Read Northwest Gbaya O TUA-WEN 6 Bible Online

O TUA-WEN 6 - Northwest Gbaya bible

O TUA-WEN 6

¹Bem kɔ‘m, kà mɛ̀ nɛ́ baa er[2] in ŋma bíí e nɛ ziŋina oi nu ŋma-mɛ,

²kà wen mɛ nú-mɛ nɛ pi̧i̧ mɛ tɛ yɔk, kà wen mɛ nú-mɛ nɛ baa mɛ pi̧ yi pɛ́r,

³mɔ nɛ mɛ tɛ de ha̧ wen mɛ yu zu mɛ nɛ mɔ'ɔ. Bem kɔ‘m, hee mɔ'ɔ nɛ mɛ tika kɔ̧ er ŋma-mɛ kaɗi ga, mɛ nɛ tɛ a̧, mɛ̀ nɛ́ɛ̀ áí nú ha̧ a̧ nɛ kpasa-a.

⁴Ká mɛ́ é ha̧ ya hɔ yí-mɛ na, ká mɛ́ ɓur ndàrá-yi-mɛ na mbɛt;

⁵mɛ̀ kpɔ̧́í̧ pɛ́r yinɛ tɛ-mɛ hee mɔ'ɔ nɛ kɔɗɛ de nɛnɛ'ɛ ga, hee mɔ'ɔ nɛ nɔí̧ kpɔ̧i̧ nɛ bolo-pɛr yínɛ́'ɛ ga.

⁶Wi-tɛɛri’ɛ, mɛ̀ zɔ́k gba-mii; mɛ̀ zɔ́k tom kɔ̧-a̧ ɓɛɛ kɔ̧ zaŋ-mɛ a̧ gɔn.

⁷A̧ bó nɛ̀ wi-pɛm-a, kóó bíí nɛ duk zu a̧, kóó wan-tom kɔ̧-a̧ na;

⁸tɛ ŋgimbi-a ɓɛɛ a̧ mɔi̧ nɛ nyɔnɔ kɔ̧-a̧ e ŋgɔn; tɛ ŋgimbi-mɔi̧a-nyɔnɔ, ɓɛɛ a̧ mɔi̧a nyɔŋmɔ kɔ̧-a̧ e.

⁹Wi-tɛɛri’ɛ, mɛ tɛ ɔ nu hɔ ge ŋgimbi ge? Mɛ tɛ tun tɛ ya kɔ-mɛ mɛ gese ge?

¹⁰Kana nɛ be ɔɔ ya, kana nɛ be zura ya, kana nɛ mɔi̧a er nyafi nɛ tɛ:

¹¹san tɛ ba mɛ hee wi-zɔk-oi-mɔ ga, kaɓa tɛ ba mɛ hee wi-kɔfi-mɔ ga.

¹²Wi nɛ̀ nɛ́ nɔ nɛ ndela ká nú nɛ́ wi-de-gba̧a̧-mɔ na, a̧ nɛ wi-de-ɗaŋmɔ;

¹³a̧ pi̧ nɛ yi-a, a̧ sɔr nɛ naŋ-a, aŋ nɛ er-a.

¹⁴Ɗaŋmɔ a̧a̧ kɔ̧ see-aa, a̧ e nɛ zu mɔ wen dee ɗaŋmɔ ŋgimbi lɛŋ, a̧ dak nɛ kpɛri pi̧ nu.

¹⁵Nɛ hegɔ sa kpaa sɔn-tɛ kɔ̧-a̧ tɛ duk hee gɔma-yí ga, a̧ tɛ fe hee gɔma-yí ga, ŋma mɔɔ-gbak-a bo na.

