Read Northwest Gbaya O TUA-WEN 30 Bible Online

O TUA-WEN 30 - Northwest Gbaya bible

O TUA-WEN 30

¹Ɛ̧ɛ̧ nɛ wen ko Agur, bem ko Yake. Mɛ nɛ wen n'aa tɔ̧ɔ̧ ha̧ Itiɛl, ha̧ Itiɛl in Ukal:[28]

²«Mi nɛ gee ɗaŋ tira-wi mgbara o dɔka bíí, iŋamɔ kɔ‘m nyɛm ŋmaa in ko bíí na.

³Mi yambi iŋa-mgbara-mɔ na, mi iŋ mgbara mɔ ko GASA WAN na mbɛt.

⁴Nɛ́ o'o nɛ̀ɛ́ hɔ yiwese ká pii ɗoŋ kaɗi o? Nɛ́ o'o ɓura búk kɔ̧ er kaɗi o? Nɛ́ o'o hɛra yì nɛ laa kɔ‘i kaɗi o? Nɛ́ o'o dee o nduti nu o? Nin wi’ɛi nɛ o; nin bem kɔ̧-a̧ nɛ o? Kà mɛ̀ nɛ́ iŋa, nɛ̀ mɛ̀ tɔ̧́ ha̧‘m.

⁵«Wen ko GASA WAN lɛŋ hɔɔ gba̧a̧, ɓɛɛ duk nɛ ŋgee ko wi nɛ hu̧si sɛn ɗoŋ-aa.

⁶Ká mɛ́ e ŋma mɔ zu wen kɔ̧-a̧ na, wen ka a̧ tɛɛ gai mɛ, e nɛ mɛ nɛ wi-ndela.»

⁷«Nɛ mɔ yiitoo a̧‘m ak er'nɛ́ Sɔ̧, ɛ̀nɛ̀ dé mɔɔ nɔ'ɔ, k’ɛ́nɛ́ dɔ wa nɛ‘m nɛti ha̧‘m mɛ fe na.

⁸Ɛ̀nɛ̀ bá ndela in gɔɔmɔ nyɛi̧ nɛ‘m, ɓɛɛ k’ɛ́nɛ́ e ha̧‘m duk san batɛ kóó kpaa mbɔi gan na mbɛt. Ɛ̀nɛ̀ há̧ nɛ war nyɔŋmɔ kɔ‘m ha̧‘m ɓɛɛ,

⁹wen ká zaŋ-am tɛɛ sur gan kere ká‘m kafi'nɛ́, tɔ̧ nɛnɛ‘e: ‹GASA WAN nɛ o?› Kóó ká wɔ tɛɛ ba'm, ká‘m tɛɛ zu mɔ ɗaŋ nɛ nin Sɔ̧ kɔ‘m.»

¹⁰Ká mɛ́ tɔ̧ ndaa wi-de-tom ti wan kɔ̧-a̧ na, wen ká a̧ tɛɛ fom mɛ, ɓɛɛ ká ɗaŋmɔ-a tik zu mɛ.

¹¹O ŋma kpar-bíí a̧a̧ sɛnɛ nɛ fom nɛ dáà kɔ‘i, in nɛ gasi naa kɔ‘i na.

¹²O ŋma kpar-bíí a̧a̧ sɛnɛ nɛ ta kɔ‘i'e, wi ɔ sa̧a̧, ɓɛɛ kii mɛ zui simbo ɗaŋmɔ mɛ tɛ-wa na.

¹³O ŋma kpar-bíí a̧a̧ sɛnɛ nɛ zɔka mɔ kɔ-wa nɛ zɔkamɔ-gasi-zu in foe bo ndara yí-wa na.

¹⁴O ŋma kpar-bíí mbɛt a̧a̧ sɛnɛ nɛ gba̧a̧ nin-wa ɔ hee gba-paa ga, in nyaŋgara-wa ɔ hee nú pai ga mbɛt, wen nyɔŋa o wisan zu nu’ɛ, in o wi-kɔsa mgbara dukbíí.

¹⁵Duɓen a̧a̧ nɛ boko-bem yiitoo; nin wa'e: «Mɛ̀ há̧ tɛnɛ, mɛ̀ há̧ tɛnɛ.» Ŋma mɔ taar a̧a̧ sɛnɛ nɛ zaŋ sur na, nɛ̀ beka tɔ̧‘e: «Nyɛma hegɔ,» na kpoo nɛ kpoo; mɛ̀ nɛ́: Fara ko o fio, ko-yar-ndɔra, ŋma nù nɛ kórò hɔ zu-a na; ɓɛɛ naar-a a̧a̧ sɛnɛ mbɛt: mɛ̀ nɛ́ wee nɛ kaɗi dɔɔ mɔ na.

