Read Northwest Gbaya O TUA-WEN 13 Bible Online

O TUA-WEN 13 - Northwest Gbaya bible

O TUA-WEN 13

¹Bem nɛ a̧a̧ nɛ iŋa-mgbara-mɔ zii nɛ mbɔrɔ ko dáà, ɓɛɛ wi-ŋga-see zii mbɔrɔ na.

²Bíí nyɔŋ hɔ ti wen de wen nɛ gbo nɛ nú-a, ɓɛɛ nyɔŋmɔ ko wi-de-ɗaŋmɔ nɛ dee ŋgamɔ.

³Bíí nɛ iŋ mgbara wen nɛ gbo nɛ kɔ̧ nú zɔk nɛ duka-a kɔ‘i: wan-baa-nu gbɛ nɛ tɛ.

⁴Mɔ nɛ wi-tɛɛri kɔ̧a̧, a̧ kpa na, ɓɛɛ o kpasa wi-de-tom tɛ kpa mɔ nɛ wa kɔ̧a̧.

⁵Wi-de-mɔ nɛ yuwar-a sɛn kɔ‘i nɛ wen-ndela, ɓɛɛ ko wi-ɗaŋ nɛ kaia ndaa-bíí in dee mɔɔ-foe.

⁶Deemɔ nɛ yuwar-a gbak nɛ bíí nɛ a̧a̧ tɛ tana yuwar, ɓɛɛ ɗaŋmɔ dee ha̧ wi-ɗaŋ mɛ tik.

⁷O ŋma bíí ba tɛ‘e wi nɛ wanmbɔi, ɓɛɛ bó nɛ̀ ŋma mɔ na; o ŋma e tɛ hee wisan ga, ɓɛɛ a̧a̧ nɛ mbɔi.

⁸Nɛ́ mbɔi ko bíí a̧ kpasi bíí zu nu, ɓɛɛ war ko wisan, wi kii wen in a̧ wen zu mbɔi na.

⁹Sa̧a̧mɔ ko o wi-de-mɔ nɛ yuwar-a tɛ nyɛk nɛ desee, ɓɛɛ lamba ko o wi-ɗaŋ tɛ bi.

¹⁰Mɔɔ-oi ŋmaŋa-tɛ nɛ kpɛri, ɓɛɛ iŋa-mgbara-mɔ duk tɛ o wi-zii-mbɔrɔ.

¹¹Kpaamɔ nɛ̀ ŋgai nɛ́ hɔ ti na, ɓɛɛ wi-kusi-mɔ mɔktɛ mɔktɛ tɛ kpa gan kuti-a.

¹²Tika-a ko mɔɔ-e-nɛ-ta ha̧ nɛ ɗaŋsee; kpaa mɔɔ-e-nɛ-ta ha̧ nɛ desee.[7]

¹³Wi nɛ e mbɔrɔ tɛ geemɔ tɛ yɔ, ɓɛɛ wi nɛ kasi geŋa tɛ kpa mɔɔ-oi-aa.

¹⁴Usamɔ ko wi-iŋ-mgbara-mɔ de ha'i mɛ duk kpasa, ɓɛɛ dee ha'i mɛ gba pɛ́r nɛ a̧a̧ yuwar ko fio e duk.

¹⁵Iŋa-mgbara-wen de nɛ demɔ ha'i, ɓɛɛ yuwar ko o wi-de-ɗaŋmɔ nɛ́ doe-ŋgɛ́zɛ́.[8]

¹⁶Wi-de-mɔ nɛ nú-tum na ta mɔ kaɗi sɛka a̧ dea, ɓɛɛ wi-bɔkɔ usi nɛ mgbélé kɔ‘i yaknɛ.

¹⁷Ɗaŋ betom tɛ tik tɛ ɗaŋmɔ, ɓɛɛ de betom nɛ nyina-haya-tɛ.

¹⁸San in foe nɛ ko wi nɛ siŋ usamɔ pi̧ taŋ; zɔnamɔ a̧a̧ in bíí nɛ kasi mbɔrɔ.

¹⁹Kpaa mɔɔ-e-nɛ-ta ha̧ nɛ desee, ɓɛɛ o wi-ɗaŋ zɔk ea-ɗaŋmɔ duk nɛ ɗaŋmɔ sɛn yi wa.

²⁰Zaŋ wi-gbam-yari in wi-gɔna-kɔ̧-zaŋ tɛ gɔn, ɓɛɛ wi-gbam-yari in wi-bɔkɔ tɛ de ɗaŋ mbɛt.

²¹Ɗaŋmɔ ndak nɛ ɗoŋ wi-de-ɗaŋmɔ, ɓɛɛ ko wi-de-mɔ nɛ yuwar-a nɛ duka-a tɛ bɔtɛ.

²²O bezaŋ o wi-de-mɔ nɛ yuwar-a kpa nɛ mɔɔ-oi zɔmdáa kɔ-wa, ɓɛɛ mbɔi ko o wi-ɗaŋ nɛ́ o wi-de-mɔ nɛ yuwar-a a̧ kpa kpaa.

²³Fɔ ko wisan dɛm nyɛmna, ɓɛɛ o ŋma bíí fe wen dee mɔ nɛ yuwar-a na.

²⁴Wi-deli-bem de nɛ ɗaŋmɔ in bem kɔ‘i, ɓɛɛ wi nɛ kɔ̧ɔ̧ bem kɔ‘i tɛ gusi kana a̧.

²⁵Wi-de-mɔ nɛ yuwar-a nyɔŋ mɔ zaŋ sur, ɓɛɛ zaŋ wi-ɗaŋ sur na kpoo nɛ kpoo.