Read Northwest Gbaya O TUA-WEN 21 Bible Online

O TUA-WEN 21 - Northwest Gbaya bible

O TUA-WEN 21

¹See wannu nɛ foka-yì sɛn kɔ̧ er GASA WAN; a̧ nyɛma mɛ kpai see wannu si fara lɛŋ n'aa kɔ̧a̧.

²Taamɔ ko bíí‘e mɔ nɛ‘i de lɛŋ duk nɛ yuwar-a, ɓɛɛ nɛ GASA WAN a̧ we see bíí.

³Deemɔ nɛ yuwar-a in dee demɔ á̧ dee tɛ GASA WAN gan ɗafa-sɔ̧ ha̧ a̧.

⁴Zɔkamɔ-gasi-zu, taamɔ́-ŋmaŋ-tɛ, in de duka-a ko wi-ɗaŋ lɛŋ usi nɛ ɗaŋmɔ.

⁵O ee-zu-mɔ ko kpasa bíí ha̧ nɛ yí-mɔ ha̧ a̧, ɓɛɛ ɓan na wi-de-mɔ nɛ naka-tɛ tika kaɗi.

⁶Kpaamɔ zu ndela nɛ mɔ ko o wi-bɔkɔ, ɓɛɛ mgbɔ nɛ wa si yi fio.

⁷Dee ŋgamɔ ko o wi-ɗaŋ tɛ yɔ wa, wen wa bɛ̧ nɛ deemɔ nɛ yuwar-a.

⁸Yuwar ko o wi-ɗaŋ tan na, ɓɛɛ war-a ko wi-de-mɔ nɛ yuwar-a ɔ tana zéŋ.

⁹Gana so ɔa-a ɗɔɔ wɛɛ-tua bá nɛ̀ ɔa-a kɔ̧ tua kpɔk in ko-kii-wen.

¹⁰Kiitɛ wi-ɗaŋ nɛ oi-aa lɛŋ kɔ̧ɔ̧ ɗaŋmɔ nyɛmna, kóó nɛ sɛm kɔ̧-a̧ mbɛt, a̧ zɔk a̧ nɛ de yí na.

¹¹Kà'ì kuli ɔm wi-si-kafɛ, zaŋ wi-bɔkɔ tɛ gɔn; ɓɛɛ kà'ì usi mɔ ha̧ wi-iŋ-mgbara-mɔ, a̧ tɛ iŋ mɔ.

¹²Wi-de-mɔ nɛ yuwar-a duk dɔ̧ɔ̧ pɛm nɛ mɔ nú-gara ko o wi-ɗaŋ, wen foo wa pi̧ tɛ bɔnɛ.[21]

¹³Wi nɛ kpe zer tɛ hiɗimɔ ko wisan tɛ sa mɔ, ɓɛɛ beka kpa kifa-nú na.

¹⁴Ha̧a̧mɔ ha̧ ŋmaa nɛ ti fu̧i̧ nɛ mɔɔ-ha̧-ga̧a̧-see; yee ŋmaa nɛ be mɔ nɛ hu̧sa̧-a̧ nɛ mɔɔ-ga̧-nyimsea mbɛt.

¹⁵Gɔna kita nɛ yuwar-a nɛ mɔɔ-ha̧-desee ha̧ wi-de-mɔ nɛ yuwar-a, ɓɛɛ mɔ‘i nɛ mɔɔ-pi̧-bele zaŋ wi-de-ɗaŋmɔ.

¹⁶Wi nɛ kɔ̧ baa kpasa yuwar na tɛ nɛɛ ɔm tɛ fara ko o fio mɛ.

¹⁷Wi nɛ kɔ̧ɔ̧ nɛ dee saa tɛ tik tɛ san; wi nɛ kɔ̧ɔ̧ dɔ̧ɔ̧ in de nyɔŋmɔ beka kpa mbɔi na.

¹⁸Wi-ɗaŋ nɛ mɔɔ-kpe-wen ko wi-de-mɔ nɛ yuwar-a; wi-de-ɗaŋmɔ nɛ mɔɔ-kpe-wen ko wi-de-mɔ nɛ tana-a.

¹⁹Gana so duka-a ŋga-gbárà mɛ ɛ̀nɛ̀, bá nɛ̀ duka-a in ko-kii-wen, tu̧ nɛ see-wi.

²⁰Demɔ in bɔtɛ a̧a̧ kɔ̧ tua ko wi-iŋ-mgbara-mɔ, ɓɛɛ ko wi nɛ̀ bó nɛ̀ kpasa taamɔ na, nɛ ɗaŋa mɔɔ nɔ‘i ɓɛɛ.[22]

²¹Wi nɛ ndak ɗoŋ deemɔ nɛ yuwar-a in mboozu tɛ kpa duka-kpasa in tu̧u̧-tɛ-mɔ bá nɛ̀ deemɔ nɛ yuwar-a.

²²Wi-iŋ-mgbara-mɔ tɛ daŋ si ye ko o ŋga wi-gbin-biro, ɓɛɛ a̧ tɛ gbin ŋgárá nɛ wa e so nɛ ta'i.

²³Wi nɛ dor ndàrá-nú in leɓe, zɔk nɛ tɛ wen ɗaŋsee.

²⁴Wi-gasi-zu ŋmaŋ nɛ tɛ, zɛkɛɗi kɔ‘i nɛ bíí lɛŋ in deemɔ kɔ̧-a̧ lɛŋ nɛ gasa zu.

²⁵Aa-see-mɔ ko wi-tɛɛri tɛ gbɛ a̧, wen a̧ kɔ̧ ha̧ er-a mɛ fo tom na.

²⁶Wese lɛŋ see-aa ɓɔn tɛ aa-see-mɔ, ɓɛɛ wi-de-mɔ nɛ yuwar-a ha̧ mɔ e oi er na.

²⁷Ɗafa-sɔ̧ ko o wi-ɗaŋ nɛ gasa ɗaŋmɔ nyɛmna, gan gan wen nɛ wa a̧a̧ nɛ ɗaŋ taamɔ kɔ̧ see-wa.

²⁸Wi-sedaako-ndela tɛ fe, ɓɛɛ kpasa wi-de-sedaako beka de kíì tɔ̧ɔ̧ mɔ n'aa iŋa na.

²⁹Ko wi-ɗaŋ nɛ kaia sɔnti kpórós, ɓɛɛ mɔ ko wi-de-mɔ nɛ yuwar-a nɛ ɗafa yuwar duka-a kɔ‘i.

³⁰Iŋa-mgbara-mɔ, zɔka mɔ, taamɔ bó nɛ́ gasamɔ ti GASA WAN na.

³¹Wí hɛ́r nyaŋa pɛm nɛ wese biro, ɓɛɛ gbina-biro tɛ nɛ tɛ GASA WAN.