¹⁷Kà ŋma bíí mam dáà kɔ‘i, kóó mbo zu ha̧ naa kɔ‘i na, o gba-kɔra gba-for-yì tɛ gɔm yi-a ó, ɓɛɛ o zua nyɔŋa a̧.

¹⁸O ŋma mɔ taar a̧a̧ sɛnɛ nɛ gana'm, n'am zii mgbara-a na; mɛ̀ nɛ́: yuwar ko zua sɛn yiwese, yuwar ko gɔ́k sɛn zu ta, yuwar ko kombon sɛn zu gba-tɔp, ɓɛɛ naar-a a̧a̧ sɛnɛ mbɛt: mɛ̀ nɛ́ yuwar ko wiwii sitɛ be-zɔŋa.

²⁰Ko-de-dàlà de dàlà kaɗi, zuia yì mɔi̧ tɛ duk sɛ́ɛ́m, ɓɛɛ tɔ̧a̧‘e: «Ŋma ɗaŋmɔ n'am dee kɔ‘m bo na,» hee mɛ nɛ gee nú-a a̧ a̧ di̧i̧ ɗoŋ nyɔŋmɔ ga.

²¹O ŋma mɔ taar a̧a̧ sɛnɛ nɛ sakali bíí nɛ‘i iŋ zu-a na in nɛ nyɛm ha'i mɛ kpɛk na; mɛ̀ nɛ́: Bara nɛ ɔ wan, wi-bɔkɔ nɛ kpa nyɔŋmɔ nyɔŋ zaŋ sur, tula be-zɔŋa nɛ ba wíì; ɓɛɛ naar-a a̧a̧ sɛnɛ mbɛt; mɛ̀ nɛ́ kó-de-tom nɛ kpa mɔɔ-oi ko naa-wan-tua kɔ‘i.

²⁴O ŋma be kpɔra be saɗi a̧a̧ sɛnɛ zu nu’ɛ naar nɛ a̧a̧ nɛ iŋa-mgbara-mɔ; mɛ̀ nɛ́:

²⁵o gba-mii: wa nɛ ŋma dukbíí nɛ bó nɛ̀ ŋgai na, ɓɛɛ nɛ iŋa ɗafa nyɔŋmɔ kɔ‘i e ŋgɔn ŋgimbi-mɔi̧a-nyɔnɔ;

²⁶kparɛ: wa nɛ ŋma dukbíí nɛ bó nɛ̀ ŋma ŋgai na, ɓɛɛ nɛ iŋa dee tua kɔ‘i e mgbara ta;

²⁷o gba-dɔya nɛ bó nɛ̀ wan na, ɓɛɛ nɛ gbo nɛ̀ gii yar nɛnɛ;

²⁸in gbɔɗɔ nɛ‘i nyɛma mɛ ba nɛ er-wi gee, nɛ ye bɔɔ fara ko wannu’ɛ!

²⁹O ŋma mɔ a̧a̧ sɛnɛ taar mbɛt nɛ iŋa duka-a, nɛ a̧a̧ nɛ de naŋanɔ mbɛt; mɛ̀ nɛ́: dila, saɗi nɛ a̧a̧ nɛ see mgbara oi o dɔka-a lɛŋ, nɛ yu mɔ ti ŋma mɔ na, toyo nɛ guntir ɔ ŋgaya, in vala gbadua; ɓɛɛ naar-a a̧a̧ sɛnɛ mbɛt: mɛ̀ nɛ́ wannu nɛ duk ti ha̧ o wi-biro kɔ‘i.

³²Kà mɛ́ nɛ́ dee mɔɔ-mgbele bá nɛ̀ zu-mɛ nɛ ŋgɔn, ɓɛɛ kà tɛ-mɛ nɛ mbaŋa ɗoŋ-aa, mɛ̀ gú er-mɛ nú-mɛ́;

³³wen mɛ̀ nɛ́ tɛ̀ sukpa yibere a̧‘i kpa nɛ nɔ; mɛ̀ nɛ́ tɛ̀ sɔma zɔ̧ɔ̧-wi a̧ tɔk-zɔ̧ɔ̧ hɔ nɛnɛ; nɛ kia-wen a̧ dak kpɛri pi̧ nu mbɛt.