Read Northwest Gbaya GIMA 94 Bible Online

GIMA 94 - Northwest Gbaya bible

GIMA 94

¹GASA WAN, Sɔ̧-kifi-er! Sɔ̧-kifi-er, ɛ̀nɛ̀ tɛ!

²Ɛ̀nɛ̀ kúr, wi-gɔn-kita zu nù, ɛ̀nɛ̀ há̧ mɔɔ-oi-tom ko o wi-ŋmaŋ-tɛ ha̧ wa.

³GASA WAN, ɛ́nɛ́ tɛ zɔk o wi-ɗaŋ nɛ̀ yí géè hegɔ ɓɔnsɛnɛ? O wi-ɗaŋ tɛ kpa ŋgai nɛnɛ hegɔ ɓɔnsɛnɛ nde?

⁴O wi-de-mɔ de na tɔ̧ nɛ wen nɛ̀ hee ger, ŋmaŋ nɛ̀ tɛ, de nɛ̀ mɔ nɛ ŋgai.

⁵GASA WAN, bíí k’ɛ́nɛ́ nɛ́ mɔ'ɔ nɛ̀ wa mbɔli’ɛ, mɔɔ-oi k’ɛ́nɛ́ nɛ́ mɔ'ɔ nɛ̀ wa ɗaŋ'ɛ;

⁶wa gɔn nɛ ger o ko-gera in o gɛnɛ, gbɛ nɛ̀ o be-oi yinɛ mbɛt.

⁷Wa tɔ̧ kɔ-wa ndé, GASA WAN zɔk kɔ‘i mɔ na, Sɔ̧ kɔ Jakob pɛm kɔ‘i mɔ na mbɛt!

⁸Ɛ́nɛ́ o tira-wi nɔ'ɔ, ɛ̀nɛ̀ bá zu'nɛ́! Ɛ́nɛ́ o wi-ta-mɔ ɗuk na’ɛ, ɛ́nɛ́ tɛ iŋ bɔɔ mɔ mɛ gese ge?

⁹Ɛ́nɛ́ ta k’ɛ́nɛ́ wi nɛ̀ dee zer-wi beka zii kɔ‘i mɔ na? Wi nɛ̀ dee yí-wi beka zɔk mɔ na hee ge?

¹⁰A̧, wi-gai o tugun bíí, a̧ beka gai wa na hee ge? Mɛ̀ nɛ́ a̧ a̧ usi iŋamɔ ha̧ bíí.

¹¹GASA WAN iŋa taamɔ ko bíí, ɓɛɛ taamɔ ko bíí nɛ́ geemɔ.

¹²GASA WAN, wi n’ɛ̀nɛ̀ mgbɔ pii ɗoŋ tɛ‘nɛ́, n’ɛnɛ usi heembea k’ɛ́nɛ́ ha̧ a̧ duk kɔ‘i nɛ́ desee;

¹³ŋgimbi bɔnɛ, GASA WAN ha̧a̧ ɔma-tɛ ha̧ wi’ɛi, ɓɛɛ ko wi-ɗaŋ nɛ́ fio.

¹⁴GASA WAN bɛ̧ bíí kɔ‘i na; a̧ e mɔɔ-oi kɔ̧-a̧ duk na mbɛt.

¹⁵Gɔna-kita tɛ ndak nɛ́ ɗoŋ deemɔ nɛ yuwar-a, ɓɛɛ o wi-de-mɔ nɛ yuwar-a tɛ mɔi̧ duk ɗoŋ deemɔ nɛ yuwar-a.

¹⁶Nɛ́ o'o tɛ ye ɗoŋ-am mɛ bi biro in o wi-ɗaŋ o? O'o tɛ gbak am mɛ bi biro in o wi-de-mɔ de na o?

¹⁷Kà GASA WAN yé so ɗoŋ-am na, ɓɛɛ mi fee so kɔ‘m kaɗi.

¹⁸GASA WAN, kà‘m tɔ̧́ nde, naŋ-am a̧ mbali ŋmaa'i, ɓɛɛ yora-ɗoŋ-wen k’ɛ́nɛ́ ha̧a̧ ŋgai ha̧‘m.

¹⁹Tɛ gasa dita-see nɛ̀ bir am'i, kànà nɛ́ wen k’ɛ́nɛ́ a̧ ga̧ see-am ɓɛɛ.

²⁰Ŋma mɔ k’ɛ́nɛ́ so kpɔk in o ɗaŋ wi-gɔn-kita nɔ'ɔ, nɛ̀ e heembea tɛ geemɔ dak nɛ̀ bɔnɛ pi̧ nù'ɛ!

²¹Wa mɔi̧ ŋmaa tik nɛ̀ zu wi-de-mɔ nɛ yuwar-a gbɛ nɛ̀ o wi nɛ̀ wen bo zu wa.

²²Ɓɛɛ GASA WAN, ɛ́nɛ́ nɛ́ ŋga fara-duk kɔ‘m! Sɔ̧ kɔ‘m nɛ́ kam-ta-hu̧si-tɛ kɔ‘m!

²³A̧ tɛ de ha̧ ɗaŋmɔ kɔ-wa mɛ si ɗoŋ zu wa, a̧ tɛ gbɛ wa yinɛ tɛ ɗaŋ kɔ-wa'i; GASA WAN Sɔ̧ k’ɛɛ tɛ kpe nú-wa.