Read Northwest Gbaya EKLEZIASTƐ 5 Bible Online

EKLEZIASTƐ 5 - Northwest Gbaya bible

EKLEZIASTƐ 5

¹Ká mɛ nak tɛ-mɛ tɔ̧ nɛ wen na. Ká see-mɛ yak ti tɔ̧ nɛ ŋma wen ha̧ Sɔ̧ na, wen Sɔ̧ a̧a̧ kɔ‘i yiwese, ɓɛɛ mɛ a̧a̧ kɔ-mɛ mbɔɗɔnu; ká mɛ dɔk wen na.

²Kà taamɔ dɔk zu-wi nyɛmna, ɓɛɛ wi ɔɔ ɗaŋ zu; ka'i bur wen nɛ dɔka-a, ɓan na wi tɔ̧ɔ̧ wen hee wi nɛ̀ bó nɛ̀ kpasa taamɔ na ga kaɗi.

³Kà mɛ̀ há̧ nú-mɛ ha̧ Sɔ̧, mɛ̀ dé ha̧ mɔ‘i mɛ hɔ gba̧a̧ nɛ haya-a, wen wí dé ko ha̧ o wi nɛ̀ bó nɛ̀ kpasa taamɔ na, na. Kà mɛ̀ há̧ nú mɛ, mɛ̀ dé mɔ‘i hɔ gba̧a̧.

⁴Gana so ká mɛ ha̧ nú-mɛ́ na gan ha̧ mɛ mɛ hà̧ nú-mɛ́ ɓɛɛ mɛ de mɔ-aa hɔ gba̧a̧ na.

⁵Ká mɛ e ha̧ nú-mɛ mɛ ba kiitɛ-mɛ nɛ oi-aa pi̧ tɛ ɗaŋmɔ na, in ká mɛ tɔ̧ ha̧ betom ko Sɔ̧ ndé, wii yɔɔ kaya tɛ mɔ nɛ‘i dea'i na mbɛt. Wen ge sa mɛ de ha̧ see Sɔ̧ mɛ nyim tɛ wen kɔ-mɛ ha̧ a̧ mɛ ɗaŋ tom kɔ-mɛ ge?

⁶Dɔka ɔɔ-zu yak ŋmaa in geemɔ na, ɓɛɛ bura-wen nɛ́ geemɔ mbɛt. Mɛ nɛ wen hegɔ mɛ̀ yú kíí Sɔ̧.

⁷Kà mɛ zɔk ndé, wa de nɛ bɔnɛ in wi-kɔsa sɛn tɛ zika-nù, kà mɛ nɛ zɔka ndé gbina heembea in deemɔ nɛ yuwar-a na a̧a̧ sɛnɛ, ká ɗɛɗɛ-mɛ gɔn na, wen gasawi a̧a̧ nɛ gasawi kɔ‘i mɛ ye ɗoŋ wi, ɓɛɛ gasawi kɔ̧-a̧‘i a̧a̧ nɛ o gasawi kɔ‘i mbɛt.

⁸Nù ha̧ mɔ ha̧ bíí lɛŋ, ɓɛɛ wannu mbɛt kpa duka-a kɔ‘i wen zu nyɔnɔ.

⁹Wi nɛ kɔ̧ɔ̧ sede nyɛmna kpa sede dɔk yí-a na; wi nɛ kɔ̧ɔ̧ demɔ nyɛmna, demɔ nyɛm yí-a na; mɔ‘i nɛ́ geemɔ mbɛt.

¹⁰Kà demɔ dɔk nyɛmna, wi nyɔŋa-a ɔ dɔka nyɛmna mbɛt, ɓɛɛ wan-aa tɛ kpa nɛ ge sɛnɛ ge? Kɔ̧-a̧ kana nɛ zɔka-a nɛ yí ɓɛɛ.

¹¹Wi-de-tom ɔ kana kɔ‘i ya nɛ de-a, kóó a̧ nyɔŋa mɔ tikiɗi, kóó a̧ nyɔŋa mɔ nɛ dɔka-a mbɛt. Ɓɛɛ sura-zaŋ ko wanmbɔi de ha̧ a̧ mɛ ɔ ya na.

¹²Ŋma gasa ɗaŋmɔ n'am zɔka mbɔɗɔnu’ɛ nɛ mɔ'ɔ: mbɔi nɛ wan-aa mɔi̧ e, nɛ́ wen dee ɗaŋmɔ in tɛ-a nɛ tɛ-a.

¹³Mbɔi ɗaŋ tɛ geemɔ; kà wan-aa nɛ koo bem, ɓɛɛ ŋma mɔ n'aa tɛ e ha̧ bem kɔ̧-a̧‘i bo na.

¹⁴Hee mɔ'ɔ nɛ wa koo a̧ nɛ mgbii ga, a̧ tɛ si kana nɛ mgbii; a̧ ba géé ŋma mɔ er-a oi tom kɔ̧-a̧ n'aa dee so'i na kóó tikiɗi.

¹⁵Mɔ‘i nɛ́ ŋma gasa ɗaŋ mɔɔ-ba-tɛ-wi: wi’ɛi tɛ si ɗoŋ hee mɔ'ɔ n'aa tɛɛ so kana nɛnɛ ga. Ŋma mɔ n'aa kpaa oi dee tom hee ndaka ɗoŋ búk ga nɛ́ ge?

¹⁶Tɛ duka-a kɔ̧-a̧ zaŋnu, a̧ duk ti-tum, dita-see in gɔna-ɗɛɗɛ, bá nɛ̀ nyimsea duna kɔ̧ see-aa.

¹⁷Kɔ‘m, mɔ n'am zɔka nɛ duk nɛ de-a nɛ mɔ'ɔ: nɛ́ nyɔŋa mɔ in nɔɔ mɔ bá nɛ̀ kpaa desee zu tom nɛ‘i de ɗɔɔ yiwese’ɛ, wen war mɔ nɛ Sɔ̧ ha̧a̧ ha̧ bíí ŋgimbi nɛ‘i biti duk kpasa nɛ́ mɔ‘i.

¹⁸Ɓɛɛ kà Sɔ̧ ha̧ demɔ in kpaamɔ ha̧ ŋma bíí, ɓɛɛ kà wi’ɛi nɛ́ kpaa desee sɛnɛ, kà à nɛ́ kpaa desee tɛ tom kɔ̧-a̧ mbɛt, mɔ‘i lɛŋ nɛ́ ha̧a̧mɔ ko Sɔ̧.

¹⁹Tɛ ŋgimbi n'aa duk tɛ desee nɛ Sɔ̧ ha̧a̧ ha̧ a̧, a̧ ta mɔ tɛ zɛ duka-a kɔ̧-a̧ na.