nɛ́ ŋgaŋa-wi, ŋgai k’ɛ́nɛ́ nɛ́ te-er'nɛ́;

¹⁵mɔɔ-wan k’ɛ́nɛ́ nɛ́ deemɔ nɛ yuwar-a in dee demɔ, yora-ɗoŋ-wen in kpasawen ya ti'nɛ́.

¹⁶Dukbíí nɛ̀ iŋa sumbura'nɛ́ ya nɛ̀ desee, o wi nɔ‘i tɛ nɛ kɔ‘i nɔ̀ tɛ sa̧a̧mɔ sɔnti'nɛ́.

¹⁷Wese lɛŋ wa de nɛ nyɛŋɛ tɛ nin'nɛ́, wa ya nɛ̀ tortɛ zu deemɔ nɛ yuwar-a k’ɛ́nɛ́.

¹⁸Nɛ́ ɛnɛ'ɛ ha̧ ŋgai ha̧ wa. Tɛ kɔ̧ɔ̧mɔ k’ɛ́nɛ́ ɛnɛ ha̧a̧ de sɔnti h’ɛ́ɛ́,

¹⁹wen ŋgee k’ɛɛ nɛ́ GASA WAN; Sa̧a̧ Wi ko Israɛl nɛ́ wannu k’ɛɛ.

²⁰Ɛ́nɛ́ hɔɔ so zu, tɔ̧ nɛ̀ wen ha̧ o wi-mbo-zu h’ɛ́nɛ́; gba̧a̧ wen-aa nɛ́ mɔ'ɔ: «Mi ee mɔɔ-wan kɔ‘m zu ŋma wi-gbin-biro, mi hoka nɛ́ be-ɗoŋ mgbara dukbíí kɔ‘m mɛ ɔ wan.

²¹«Wi’ɛi nɛ́ David, wi-de-tom kɔ‘m, nɛ́ mɔ'ɔ n'am tɛna sa̧a̧ nɔ̧́ kɔ‘m a zu-a;

²²mi tɛ yor kànà ɗoŋ-aa ŋgoor, ɓɛɛ er-am tɛ ha̧ ŋgai ha̧ a̧.

²³«Wisɛn beka ɔr a̧ na, wi nɛ̀ de mɔ de na beka de ŋgamɔ in a̧ na;

²⁴mi tɛ mbɔli o wi-kur-zu-a ɓɔn gbaayí-a, mi tɛ mbɛr o wi-sɛn-a kɔ̧-a̧ lɛŋ gbɛ yinɛ.

²⁵«Kpasawen in kɔ̧ɔ̧mɔ kɔ‘m tɛ duk in a̧ wen ha̧ a̧ mɛ ba sɔnti-a nɛ̀ ŋgɔn wen zu nin-am;

²⁶mi tɛ de ha̧ a̧ mɛ ɔ wan zu gba-tɔp in o nana-yì mbɛt.

²⁷«A̧ tɛ sa'm'e: ‹Dáà kɔ‘m, Sɔ̧ kɔ‘m in kam-ta-kpas'am!›

²⁸Mi tɛ de ha̧ a̧ mɛ duk nɛ́ kaya-bem kɔ‘m, mi tɛ e a̧ nɛ́ gasawi zu o wan zu nù'ɛ lɛŋ.

²⁹«Mi tɛ yor ɗoŋ-aa ɓɔnsɛnɛ, nɔɔ-tɔk kɔ‘m in a̧ tɛ duk ɓɔnsɛnɛ;

³⁰mi ta de ha̧ o bezaŋ-aa mɛ ɔ wan kpoo nɛ kpoo hee zɛ duka-a ko yiwese nɛ̀ duk ɓɔnsɛnɛ'ɛ ga.

³¹«Kà o bem kɔ̧-a̧ nɛ́ bɛ̧ɛ̧ heembea kɔ‘m, kà wa nɛ́ nɛ̀ɛ́ nɔ̀ nɛ̀ tana-a yuwar kɔ‘m na,

³²kà wa nɛ́ gbina geŋa kɔ‘m mbo nɛ̀ zu tɛ heembea kɔ‘m na mbɛt,

³³mi tɛ gusi wa nɛ̀ nyasi. «Mi tɛ usi bɔnɛ ha̧ wa oi ŋgazu kɔ-wa,

³⁴ɓɛɛ mɔ kpɔk, mi beka bɛ̧ yora ɗoŋ-aa na, mi beka e nɔɔ-tɔk kɔ‘m duk na.

³⁵«Mi beka e nɔɔ-tɔk kɔ‘m in a̧ tɛ geemɔ na, nú‘m beka kpai tɛ wen kɔ‘m na mbɛt.

