Read Northwest Gbaya GIMA 92 Bible Online

GIMA 92 - Northwest Gbaya bible

GIMA 92

¹Gima wen wese-ɔm-tɛ.

²Dee osoko ha̧ GASA WAN nɛ́ demɔ nyɛmna, ndikira gima nɛ̀ nin GASA WAN nɛ̀ duk ŋgɔn mɛ dee nyɛmna.

³Wee ɗoŋ dee demɔ k’ɛ́nɛ́ mɛ tutuyɛ in gɔna-kita k’ɛ́nɛ́ nɛ yuwar-a mɛ zaŋzɛ dee nyɛmna;

⁴bia gima nɛ̀ kunde nɛ̀ nyak-aa ɓu in koloŋ dee nyɛmna mbɛt.

⁵GASA WAN, tom k’ɛ́nɛ́ ha̧a̧ desee ha̧‘m nyɛmna; kà‘m zɔ́k tom nɛ̀ er'nɛ́ dea, ɓɛɛ tortɛ baa'm.

⁶GASA WAN, tom n’ɛnɛ dea ɔ gasa nyɛmna; oee ɗuka taamɔ k’ɛ́nɛ́ wa!

⁷Wi nɛ̀ bó nɛ̀ kpasa taamɔ na iŋ kɔ‘i mɔ‘i na, wi-ta-mɔ ɗuk na iŋ kɔ‘i mgbara mɔɔ nɔ‘i na mbɛt.

⁸Kóó o wi-ɗaŋ dɛma so hee zɔ̧ ga, kóó o wi-de-mɔ de na dɔka so siti, dɔka-a kɔ-wa'i kànà nɛ́ wen fio,

⁹ɓɛɛ k’ɛ́nɛ́, ɛ́nɛ́ ɔ wan ɓɔnsɛnɛ.

¹⁰O wi-sɛn'nɛ́ nɛ́ mɔ'ɔ nɛ̀ kum’ɛ, o wi nɛ̀ de mɔ de na nɛ́ mɔ'ɔ nɛ̀ pɛsi nɛnɛ sót sót’ɛ.

¹¹Ɓɛɛ kɔ‘m, ɛ́nɛ́ ha̧a̧ ŋgai ha̧‘m hee zak bara-nam ga. Ɛ́nɛ́ tɛna mbe nɔ̧́ a zu'm.

¹²Yí‘m kɔɓa o wi-sɛn-am nɛ̀ kpe naŋ-am'i. Mi zia wen nɛ̀ o wi-ɗaŋ tɔ̧‘i mbɛt.

¹³Wi-de-mɔ nɛ yuwar-a duk kɔ‘i hee ndɛŋgɛ ga; a̧ tɛ gasi nɛnɛ hee gbatui nú Libaŋ ga.

¹⁴Wa guna o te nɔ‘i kɔ̧ tua ko GASA WAN; wa tɛ gasi kɔ̧ bee-gara ko GASA WAN Sɔ̧ k’ɛɛ.

¹⁵Kóó wa a̧ sɔk'i, wa a̧ wai kànà nɛnɛ‘i; wa duk nɛ̀ de-a ɓɔ nɛnɛ ɓɔnsɛnɛ

¹⁶wen ha̧ wa mɛ usi ndé, GASA WAN de mɔ nɛ yuwar-a. A̧ nɛ́ kam-ta kɔ‘m; mɔ n'aa de lɛŋ nɛ demɔ.