Read Northwest Gbaya O TUA-WEN 5 Bible Online

O TUA-WEN 5 - Northwest Gbaya bible

O TUA-WEN 5

¹Bem kɔ‘m, mɛ̀ yéŋ zer-mɛ tɛ iŋa-mgbara-mɔ kɔ‘m, mɛ̀ yéŋ zer-mɛ tɛ iŋamɔ kɔ‘m,

²ha̧ mɛ mɛ zɔk mɔ nɛ sa̧a̧-a̧, ɓɛɛ tɔ̧ɔ̧-wen kɔ-mɛ tɛ duk nɛ yuwar-a.

³Nɛ mbetɛ, ndàrá-nú kó-dàlà tɔ̧ nɛ nyɔ̧ɔ̧ wen, nú-a baa tɛ-wi gan nɔ́,

⁴ɓɛɛ mgbák mɔɔ ɗɔɔ o wen nɔ‘i nɛ paŋmɔ; nú-a ɔ tɔ̧a̧ hee gba-paa nɛ nú-a yiitoo ga.

⁵Naŋanɔ kɔ̧-a̧ ba nɛ yuwar-fio, a̧ mgbɔ nɛ wi si fara-fio mɛ.

⁶Yuwar kɔ̧-a̧ n'aa ba'i nɛ yambala-a si fara n'aa iŋ na, nɛ̀ bó nɛ́ yuwar kpasa-a na.

⁷Kinii, o bem, ɛ̀nɛ̀ zíí wen kɔ‘m; k’ɛ́nɛ́ é wen kɔ‘m tɛ geemɔ na.

⁸Mɛ̀ é yuwar kɔ̧-a̧ duk, ká mɛ hɛɗi si ká̧ nu tua kɔ̧-a̧ na,

⁹wen ká tu̧u̧-tɛ-mɔ kɔ-mɛ de geemɔ, in ká ŋma wi-de-ko-na gbɛ mɛ,

¹⁰wen ká kpaamɔ kɔ-mɛ tɛɛ duk nɛ mɔ ko ŋma bíí si zan, in ká mɔɔ-oi-tom kɔ-mɛ nɛ́ si er ŋma gɔni bíí,

¹¹wen ká mɛ tɛɛ bembi ŋgimbi nɛ kiitɛ-mɛ in kpoo-tɛ-mɛ tɛ mbɔi.

¹²Kà mɔ nɛ́ dee hegɔ, mɛ tɛ ai nú-mɛ‘e: «Mi sɛna usamɔ wen ge? See-am ee o mbɔrɔ tɛ geemɔ wen ge?

¹³Mi zii so mbɔrɔ ko o wan kɔ‘m na, mi yeŋ so zer mɛ zii usamɔ ko o wi nɛ usi mɔ ha̧‘m na, wen ge?

¹⁴Nɛ mɔ‘i sa'm kpa bɔnɛ oi-aa ti o gii bíí lɛŋ!»

¹⁵Mɛ̀ nɔ́ nɛ́ yi kɔ̧ kpánà kɔ-mɛ, in wan nɛ gbo nɛ kɔ̧ gɔna-yì kɔ-mɛ.

¹⁶Ká o gɔna-yì kɔ-mɛ fok si zan na, in ká o foka-yì kɔ-mɛ nɛ si mgbara kira na mbɛt.

¹⁷Wa a̧ ya wen mɛ ɛ̀nɛ̀ mɛ ɓɛɛ, nɛ̀ bó nɛ́ wen o gɔni bíí mbɛt na!

¹⁸Mɛ̀ kpá desee in kóò kɔ-mɛ, mɛ̀ dúk nɛ de-a in ko-gbɛ̧-naŋ kɔ-mɛ!

¹⁹Yaa-ger-kɔɗɛ kɔ-mɛ, zɔŋa-zambɛrɛ; ká wɔ tɛ-a busi tɛ-mɛ na ɓɔnsɛnɛ, wɔ-a a̧ gbɛ mɛ hee dɔ̧ɔ̧ ga.

²⁰Bem kɔ‘m, ká wɔ gɔni okoo gbɛ mɛ na, ká mɛ́ tam ber gɔni okoo na mbɛt,

²¹wen yí GASA WAN ɓɔn tɛ naŋanɔ ko bíí lɛŋ; a̧ zɔk nɛ o yuwar kɔ-wa lɛŋ.

²²Ɗaŋmɔ ko wi-ɗaŋ tɛ pi̧ a̧ tɛ pɛ́r, o nyak ɗaŋmɔ kɔ̧-a̧ tɛ hɛr a̧.

²³A̧ tɛ fe fio-ŋgazu, gba mgbélé kɔ̧-a̧ tɛ yɔ a̧.