Read Northwest Gbaya O TUA-WEN 7 Bible Online

O TUA-WEN 7 - Northwest Gbaya bible

O TUA-WEN 7

¹Bem kɔ‘m, mɛ̀ kásí wen kɔ‘m, o geŋa kɔ‘m a̧ duk nɛ mbɔi kɔ-mɛ.

²Mɛ́ nɛ́ kɔ̧ɔ̧ mɛ́ kpasi, mɛ̀ kásí o geŋa kɔ‘m, o usamɔ kɔ‘m hee tu̧ gbaayí-mɛ ga.

³Mɛ̀ kásí wa nɔ er-mɛ, mɛ̀ bá wa e kɔ̧ see-mɛ.

⁴Mɛ̀ tɔ̧́ ha̧ iŋa-mgbara-mɔ‘e: «Mɛ́ nɛ́ boko-nya'm.» Ɓɛɛ mɛ sa iŋamɔ‘e, nam kɔ-mɛ,

⁵wen ha̧ a̧ mɛ dor mɛ tɛ kó-dàlà, in gaia mɛ wen gɔni okoo-ɔr-wi nɛ̀ ɔ̧ɔ̧ nyɔ̧ɔ̧ wen.

⁶Ŋma wese, mi duka so nú woi-tua kɔ‘m kɛ̧i̧ nɛ mɔ nɛ mgbara fana boi,

⁷ɓɛɛ mi kɔɓi ŋma mgbélé ŋgaiwi. Mi mbaɗa ŋma be-ŋgaiwi mgbara o dɔka-a, nɛ̀ bó nɛ̀ kpasa taamɔ na;

⁸a̧ ɓira nɛ̀ yuwar ká̧ fara ko koo'i nɛ́ nɛnɛ si tɛ kɔ̧-a̧.

⁹Duka nɛ mɛ ga̧a̧mɔ ŋgimbi nɛ wese ye nɛnɛ ɓɛɛ ká mɔ dee nɛnɛ ndiyiŋ'ɛ,

¹⁰ɓɛɛ nɛ mɔ'ɔ nɛ kóò‘i wee ti a̧ tɛnɛ, hee ŋma gɔna-kɔ̧-zaŋ be zɔŋa-duk-gee ga.

¹¹A̧ a̧a̧ nɛ gɔna-yí, a̧ yu bíí na; a̧ duk kɔ̧ tua kɔ̧-a̧ na:

¹²kinii a̧ a̧a̧ yuwar, kinii a̧ a̧a̧ bee-gara pɛm nɛ mɔ dam mgbii mɔ lɛŋ.

¹³Nɛ mɔ'ɔ n'aa tika ger be-ŋgaiwi'i hɛr nɛ a̧, ɓɛɛ hee mɔ'ɔ nɛ foe bo yí-a na ga, a̧ tɔ̧ɔ̧ ha̧ a̧:

¹⁴«Mi ha̧a̧ so nú mɛ́ ɗafi sɔ̧ de nɛ osoko, nɛ mɔ'ɔ nɛ ha̧a̧nú kɔ‘m hɔɔ gba̧a̧ sɔsɔɔ.

¹⁵Nɛ mɔ‘i sa'm we ti mɛ tɛnɛ mɛ kii mɛ, nɛ mɔ'ɔ n'am kpaa mɛ'ɛ.

¹⁶Mi ɗafa gado kɔ‘m nɛ borgo, mi tata de zɔ̧-laa Egiptɛ yí a,

¹⁷mi misa̧ de yí-nyama in o ŋma de pɛr nyama[3] gɔn gado kɔ‘m.

¹⁸Mɛ̀ tɛ́ ɛ̀ɛ̀ dé wɔ tɛ ŋmaa hegɔ mɔ sa̧ nɛnɛ! Ɛ̀ɛ̀ dé nyɛŋɛ tɛ ŋmaa,

¹⁹wen wíì kɔ‘m bo kɔ̧ tua na, a̧ yaka ŋma nyɛi̧a nɔ.

²⁰A̧ baa ŋgoɓo sede kɔ̧-a̧ yak nɛnɛ, ɓɛɛ a̧ tɛ pii sɛn tɛ mbe yí-zɛ.»

²¹Kóò‘i ɔra a̧ nɛ de wen; a̧ ɔra a̧ nɛ de nyɔ̧ɔ̧ wen mɛ ndara nú-a,

²²ɓɛɛ be-ŋgaiwi'i ndak ɗoŋ-aa, hee mɔ'ɔ nɛ ndai nɛ nɛnɛ si fara-gɔn ger-a’ɛ ga, hee ŋma mgbelewi a̧ wa hɛr mɛ gusi ga,

²³hɔ ŋgimbi nɛ gba̧a̧ goo tɛ tok see-aa sar; a̧ duk hee nɔ̧́í̧ nɛ tik yí yɔk’ɛ ga, a̧ iŋ‘e nɛ́ fio kɔ̧-a̧ a̧ a̧ kii na.

²⁴Kinii, o bem kɔ‘m, ɛ̀nɛ̀ zíí wen kɔ‘m, ɛ̀nɛ̀ yéŋ zer'nɛ́ tɛ wen nɛ tɛ gbo nɛ nú‘m.

²⁵Ká see-mɛ ba yuwar ko pɛrti kóò‘i na, ká mɛ a̧r mɛ nɛ ɗoŋ-aa na,

²⁶wen a̧ dee ha̧ bíí nɛ dɔka-a mɛ ba da̧i̧ ɓɛɛ tik; a̧ kuma o ŋga bíí nɛ dɔka-a.

²⁷Tua kɔ̧-a̧ nɛ́ yuwar fio, nɛ zir si kɔ̧ ɗɔŋgɔ ko o fio mɛ.