Read Northwest Gbaya EKLEZIASTƐ 6 Bible Online

EKLEZIASTƐ 6 - Northwest Gbaya bible

EKLEZIASTƐ 6

¹Ŋma ɗaŋmɔ a̧a̧ sɛnɛ ɗɔɔ yiwese’ɛ n'am zɔka nɛ ɔ gasa nyɛmna wen bíí lɛŋ.

²Ŋma bíí a̧a̧ sɛnɛ nɛ Sɔ̧ ha̧ nɛ gasa kpaamɔ in mbɔi bá nɛ̀ zɔnamɔ ha̧ a̧; ŋma mɔ nɛ wi’ɛi tɛ ak woyo bo na, ɓɛɛ Sɔ̧ e ha̧ a̧ mɛ nyɔŋ mɔɔ nɔ‘i na; nɛ́ ŋma gɔni bíí a̧ tɛ nyɔŋ nyɔŋa-a. Ŋma geemɔ in ŋma ŋga bɔnɛ nɛ́ mɔ‘i mbɛt.

³Kóó kà ŋma bíí a̧ bòó nɛ̀ bem gɔmŋmaa, kà wi’ɛi nɛ́ sɔka nyɛmna, ɓɛɛ kà a̧ kpa desee tɛ mɔ kɔ̧-a̧ na, kà fara-gun-a̧ bo na mbɛt, mi tɔ̧ɔ̧ ndé, ŋma hɔɔ-bem gana wi’ɛi.

⁴Wen ŋma gba̧a̧ mɔ nɛ hɔɔ-bem tɛɛ wen-aa bo na; a̧ sii ɗoŋ ti-tum, nin-a ɓɔna kana ti-tum mbɛt.

⁵A̧ iŋ wese na, a̧ zɔk géé zɔka-a na, ɓɛɛ a̧ gana kana ɓii bíí nɛ ɔma-tɛ.

⁶Kóó wi’ɛi dee pɛ booro-yiitoo, a̧ beka duk so tɛ bɔtɛ na, ɓɛɛ bó nɛ́ a̧ in hɔɔ-bem mbɛt nɛ si kpɔk fara na nde?

⁷Tom nɛ bíí de, a̧ de kana mɛ kpa nyɔŋmɔ, ɓɛɛ wɔ kaɗi kɔ‘i na.

⁸Nɛ́ ge a̧ wi-iŋ-mgbara-mɔ gana nɛ wi nɛ̀ bó nɛ̀ kpasa taamɔ na ge? Nɛ́ ge a̧ wisan nɛ iŋa dee mɔ gbak nɛ̀ tɛ-wi kpa tɛ duka-kpasa ge?

⁹Zɔkamɔ nɛ yi gana ndaka ɗoŋ o wɔ-mɔ kɔ‘i. Mɔɔ nɔ‘i nɛ́ geemɔ, nɛ́ géé ndaka ɗoŋ búk sɔɔ géè.

¹⁰Mɔ nɛ duka so kaɗi, nin-a a̧a̧ sɛnɛ; ɛɛ iŋa mɔ nɛ‘i sa'e bíí. A̧ nyɛm mɛ de wen in wi nɛ ŋgaya gan a̧ na.

¹¹Kà wen dɔk, geemɔ dɔka mbɛt; nɛ ge a̧ bíí tɛ kpa gan zu mɔ‘i ge?

¹²O'o iŋa mɔ nɛ duk nɛ de-a wen bíí ŋgimbi duka-a kɔ̧-a̧ nɛ ɗoŋ-aa nyɛi̧ na'i o? Mɛ nɛ ŋma duka-a nɛ yak hee gi̧ɔ̧ ga. Hee ge bíí tɛ iŋ mɔ nɛ tɛ yak oi-aa ŋgimbi n'aa fea kaɗi ge?