Read Northwest Gbaya O TUA-WEN 3 Bible Online

O TUA-WEN 3 - Northwest Gbaya bible

O TUA-WEN 3

¹Bem kɔ‘m, ká tɛ-mɛ bi ɗoŋ usamɔ kɔ‘m na, ɓɛɛ mɛ e see-mɛ tɛ o geŋa kɔ‘m.

²Wa tɛ de ha̧ mɛ mɛ duk ɗoŋ-aa nyɛi̧, ha̧ pɛ-mɛ mɛ dɔk in ha̧ ga̧a̧mɔ mɛ duk in mɛɛ.

³Ká mɛ́ e dee demɔ nɛ yuwar-a in mboozu duk na. Mɛ̀ hɛ́r wa ger-mɛ, mɛ̀ yɔ́r wa kɔ̧ see-mɛ;

⁴hegɔ mɛ tɛ kpa deako ɓɛɛ mɛ tɛ duk nɛ de-a sɛn ti Sɔ̧ in ti o bíí mbɛt.

⁵Mɛ̀ há̧ tɛ-mɛ ha̧ GASA WAN nɛ see-mɛ lɛŋ, ɓɛɛ ká mɛ e ta-mɛ nɛ̀ iŋamɔ kɔ-mɛ na.

⁶Tɛ-mɛ a̧ mbaŋ ɗoŋ GASA WAN tɛ yuwar nɛ mɛ tɛ ba lɛŋ, ɓɛɛ a̧ tɛ ɗafi yuwar naŋanɔ kɔ-mɛ nɛ de-a.

⁷Ká mɛ́ ta nɛ̀ tɛ-mɛ‘e mɛ nɛ wi-iŋ-mgbara-mɔ na; mɛ̀ yú GASA WAN, ɓɛɛ mɛ̀ é ɗaŋmɔ duk.

⁸Mɔ‘i tɛ duk nɛ nyina-tɛ-mɛ in mɔɔ-ha̧-ŋgai ha̧ o gbaagur-tɛ-mɛ.

⁹Mɛ̀ tú̧ tɛ GASA WAN nɛ o mɔ kɔ-mɛ lɛŋ in nɛ o zu-kpaamɔ kɔ-mɛ lɛŋ mbɛt;

¹⁰ɓɛɛ o dam kɔ-mɛ tɛ dun nɛ alkamaari, dɔ̧ɔ̧ tɛ dun o gba-kpánà kɔ-mɛ yɛtɛtɛ.

¹¹Bem kɔ‘m, ká mɛ pi̧ usamɔ ko GASA WAN taŋ na, ɓɛɛ ká mɛ mbɔi tɛ o mbɔrɔ kɔ̧-a̧ na,

¹²wen mɛ̀ nɛ̀ bíí nɛ GASA WAN kɔ̧ nyɛmna a̧ a̧ usi bɔnɛ ha̧ a̧, hee mɔ'ɔ nɛ dáa-wan-bem de nɛnɛ in bem n'aa kɔ̧ɔ̧ nyɛmna’ɛ ga.

¹³Nyɛŋɛ a̧ pi̧ bíí nɛ kpaa iŋa-mgbara-mɔ ɓɛɛ kpa iŋamɔ mbɛt,

¹⁴wen kpaa iŋa-mgbara-mɔ gana kpaa mbɔi: mɔ nɛ‘i kpa sɛnɛ gana mɔ nɛ‘i kpa tɛ lɔr.

¹⁵Iŋa-mgbara-mɔ dee gan kísí nɛ gɛnɛ-a ɔ ŋgaya; mgbara o mɔ nɛ‘i kɔ̧ɔ̧ lɛŋ, ŋma nɛ tɛ de nyɛm ŋmaa in a̧ bo na.

¹⁶Duka-a ɗoŋ-aa nyɛi̧ a̧a̧ nɛ kɔ̧ er-a mɛ wiiko, ɓɛɛ nɛ war er-a mɛ gale, nɛ́ o kpaamɔ in zɔnamɔ.

