Read Northwest Gbaya O TUA-WEN 15 Bible Online

O TUA-WEN 15 - Northwest Gbaya bible

O TUA-WEN 15

¹De kifa-nú-wen gbɔsi nɛ nyimsea e nu, ɓɛɛ ɗaŋ-nú-wen dak nɛ nyimsea pi̧ nu.

²Leɓe wi-iŋ-mgbara-mɔ tɔ̧ nɛ wen-gbak wi nɛ kɔ̧ɔ̧ mɛ zii, ɓɛɛ nú wi-bɔkɔ tɔ̧ nɛ mgbélé-wen.

³Yí GASA WAN dama fara lɛŋ, zɔk nɛ o ɗaŋwi in o de-wi.

⁴Leɓe-ga̧-wen hɔɔ ŋmaa in te duka-kpasa, ɓɛɛ ɗaŋ-nú-wen tok nɛ see-wi sar.

⁵Mgbelewi e nɛ usamɔ ko dáà kɔ‘i tɛ geemɔ, ɓɛɛ wi-kasi-mbɔrɔ nɛ haya bíí.

⁶Dɔka kpaamɔ suɓi ŋmaa suɓi kɔ̧ tua ko wi-de-mɔ nɛ yuwar-a, ɓɛɛ see wi-ɗaŋ ɔ nu zu kpaamɔ kɔ‘i na.

⁷Ndàrá-nú wi-iŋ-mgbara-mɔ usi nɛ iŋamɔ, ɓɛɛ see wi nɛ̀ bó nɛ̀ kpasa taamɔ na nɛ ŋma mɔ nɛtɛ!

⁸Ɗafa-sɔ̧ ko wi-ɗaŋ de tɛ GASA WAN na, ɓɛɛ wora sɔ̧ ko o wi-de-mɔ nɛ yuwar-a ɔ nɛ nyɔ̧ɔ̧ tɛ a̧.

⁹Yuwar deemɔ ko wi-ɗaŋ nɛ ɗaŋmɔ yí GASA WAN, ɓɛɛ a̧ kɔ̧ɔ̧ nɛ bíí nɛ ndak nɛ ɗoŋ deemɔ nɛ yuwar-a.

¹⁰Wí úsí ŋga bɔnɛ ha̧ wi nɛ a̧r tɛ tana war, ɓɛɛ wi-bɛ̧̀-mbaŋa-tɛ mɔ tɛ fe.

¹¹Kɔ̧-fio in gba gboŋgo kpɔ̧ɔ̧-kpɔ̧ɔ̧ nɛ ya bùù ti GASA WAN’ɛ, kà bó nɛ̀ see bíí!

¹²Wi-kai-ndaa-wi kɔ̧ ha'i mɛ tɔ̧ mbɔrɔ ha̧ a̧ na; a̧ gbam in wi-iŋ-mgbara-mɔ na.

¹³Desee usi tɛ sɛn sɔnti-wi, ɓɛɛ kà see-wi tu̧, taamɔ ziɓa lɛŋ.

¹⁴Wi-ta-kpasamɔ kii nɛ iŋamɔ, ɓɛɛ kɔ̧ nú wi nɛ̀ bó nɛ̀ kpasa taamɔ na nɛ tɔ̧ɔ̧ mgbélé-wen.

¹⁵Wese ko wisan lɛŋ nɛ wese bɔnɛ, ɓɛɛ wese ko wi-bɔtɛ lɛŋ nɛ wese gbaŋa.

¹⁶Gana so kpaa mbɔi tikiɗi yu nɛ kíí GASA WAN, bá nɛ̀ kpaa dɔka mbɔi zaŋ tu̧u̧-see.

¹⁷Gana so nyɔŋa wa̧a̧-kpoo fara nɛ kɔ̧ɔ̧mɔ a̧a̧ sɛnɛ, bá nɛ̀ nyɔŋa zɔr-zɔr kpoo-ndai fara nɛ sɛnmɔ a̧a̧ sɛnɛ.

¹⁸Wi nɛ see kura dak nɛ kpɛri pi̧ nu, ɓɛɛ wi-ga̧a̧-see gbɔsi nɛ kpɛri e nu.

¹⁹Yuwar ko wi-tɛɛri ɔ hee ɓoramɔ-tɛn ga, ɓɛɛ yuwar ko wi-de-mɔ nɛ yuwar-a ɔ yɔka.

²⁰Be-iŋ-mgbara-mɔ ha̧ nɛ desee ha̧ dáà kɔ‘i, ɓɛɛ bem nɛ̀ bó nɛ̀ kpasa taamɔ na e nɛ naa kɔ‘i tɛ geemɔ.

²¹Mɔɔ-mgbele nɛ desee ko wi nɛ̀ bó nɛ̀ kpasa taamɔ na, ɓɛɛ wi-iŋ-mɔ ba nɛ tana war kɔ‘i.

²²Kà ee-zu-mɔ hɔ gba̧a̧ na, mɛ nɛ wen keta nɛ‘i ba na, ɓɛɛ kà o wi-tɔ̧-mbɔrɔ dɔk, ee-zu-mɔ tɛ hɔ gba̧a̧.

²³Desee a̧a̧ sɛnɛ wen bíí nɛ kifi nú zu wen nɛ nú-tum na; kifa-nú nɛ de-a nɛ gba demɔ nyɛmna.

²⁴Wi-iŋ-mgbara-mɔ ba nɛ yuwar kpasa-a si ŋgɔn, ɓɛɛ a̧ gira tɛ e fara ko o fio nɛ duk si ɗɔɔ duk.

²⁵GASA WAN gbin nɛ tua ko wi-ŋmaŋ-tɛ a nu, ɓɛɛ a̧ ba nɛ mɔɔ-kɛ̧-mgbara-nù ko ko-gera e ŋgɔn.

²⁶GASA WAN sɛna ɗaŋ taamɔ nyɛmna, ɓɛɛ sa̧a̧ wen ɔ dee nyɛmna sɛn ti a̧.

²⁷Wi nɛ ɓar mɔ nɛ ŋgai bó nɛ̀ ga̧a̧mɔ kɔ̧ tua kɔ‘i na, ɓɛɛ wi nɛ bɛ̧ ha̧a̧mɔ-ye-wi tɛ duk ɗoŋ-aa nyɛi̧ zu nu.

²⁸Wi-de-mɔ nɛ yuwar-a ta wen sɛka kifa nú, ɓɛɛ nú o wi-ɗaŋ ɔ̧i̧ nɛ́ ɗaŋ wen.

²⁹GASA WAN ndaɗi in o wi-ɗaŋ na, ɓɛɛ a̧ zii nɛ kɔfamɔ ko o wi-de-mɔ nɛ yuwar-a.

³⁰Zɔka bíí nɛ de yí ha̧ nɛ desee, ɓɛɛ de nyɛrɛmɔ ha̧ nɛ ŋgai.

³¹Wi nɛ yeŋ zer tɛ kpasa tɔ̧ɔ̧ mbɔrɔ tɛ duk mgbara o wi-iŋ-mgbara-mɔ.

³²Wi nɛ e usamɔ tɛ geemɔ e nɛ tɛ tɛ geemɔ, ɓɛɛ wi nɛ zii mbɔrɔ kpa nɛ kpasa taamɔ.

³³Yuu kíí GASA WAN nɛ́ ku̧u̧naŋ iŋa-mgbara-mɔ, ɓɛɛ nɛti ha'i mɛ kpa gasamɔ, wi tɛ duk nɛ mɔka-see.