Read Northwest Gbaya O TUA-WEN 19 Bible Online

O TUA-WEN 19 - Northwest Gbaya bible

O TUA-WEN 19

¹Gana so a'i de mɔ nɛ yuwar-a duk nɛnɛ nɛ san, bá nɛ̀ dee ndela de nɛ mɔɔ-bɔkɔ.

²Deemɔ nɛ̀ bó nɛ̀ kpasa taamɔ na nɛ geemɔ sɔɔ gee, ɓɛɛ naka-tɛ de nɛ mɔ, ɓan na wi yɔɔ kaya kaɗi.

³Ŋgimbi nɛ sap-mgbele ko bíí a yí-see bíí kaɗi, ɓɛɛ nɛ zu GASA WAN a̧ see-aa nyim sɛnɛ.

⁴Ŋgimbi lɛŋ wanmbɔi ba nɛ mbe sɛm, ɓɛɛ be kpɔk sɛm ko wisan e nɛ a̧ duk.

⁵Ɗaŋ wi-sedaako tɛ kpa mɔɔ-oi-aa, ɓɛɛ wi-ndela beka gbo ɗɔɔ bɔnɛ na mbɛt.

⁶Wi-mbɔŋgɔli-gasawi ɔ dɔka, ɓɛɛ bíí lɛŋ nɛ sɛm ko wi-ha̧-mɔ.

⁷O nya ko wisan lɛŋ sɛn a̧ sɛn, ɓɛɛ o sɛm kɔ̧-a̧ lɛŋ pɛsa e a̧ duk. Ŋgimbi n'aa de mɛ tɔ̧ wen in wa, wa bo katɛ a̧ ɓɔna.

⁸Wi nɛ kɔ̧ɔ̧ mɛ iŋ kɛ̧ɛ̧-mgbara-mɔ nɛ́ bíí nɛ̀ kɔ̧ɔ̧ mɛ gbak tɛ-wi, ɓɛɛ wi nɛ de mɔ nɛ gɔna-kɔ̧-zaŋ tɛ duk nɛ de-a.

⁹Ɗaŋ wi-sedaako tɛ kpa kana mɔɔ-oi-aa, ɓɛɛ wi-ndela tɛ kpa sɔn-tɛ.

¹⁰Bo nɛ ɔ dee ha̧ wi-bɔkɔ mɛ duk tɛ bɔtɛ na, kà bó nɛ̀ bara mɛ ɔ wan zu o be-wan na.

¹¹Wi-iŋ-mgbara-mɔ iŋa nɔɔ-ŋgiɗi tɛ nyimsea kɔ‘i, ɓɛɛ gasamɔ kɔ̧-a̧ nɛ ee kia-wen ko bíí tɛ geemɔ.

¹²Nyimsea ko wannu pi̧ nɛ kíì tɛ-wi hee tuɓa-a ko dila ga, ɓɛɛ deako kɔ̧-a̧ hɔɔ ŋmaa hee waia-a ko mbɛŋ tɛ zɔ̧ ga.

¹³Bem nɛ̀ bó nɛ̀ kpasa taamɔ na ha̧ nɛ gasa ɗaŋsee ha̧ dáà kɔ‘i, ɓɛɛ kia-wen ko okoo nɛ huia-gɔn.

¹⁴Wi nyɛma mɛ kpa tua in mbɔi nɛ mɔɔ-oi dáà kɔ‘i, ɓɛɛ kpaa kpasa okoo-mbo-zu nɛ ha̧a̧mɔ ko GASA WAN.

¹⁵Nɛ́ tɛɛri a̧ de ha'i mɛ zur, ɓɛɛ duk-oi kpa wɔr mɔ na.

¹⁶Wi nɛ kasi o geŋa tɛ kpasi, ɓɛɛ wi nɛ kɔ̧ mboo zu na to nɛ fuu-tɛ a kɔ̧ gɔŋ.

¹⁷Wi-de-ko ha̧ wisan kusi nɛ mɔ a er GASA WAN, wen a̧ tɛ kifi er mɔ‘i piiɗoŋ.

¹⁸Hee mɔ'ɔ nɛ ŋgimbi ɓɔna kaŋ ga, mɛ̀ úsí yuwar mɔ ha̧ bem kɔ-mɛ, ɓɛɛ ká mɛ de nɛ mɔɔ-ba-te-a ha̧ a̧ mɛ fe na.

¹⁹Wi-de-ŋgamɔ tɛ yoɓi kana mɔ n'aa ɗaŋ: kà'ì e a̧ gee, wi fo nɛ a̧ pi̧ yuwar ɗaŋmɔ kɔ̧-a̧ siti.

²⁰Mɛ̀ yéŋ zer-mɛ tɛ mbɔrɔ in mɛ kpɛk usamɔ, wen ha̧ mɛ mɛ iŋ mgbara mɔ.

²¹Ee-zu-mɔ nɛtɛ nɛtɛ a̧a̧ kɔ̧ see bíí, ɓɛɛ nɛ GASA WAN a̧ gbii oi ndaa mɔ lɛŋ.

²²Mɔ nɛ‘i kii tɛ bíí nɛ mboozu, ɓɛɛ gana so wisan bá nɛ̀ wi-ndela.

²³Nɛ́ yuu kíí GASA WAN a̧ de ha'i mɛ duk kpasa, ɓɛɛ wi ɔɔ ya nɛ de-a, ŋma ɗaŋmɔ fo tɛ-wi na.

²⁴Wi-tɛɛri pi̧ er kɔ̧ bera kam, ɓɛɛ nyɛm mɛ ba er pii ɗoŋ pii kɔ̧ nu na.

²⁵Kà'ì mbɛr wi-kai-ndaa-wi, ɓɛɛ mɔ‘i tɛ tɔ̧ mbɔrɔ ha̧ wi-bɔkɔ. Kà'ì gai wi nɛ kɔ̧ zaŋ ɔ gɔna, ɓɛɛ a̧ tɛ iŋ mɔ siti.

²⁶Wi nɛ e o dáà kɔ‘i tɛ bɔnɛ, wi nɛ ndak naa kɔ‘i nɛ́ bem-pi̧-foe zu bíí, nɛ̀ see-wi beka ga̧ zu a̧ na ɓɔnsɛnɛ.

²⁷Bem kɔ‘m, kà mɛ siŋ mbɔrɔ pi̧ nu, mɛ tɛ yambali.[17]

²⁸Ɗaŋ wi-sedaako-ndela mam kɔ‘i deemɔ nɛ yuwar-a mam; nú o wi-ɗaŋ duna nɛ ɗaŋmɔ.

²⁹Nyasi duk dɔ̧ɔ̧ wen o wi-kai-ndaa-wi, in o mbɛri wen ɗoŋ o wi-bɔkɔ.