Read Northwest Gbaya EKLEZIASTƐ 8 Bible Online

EKLEZIASTƐ 8 - Northwest Gbaya bible

EKLEZIASTƐ 8

¹Nɛ́ o a̧ hɔɔ ŋmaa in wi-iŋ-mgbara-mɔ o? Wi nɛ nyɛma mɛ we ɗoŋ wen nɛ tɔ̧ɔ̧‘e: «Nɛ́ iŋa-mgbara-mɔ a̧ de ha̧ sɔnti-wi mɛ tok, ɓɛɛ dee ha̧ sɔnti-a nɛ kaia so'i mɛ kpai mbɛt,» wó‘i, nɛ́ o?

²Mi tɔ̧ ha̧ mɛ ndé, mɛ̀ kásí ha̧a̧nú ko wannu wen mɛ̀ nɛ́ Sɔ̧ a̧ ee a̧ tɛ wan.

³Ká mɛ gbin heembea kɔ̧-a̧ géè na; ká mɛ de ŋgazu tɛ ŋma mɔ nɛ de tɛ-a na, na, wen wannu nyɛma mɛ de mɔ lɛŋ n'aa kɔ̧a̧.

⁴Wen ko wannu ɔ ŋgaya; nɛ́ o'o tɛ ak a̧‘e: «Mɛ de nɛ ge nde,» o?

⁵Ŋgamɔ beka kpa wi nɛ kasi heembea na; wi-iŋ-mgbara-mɔ iŋa ndé, ŋgimbi in gɔna-kita tɛ hɔ.

⁶Ŋgimbi in gɔna-kita a̧a̧ sɛnɛ wen mɔ lɛŋ, ɓɛɛ gasa bɔnɛ a̧a̧ sɛnɛ wen bíí.

⁷Bíí iŋ mɔ nɛ tɛ hɔ na. Nɛ́ o'o tɛ tɔ̧ ŋgimbi nɛ ŋma mɔ tɛ hɔ nɛnɛ‘i ha̧ a̧ o?

⁸Ŋma bíí nɛ a̧a̧ nɛ ŋgai zu ɔmi duka-kpasa mɛ dor a̧ bo na. Ŋma bíí kpɔk ɔ wan zu wese-fio na mbɛt. Kà biro tik, ŋma mɔ nɛ tɛ kpasi wi bo na, ɓɛɛ ɗaŋ beka kpasi wi-ɗaŋ na mbɛt.

⁹Mi zɔka mɔ nɛ yak ɗɔɔ yiwese’ɛ lɛŋ; mi zɔka hee mɔ'ɔ nɛ bíí kpa nɛ ŋgai zu ŋma-wi ɓɛɛ usa nɛ bɔnɛ ha̧ ɓii bíí ga;

¹⁰mi zɔka wi-ɗaŋ nɛ wa gɔ si fara-gun-fio, ɓɛɛ o bíí gbo nɛ̀ kɔ̧ sa̧a̧-fara mɛ nɛ̀ɛ́ zɔn wa saaye wen mɔ nɛ wa dea so.[3] Mɔ‘i nɛ́ geemɔ mbɛt.

¹¹Hee mɔ'ɔ nɛ Sɔ̧ gɔn kita zu ɗaŋmɔ nɛ haya-a ga na, see o bezaŋ Adam duna nɛ ɗaŋmɔ.

¹²Wi-de-ɗaŋmɔ nɛ dee ɗaŋmɔ war gɔmŋmaa biti kana kɔ‘i duka kpasa. Ɓɛɛ mi iŋa kana mbɛt'e: «Nɛ́ wi nɛ yu kíí Sɔ̧ a̧ tɛ kpa demɔ wen yuu Sɔ̧ n'aa yu'i,

¹³ɓɛɛ wi-ɗaŋ beka kpa demɔ na; a̧ beka duk siti na, ɓɛɛ duka-a kɔ̧-a̧ zaŋnu’ɛ duk hee gi̧ɔ̧ ga, wen a̧ yu Sɔ̧ na.»

¹⁴Ɓɛɛ ŋma geemɔ a̧a̧ zaŋnu’ɛ woyo mbɛt: mɔɔ-oi-tom ko wi-ɗaŋ tika zu wi-de-mɔ nɛ yuwar-a, ɓɛɛ mɔɔ-oi-tom ko o wi-de-mɔ nɛ yuwar-a, nɛ o ɗaŋ bíí a̧ kai. Mi tɔ̧ɔ̧ kaɗi, mɔ‘i nɛ́ geemɔ mbɛt.

¹⁵Nɛ́ desee a̧‘m zɔn kinii, wen ŋma demɔ ko bíí zaŋnu’ɛ nɛ gana nyɔŋa mɔ in nɔɔ mɔ ká bá nɛ̀ dee saa, bo na. Mɛ̀ nɛ́ mɔɔ nɔ‘i a̧ tɛ gbak bíí tɛ tom kɔ‘i tɛ ŋgimbi nɛ Sɔ̧ ha̧a̧ ha̧ a̧ n'aa biti duk kpasa sɛn ɗɔɔ yiwese’ɛ.

¹⁶Ŋgimbi n'am ee see-am tɛ kia iŋa-mgbara-mɔ, mi zɔka tom nɛ o bíí de zu nu’ɛ, mi zɔka ndé, o bíí ɔm tɛ na, kóó mɛ wese, kóó mɛ zɛ mbɛt.

¹⁷Mi zɔka tom ko Sɔ̧ lɛŋ mbɛt; nɛ mbetɛ bíí beka kpa ndaa mɔ nɛ yak sɛn ɗɔɔ yiwese’ɛ na; kóó bíí kia mɔ mɛ iŋ ndaa-a, wa tɛ kii takaɗi. Kóó wi-iŋ-mgbara-mɔ tɔ̧a̧‘e, wi iŋa wó, a̧ beka iŋ ndaa-a na.