Read Northwest Gbaya O TUA-WEN 8 Bible Online

O TUA-WEN 8 - Northwest Gbaya bible

O TUA-WEN 8

¹Bó nɛ́ Iŋa-mgbara-mɔ sa nɛ sara, in iŋamɔ tɔ̧ nɛ wen nɛ hee ger mbɛt na nde?

²Sɛn zu kaya nɛ kusa gan zu yuwar in sɛn sasa-war a̧ Iŋa-mgbara-mɔ yor sɛnɛ, hee mɛ nɛ okoo ga.

³Sɛn ká̧ nu garo ye, in nɛ ɗoŋ kpar-nú tua garo ye'i a̧ a̧ yor sɛnɛ sa nɛ mɔ‘e:

⁴«O ŋgaŋa bíí, nɛ́ ɛnɛ a̧‘m sa, mi hiɗi nɛ mɔ sa nɛ o bíí.[4]

⁵O wi nɛ kɔ̧ zaŋ gɔn na, ɛ̀nɛ̀ yámbí taa mɔ, o wi nɛ̀ bó nɛ̀ kpasa taamɔ na, ɛ̀nɛ̀ yámbí kɛ̧ɛ̧-mgbara-mɔ.

⁶Ɛ̀nɛ̀ yéŋ zer'nɛ́ wen mi a̧a̧ nɛ gasamɔ mɛ tɔ̧ h’ɛ́nɛ́, wen mɛ ndàrá-nú‘m nɛ́ demɔ nyɛmna.

⁷Nú‘m tɔ̧ nɛ kpasawen, wen ɗaŋ nɛ ndiŋmɔ nyɛmna wen ndara nú‘m.

⁸Wen nɛ̀ gbo nɛ nú‘m lɛŋ duk nɛ yuwar-a, ŋma yɔɔ-mɔ koo ŋma gɔɔmɔ bo sɛnɛ kpɔk na.

⁹Wa ɔ sa̧a̧ wen wi nɛ zii mgbara mɔ, in zia mgbara wa duk yɛkɛɗɛ wen wi nɛ kpaa iŋamɔ.

¹⁰Ɛ̀nɛ̀ kpɛ́k usamɔ kɔ‘m gan bu-mbɔi in ɛ̀nɛ̀ kpɛk iŋamɔ gan sa̧a̧ lɔr.

¹¹Wen Iŋa-mgbara-mɔ dee gan de kísí, a̧ gana o mɔ lɛŋ nɛ‘i kɔ̧a̧.»

¹²«Mi nɛ Iŋa-mgbara-mɔ, tua kɔ‘m nɛ fara iŋ kɛ̧ɛ̧-mgbara-mɔ, in mi iŋa yuwar deemɔ.

¹³Yuu kíí GASA WAN nɛ́ sɛna ɗaŋmɔ: ŋmaŋa-tɛ, tɔ̧ɔ̧ ɗaŋ wen, baa ɗaŋ yuwar in tɔ̧ɔ̧ ɗaŋ nú-wen nɛ o mɔ n'am sɛn.

¹⁴Tɔ̧ɔ̧ mbɔrɔ in kpaa yi-mɔ, nɛ mɔ kɔ‘m; iŋamɔ in ŋgai nɛ mɔ kɔ‘m!

¹⁵Nɛ́ wen zu'm sa o wannu ɔ wan, ɓɛɛ o be-wan gɔn kita nɛ yuwar-a.

¹⁶Nɛ́ wen zu'm sa o wanye ɔ wan, ɓɛɛ o gasawi zu nu lɛŋ nɛ o wi-gɔn-kita nɛ yuwar-a.

¹⁷Kɔ‘m, mi kɔ̧ɔ̧ o wi nɛ kɔ̧‘m, ɓɛɛ o wi nɛ kii am tɛ kpa'm.

¹⁸Kpaa mbɔi in duka-a tɛ bɔtɛ, kpaamɔ ɗoŋ-aa nyɛi̧ in kpaa yi-mɔ mbɛt a̧a̧ er-am.

¹⁹Waya-mɔ kɔ‘m gana lɔr, gana de sa̧a̧ lɔr; ha̧a̧mɔ kɔ‘m gana sa̧a̧ bu-mbɔi.

²⁰Mi nɛ nɔ tɛ yuwar deemɔ nɛ yuwar-a, in tɛ yuwar demɔ.

²¹Mi ha̧ nɛ mɔ ha̧ o bíí nɛ̀ kɔ̧‘m, mi dun nɛ ŋgoɓo kɔ-wa nɛ o mbɔi.

²²«GASA WAN dea'm nɛti ha̧ dɔka mɔ lɛŋ, in nɛti ha̧ o kuti o deemɔ kɔ̧-a̧.

²³Tɛ ku̧u̧naŋ fara ɓeemɛ nɛti ha̧ a̧ mɛ de nu, a̧ ea'm.

²⁴Nɛti ha̧ a̧ mɛ de o gba ɗuka-fara, in o fara nɛ yi fok gbo nɛnɛ, wa koo so'm kaɗi.

²⁵Mi a̧a̧ so sɛnɛ ɓeemɛ nɛti ha̧ GASA WAN mɛ de o kaya in o zu-tɔ̧́;

²⁶in nɛti ha̧ a̧ mɛ de nu in o yiwese, gu nɛ o mɔɔ-tɛ nu lɛŋ.

²⁷Ŋgimbi ɗáfá yiwese, ŋgimbi n'aa yɔra nɛ kirkiti-mɔ zu gba ɗuka-fara, mi a̧a̧ so sɛnɛ.

²⁸Ŋgimbi n'aa aa nɛ o tura-zan yiwese, in nɛ o kpút-kpút ɗɔɔ ɗuka-fara gboo nɛnɛ, ká‘m a̧a̧ sɛnɛ mbɛt.

²⁹Ŋgimbi n'aa kpee nɛ gba tɔp, wen ká yi tɛɛ daŋ gan nu ŋgere-a, in ŋgimbi n'aa dee nɛ gun-nù, mi a̧a̧ sɛnɛ lɛŋ.

³⁰Mi duka so de nɛ tom katɛ a̧, ha̧ nɛ desee ha̧ a̧ wese lɛŋ, ɓɛɛ mi duk de nɛ saa katɛ a̧.

³¹Mi dee so saa zu nu kɔ̧-a̧ mbɛt, ɓɛɛ desee kɔ‘m so nɛ duka-a mgbara o bíí.»

³²«Ɓɛɛ kinii, o bem, ɛ̀nɛ̀ zíí wen kɔ‘m; o wi nɛ ba yuwar kɔ‘m duk nɛ desee.

³³Ɛ̀nɛ̀ zíí usamɔ ha̧ kɔ̧ zaŋ‘nɛ́ mɛ gɔn; k’ɛ́nɛ́ e tɛ geemɔ na.

³⁴Bíí nɛ̀ zii wen kɔ‘m, nɛ̀ pɛm nu tua kɔ‘m wese lɛŋ, nɛ̀ pɛm dadaa nu tua kɔ‘m duk nɛ desee,

³⁵wen wi nɛ kpaa'm, kpaa de duka-a, a̧ kpaa deako ko GASA WAN mbɛt.

³⁶Ɓɛɛ wi nɛ tu̧ see-am, e nɛ da̧i̧ sɛn tɛ siɗoŋ woyo; o wi nɛ sɛn am lɛŋ kɔ̧ɔ̧ nɛ fio.»