¹⁷O yuwar kɔ̧-a̧ lɛŋ nɛ o de war, ɓɛɛ o geɗek war kɔ̧-a̧ nɛ ga̧a̧mɔ.

¹⁸A̧ nɛ te-duka-kpasa wen wi nɛ kasi a̧ nɔ er kpɔk; bíí nɛ ndaɗi in a̧ tɛ duk tɛ bɔtɛ.

¹⁹GASA WAN dee nù nɛ iŋa-mgbara-mɔ, a̧ dee yiwese tɛ iŋamɔ kɔ̧-a̧.

²⁰Nɛ́ tɛ iŋa-mgbara-mɔ kɔ̧-a̧ a̧ a̧ hu̧i̧a̧ nɛ o gba ɗuka-fara, ɓɛɛ o tura-zan yeli, kok nɛnɛ nɛ kórò mbɛt.

²¹Bem kɔ‘m, mɛ̀ kásí zɔka mɔ nɛ de-a in kɛ̧ɛ̧-mgbara-mɔ; ká tɛ-mɛ bi ɗoŋ wa na.

²²Wa tɛ ya nɛ mɔɔ-kpasi-mɛ; wa tɛ ya hee kísí ger-mɛ ga.

²³Mɛ tɛ ba yuwar kɔ-mɛ sɛ́ɛ́m, ɓɛɛ mɛ beka kɔ̧ naŋ-mɛ na.

²⁴Kà mɛ̀ ɔ nu, kíì beka de mɛ na; kà mɛ̀ ɔ ya, ya tɛ ɔ nyɔ̧ɔ̧ yí-mɛ.

²⁵Ká mɛ́ de kíì ŋma ŋgamɔ nɛ tɛ hɔ yek nɛ mɛ na, kóó nasa wi ko o wi-ɗaŋ a̧ ka'i de kíì pi̧ tɛ-mɛ na mbɛt,

²⁶wen GASA WAN tɛ pɛm mɛ, a̧ tɛ zɔk naŋ-mɛ ká mɛ tɛɛ ba pɛ́r.

²⁷Kà mɛ̀ nɛ boo nɛ̀ ŋgai wen dee demɔ in wi nɛ ak mɛ, ká mɛ́ bɛ̧ dea-a ha̧ a̧ na.

²⁸Kà mɛ̀ nɛ boo nɛ̀ mɔ mɛ gbak nɛ sɛm kɔ-mɛ, ká mɛ́ tɔ̧ ha̧ a̧‘e: «Mɛ̀ é kaŋ, sa̧a̧mɔ sɛka'm ha̧a̧ mɛ,» na.

²⁹Ká mɛ́ e zu mɔ wen dee ɗaŋmɔ in sɛm kɔ-mɛ nɛ̀ duk nɛ see kpɔk in mɛɛ na.

³⁰Kà ŋma bíí de ɗaŋmɔ in mɛɛ na, ká mɛ́ kpɛr in a̧ gee na.

³¹Ká mɛ́ yeŋ wi-de-mɔ nɛ ŋgai na, ɓɛɛ ká mɛ́ ba er deemɔ kɔ̧-a̧ de nɛ kɔ-mɛ na mbɛt.

³²Wen GASA sɛna o ɗaŋwi, a̧ ndaɗi kɔ̧-a̧ in o wi nɛ de mɔ nɛ yuwar-a.

³³Fom ko GASA WAN a̧a̧ zu bíí kɔ̧ tua ko wi-ɗaŋ, ɓɛɛ a̧ tok nɛ de yoŋgo zu o bíí kɔ̧ tua ko wi-de-mɔ nɛ yuwar-a.

³⁴A̧ zɛkɛɗi kɔ̧-a̧ o wi-kai-ndaa-wi zɛkɛɗi, ɓɛɛ a̧ dee ko ha̧ o wi-mbo-zu.

³⁵Wi-iŋ-mgbara-mɔ tɛ kpa gasamɔ, ɓɛɛ mɔɔ-oi ko wi-ŋgazu nɛ búù.