³⁶Mi kana so mɔ a tɛ‘m tɛ sa̧a̧ duka-a kɔ‘m n'am beka ɔr David na!

³⁷«O bezaŋ-aa tɛ ɔ wan kpoo nɛ kpoo, ɓɛɛ damti kɔ̧-a̧ tɛ duk yí‘m hee wese nɛ duk zu-wi ɓɔnsɛnɛ'ɛ ga;

³⁸hee mɔ'ɔ nɛ nyaŋa-zɛ duk nɛ̀ kɔ‘i kpoo nɛ kpoo tɛ bu-zan’ɛ ga. Damti kɔ̧-a̧ tɛ duk nɛ́ mɔɔ-sedaako hegɔ mbɛt.»

³⁹Ɓɛɛ kinii, ɛ́nɛ́ bɛ̧a̧‘m, GASA WAN, ɛ́nɛ́ ea'm duk, ɛ́nɛ́ dee nyimsea in wan n’ɛnɛ tɛna so nɔ̧́ a zu-a;

⁴⁰ɛ́nɛ́ yaia nɔɔ-tɔk n’ɛnɛ nɔɔ so in wi-de-tom k’ɛ́nɛ́, ɛ́nɛ́ ɗaŋa mɔɔ-wan kɔ̧-a̧.

⁴¹Ɛ́nɛ́ gbina garo kɔ̧-a̧ a nù, ɛ́nɛ́ ɗaŋa o ŋga fara-duk kɔ̧-a̧;

⁴²o wi-ɓir-war kaia mɔ er a lɛŋ, ɓɛɛ o wi nɛ a̧a̧ katɛ a̧ ya kɔ‘i zɛkɛɗi nɛ a̧.

⁴³Ɛ́nɛ́ dee ha̧ o wisɛn kɔ̧-a̧ mɛ kpa ŋgai zu a̧, ɛ́nɛ́ dee ha̧ o wi-kur-zu-a mɛ ya nɛ̀ desee;

⁴⁴ɛ́nɛ́ baa gba-paa kɔ̧-a̧ gusi nɛ̀ ta gbin kezeŋ, ɓɛɛ ɛ́nɛ́ ye ɗoŋ-aa tɛ biro na mbɛt.

⁴⁵Ɛ́nɛ́ baa dɔ́rá-wan er-a yinɛ, ɛ́nɛ́ gbina damti kɔ̧-a̧ a nù;

⁴⁶ɛ́nɛ́ dee ha̧ a̧ mɛ sɔk nɛ̀ haya-a, ɛ́nɛ́ pi̧i̧ ziimɔ zu-a.

⁴⁷GASA WAN, nyimsea k’ɛ́nɛ́ tɛ ɓɔn nɛ ɓɔna-a zu yɛ ɓɔnsɛnɛ nde? Ɛ́nɛ́ tɛ duk kànà tɛ dee gɔya tɛ yɛ hee wee ga ɓɔnsɛnɛ nde?

⁴⁸Tɛ‘nɛ́'ɛ mbaŋ ɗoŋ am wen ɗoŋ ŋgimbi duka-a kɔ‘m zu nù'ɛ nyɛi̧ na; ɛ́nɛ́ dee bezaŋ Adam pi̧ nù sɔɔ géè?

⁴⁹Ɓɔn-zan-bíí so sɛnɛ? Ŋma wi-zin-tɛ er fio so nɛ́ o?

⁵⁰O kuti demɔ n’ɛnɛ dee so h’ɛ́ɛ́ a̧a̧ déè kinii ge, GASA WAN? yora-ɗoŋ kanamɔ n’ɛnɛ kana so ha̧ David’ɛ dee bɔɔ hee ge?

⁵¹GASA WAN, tɛ‘nɛ́'ɛ mbaŋ ɗoŋ dara nɛ̀ wa da̧a̧ nɛ̀ wi-de-tom k’ɛ́nɛ́; mi nyɔŋ kànà nɛ́ nin-am duk nɛnɛ tɛ dara nɛ̀ dukbíí'ɛ da̧ nɛ‘m’ɛ!

⁵²O wisɛn k’ɛ́nɛ́ da̧ nɛ dara; fara n'am nɛ́ lɛŋ kɔ-wa kànà nɛ́ da̧a̧‘m nɛnɛ.

⁵³Toka-de-yoŋgo a̧ dúk nɛ́ ko GASA WAN, Sɔ̧ ko Israɛl, hegɔ ɓɔnsɛnɛ! Aamɛn! Aamɛn!