Read Northwest Gbaya GIMA 91 Bible Online

GIMA 91 - Northwest Gbaya bible

GIMA 91

¹Wi nɛ̀ duk kɔ‘i ɗɔɔ gi̧ɔ̧-tɛ GASA WAN nɛ̀ duk ŋgɔn mɛ duk ɗɔɔ gi̧ɔ̧ wan-ŋgayamɔ lɛŋ;

²wi’ɛi tɛ tɔ̧ ha̧ Sɔ̧: «Ɛ́nɛ́ nɛ́ ŋga fara-hu̧si in ŋga fara-duk kɔ‘m; ɛ́nɛ́ nɛ́ Sɔ̧ kɔ‘m, wan n'am e nɛ̀ ta.»

³Nɛ́ a̧ a̧ bur mɛ tɛ pɛ́r ko wan-ɗaŋmɔ, kpasi nɛ̀ mɛ tɛ ŋga zɛɛ-geŋa.

⁴A̧ tɛ pɛm mɛ hee mɔ'ɔ nɛ nana-kɔra gu nɛnɛ zu o be-a’ɛ ga. Mɛ tɛ kpa de fara-hu̧si ɗɔɔ gi̧ɔ̧-tɛ-a. Yora-ɗoŋ-wi ko GASA WAN nɛ́ ŋgee in laa-biro.

⁵Kíì mɔɔ-zɛ beka de mɛ na, kà bó nɛ̀ kíì góò wese na mbɛt;

⁶mɛ beka de kíì ŋga zɛɛ nɛ̀ tɛ nɛ̀ ti tum na, kóó ŋma ŋga mɔɔ-ɗaŋ-wi mɛ bu wese na mbɛt.

⁷Kóó o bíí booro a̧ tira so a nù katɛ mɛ mbɔlɔlɔ wese kpɔk, kóó nɛ́ bíí booro ɓu a̧ tira a nù nɛ̀ war wii-er-mɛ mbɛt, mɔ beka fo tɛ-mɛ na, wen kpasamɔ kɔ̧-a̧ nɛ́ laa-biro in ŋgee kɔ-mɛ.

⁸Kà mɛ bá yí-mɛ nɛ̀ ŋgɔn, ɓɛɛ mɛ tɛ zɔk mɔɔ-oi-ɗaŋmɔ nɛ̀ tɛ tik zu o wi-ɗaŋ.

⁹Kà mɛ é GASA WAN, wan nɛ duk ŋgɔn mɛ, nɛ̀ fara-duk in fara-hu̧si kɔ-mɛ,

¹⁰bɔnɛ beka tik zu mɛ na, ɓɛɛ ŋma ŋga zɛɛ beka ɗɔŋ pii ká̧ tua kɔ-mɛ na mbɛt

¹¹wen a̧ tɔ̧ɔ̧ ha̧ o betom mɛ yiwese lɛŋ ha̧ wa mɛ pɛm mɛ tɛ yuwar nɛ̀ mɛ tɛ ba lɛŋ.

¹²Wa tɛ tɔi mɛ nɛ̀ er wen ká mɛ tɛɛ kɔ̧ naŋ-mɛ nɛ̀ ta.

¹³Mɛ tɛ i̧si̧ dila in kóró, mɛ tɛ mbɔli gɔ̧ in ndiɓa.

¹⁴Mi tɛ kpasi wi nɛ ndaɗi in am, ɓɛɛ mi tɛ pɛm a̧ wen a̧ nɛ wi nɛ iŋa nin-am.

¹⁵Kà a̧ sá‘m, ɓɛɛ mi kɔ̧ɔ̧ sara nú-a. Kà bɔnɛ nɛ́ kpaa a̧, mi tɛ duk in a̧. Mi tɛ gbo a̧ tɛ bɔnɛ, ɓɛɛ mi tɛ zɔn a̧.

¹⁶Mi tɛ de ha̧ zɛ duka-a kɔ̧-a̧ zu nù'ɛ mɛ dɔk, ɓɛɛ mi tɛ de ha̧ a̧ mɛ iŋ‘e mi nɛ wan-kpasi-wi kɔ̧-a̧.