Read Northwest Gbaya O TUA-WEN 18 Bible Online

O TUA-WEN 18 - Northwest Gbaya bible

O TUA-WEN 18

¹Wi-ŋgoko kii nɛ mɔ kɔ‘i ɓɛɛ; ɓɛɛ see-aa kur kur zu tɔ̧ɔ̧ mbɔrɔ ko o bíí ha̧ a̧.

²Wi-bɔkɔ kii gɔna-kɔ̧-zaŋ na, ɓɛɛ a̧ kɔ̧ɔ̧ ha̧ bíí mɛ zii nɛ taamɔ kɔ̧-a̧ ɓɛɛ.

³Ɗaŋ nɛ́ kana kɔ‘i in fɛŋa-zu, ɓɛɛ dara mbɛt in búù.

⁴Wen nɛ‘i tɔ̧'ɛ nɛ ɗuka dir-yì; mɛ nɛ ŋma foka-yì nɛ nyɛma mɛ ha̧ iŋa-mgbara-mɔ.[15]

⁵Bo nɛ ɔ dee ha'i mɛ gbak wi-ɗaŋ, ɓɛɛ wi gɔna kita nɛ ɗaŋ-a zu wi-de-mɔ nɛ yuwar-a na.

⁶Ndàrá-nú wi-bɔkɔ dak nɛ kpɛri pi̧ nu, ɓɛɛ nú-a dee ha̧ biro mɛ tik.

⁷Nú wi-bɔkɔ dak nɛ fio pi̧ zu wan-aa, ɓɛɛ ndara-nú-a nɛ pɛ́r-ba-a̧.

⁸Wen mɛ kɔ̧ nú wi-kai-ndaa-wi nɛ mɔɔ-ɔ-nyɔ̧ɔ̧ nú-wí, ɓɛɛ zira hɔ kɔ̧ pɛr ɗɔtɔ-wi mɛ.

⁹Wi nɛ e tom kɔ‘i tɛ geemɔ in wi nɛ ɗaŋ tom kɔ‘i yak ŋmaa na, wa nɛ o nya-wi.

¹⁰GASA WAN nɛ ŋgárá-hu̧si-sɛnɛ. Wi-de-mɔ nɛ yuwar-a nɛ si katɛ a̧ ɓɛɛ duka keɗeŋ.

¹¹Ɓɛɛ war ko wanmbɔi e kɔ‘i ta nɛ mbɔi kɔ‘i hee o bíí saaye nɛ‘i za̧a̧ gaŋa[16] zik nɛnɛ ga.

¹²Nɛti ha̧ bíí mɛ tik, a̧ ŋmaŋ nɛ tɛ-a, ɓɛɛ duka-a nɛ mɔka-see nɛ mɔ nɛ yak ti ha̧ gasamɔ.

¹³Wi nɛ kifi nú wen nɛti sɛka tɛɛ zii gba̧a̧-a̧ nɛ ɗoŋ, fɛŋ nɛ tɛ, pi̧ nɛ ziimɔ zu.

¹⁴Taamɔ‘e wi tɛ kpasi ha̧ nɛ nɔɔ-ŋgiɗi ha̧ bíí tɛ ɔɔ zɛɛ, ɓɛɛ kà taamɔ‘i nɛ́ ziɓa kaɗi, nɛ o a̧ tɛ ba e ŋgɔn woyo o?

¹⁵Wi nɛ kɔ̧ zaŋ ɔ gɔna kii nɛ iŋamɔ, in zer wi-iŋ-mgbara-mɔ kii nɛ iŋamɔ mbɛt.

¹⁶Mbɔi ko bíí nɛ mɔɔ-hu̧i-yuwar ha̧ a̧, mgbɔ nɛ a̧ si katɛ o gasawi.

¹⁷Wen ko kuti wi-ɓa-kita ɔ tana hɔ ŋgimbi nɛ ɓii-aa be tɛɛ ɓa kɔ‘i kaɗi sɛka'i iŋa mgbák kpasawen.

¹⁸Nɛ́ tani a̧ de ha̧ kpɛri mɛ kaɗi, nɛ́ a̧ a̧ kɛ̧ mgbara wen ko o ŋga bíí.

¹⁹Hɔa-a katɛ ŋga-wi nɛ see tu̧a ŋgaya gan baa ye-ŋgárá, ɓɛɛ kpɛri ɔ hee ŋga mɔɔ-man nu ŋgárá ga.

²⁰Zaŋ-wi sur wen wen mɛ nú-wí, in nɛ́ tɛ́ tom ko ndàrá-nú-wi a'i ŋmaŋ nɛnɛ.

²¹Mɛ nɛ ndàrá-nú-wi a̧ kpasi wi kóó gbɛɛ wi mbɛt; o bíí nɛ nú bá nɛ̀ wen nyɛmna tɛ kpa mɔɔ-oi-aa.

²²Kpaa kpasa kóò nɛ kpaa bɔtɛ; wan-kóò‘i kpaa nɛ ha̧a̧mɔ ko GASA WAN.

²³Wisan ai nɛ nú tɔ̧ nɛ wen, ɓɛɛ kifa-nú ko wanmbɔi ɔ kpaŋkaraŋ.

²⁴Wi nɛ a̧a̧ nɛ dɔka gbama-yari kii nɛ tika-a, ɓɛɛ ŋma kpasa sɛm gana ŋma nya-gbo-ɗoŋ-ŋmaa nɛ kɔ̧ɔ̧mɔ.