¹⁶Mɔ mɔɔrɔ-ɗoŋ-kpɔk a̧a̧ sɛnɛ nɛ GASA WAN sɛna: zɔkamɔ-gɔ-tɛ, leɓe-de-ndela, o er gbai tɔk-tɛ wi-de-ɗaŋmɔ-na a nu, see nɛ ba nɛ keta-ɗaŋmɔ, o naŋ-kpan-nɔ sitɛ ɗaŋmɔ, wi-de-sedaako nɛ ndela; ɓɛɛ mɔɔrɔ-ɗoŋ-yiitoo-aa a̧a̧ sɛnɛ mbɛt: mɛ̀ nɛ́ wi-ruŋgu nɛ dak kpɛri pi̧ mgbara o nya-a̧.

²⁰Bem kɔ‘m, mɛ̀ kásí o geŋa ko dáà kɔ-mɛ, ɓɛɛ ká mɛ́ e usamɔ ko naa kɔ-mɛ tɛ geemɔ na.

²¹Mɛ̀ é ha̧ wa duk kɔ̧ see-mɛ ɓɔnsɛnɛ, mɛ̀ kpó wa ger-mɛ.

²²Wa tɛ mgbɔ mɛ nɛnɛ fara yari kɔ-mɛ; ŋgimbi ɔɔ ya kɔ-mɛ, wa tɛ pɛm mɛ, ɓɛɛ kà mɛ be tɛɛ tun, wa tɛ tɔ̧ nyɛrɛ in mɛɛ.

²³Wen geŋa nɛ́ lamba, usamɔ nɛ́ sa̧a̧mɔ, ɓɛɛ o mbɔrɔ nɛ́ yuwar-kpasa-a;

²⁴wa tɛ dor mɛ tɛ yuwar ko ɗaŋ okoo, in tɛ ɔ̧ɔ̧ nyɔ̧ɔ̧ wen ko gɔni okoo.

²⁵Ká mɛ́ pɛm nɛ déè kɔ̧-a̧ na, ká mɛ́ pɛm nɛ zɔkamɔ-ɔr-wi kɔ̧-a̧ na mbɛt,

²⁶wen ŋgonda brɛt, ɓɛɛ nyɛma kɔ‘i wen kó-de-mɔ nɛ mbɔɗɔnu; ɓɛɛ baa kóò-wàn-wíì nɛ̀ dàlà nɛ́ gbɛɛ tɛ nɛ gbaayí.

²⁷Wi nyɛma so mɛ hu̧si wee ɗɔɔ laa, ká laa bíí wee na nde?

²⁸Wi nyɛma so mɛ nɛ nɔ zu kɛ̧i̧-wee, ká wee dɔ naŋ-wi na nde?

²⁹Nɛ́ hegɔ a̧ wi-ndak-ɗoŋ kóò ko sɛm kɔ‘i duk nɛnɛ; wi nɛ pi̧ tɛ sɛnɛ beka gbo gee na.

³⁰Wi e wi-zuzu tɛ geemɔ tɛ mɔ n'aa zu̧a̧ mɛ nyɔŋ wen wɔ kɔ̧-a̧ na.

³¹Ɓɛɛ kà wa nɛ baa a̧, a̧ tɛ yoɓi mɔ war mɔɔrɔ-ɗoŋ-yiitoo; a̧ tɛ ha̧ mɔɔ kɔ̧ tua kɔ̧-a̧ lɛŋ.

³²Ɓɛɛ wi nɛ ba kóò-wàn-wíì nɛ̀ dàlà bó nɛ̀ zu na; mɛ nɛ wi nɛ kɔ̧ɔ̧ mɛ yɔ tɛ a̧ de mɔ hegɔ.

³³A̧ tɛ kpa bɔnɛ oi ɗaŋmɔ, ziimɔ tɛ ba a̧, ɓɛɛ mɔɔ-búù kɔ̧-a̧ beka bi na,

³⁴wen gɔya pi̧ nɛ dawa zu wiwii, ɓɛɛ ko bo yí-a wese kifa-er na.

³⁵Wen kɔ̧-a̧ bó tɛ yoɓa mɔ na; ha̧a̧mɔ kɔ-mɛ nɛ dɔka-a'i beka de ŋma mɔ tɛ-a na.