Read Northwest Gbaya GIMA KO SALOMƆŊ 1 Bible Online

GIMA KO SALOMƆŊ 1 - Northwest Gbaya bible

GIMA KO SALOMƆŊ 1

¹Ɛ̧ɛ̧ nɛ gba de ɔ̧ɔ̧ nyɔ̧ɔ̧ gima ko Salomɔŋ nɛ gana o dɔka gima lɛŋ.

²Mɛ ɗɔ́ŋ pii ti mɛ dúí nú‘m! Mɛ tɛ́ɛ̀ hɛr am a'i, wɔ-mɛ gbɛa'm gan dɔ̧ɔ̧,

³gana gan de pɛr nɔ̧́-nyama nɛ mɛ sɔ̧a̧. Wɔ-mɛ gbɛ wi hee de pɛr nɔ̧́-nyama ga; nɛ mɔ‘i a̧ o be-zɔŋa tɛ gbɛ nɛ tɛ wen zu mɛ‘i!

⁴Mɛ kasi er-am, ɛɛ ma yi! Mɛ nɛ wannu kɔ‘m, mɛ mgbɔ‘m si kɔ̧ gɔna-bɛr-tua kɔ-mɛ h’ɛ́ɛ́ de tortɛ de nɛ nyɛŋɛ tɛ ŋmaa, ɛɛ yiitoo lɛŋ. Ɛɛ de tortɛ kɔ̧ɔ̧mɔ kɔ-mɛ nɛ gbɛ wi gan dɔ̧ɔ̧; nyɛma-a a̧ nyɛm na ɓɛɛ sa o be-zɔŋa tɛ gbɛ tɛ wen zu mɛ!

⁵O boko-be Jerusalɛm, kɔ‘m, ndàrá-tɛ‘m nɛ̀ tu̧-a̧, ɓɛɛ mi nɛ gba de be-zɔŋa; ndàrá-tɛ‘m ɔ ɓɔ́í̧ɔ̧m hee tua-laa ko o be Kedar ga, nɛ de-a hee laa-kpe-nú tua ko Salomɔŋ ga.

⁶K’ɛ́nɛ́ zɔk nɛ tu̧ tɛ‘m na, wen nɛ wese a̧ dɔɔ am. Nɛ o nya'm a̧ dee ha̧ tɛ‘m mɛ tu̧; wa ee am mɛ pɛm nyak-dɔ̧ɔ̧. Ɓɛɛ war nyak-dɔ̧ɔ̧ kɔ‘m mi pɛm na.

⁷Mɛ yaa-dua-see-am’ɛ, mɛ̀ tɔ̧́ ha̧‘m; mɛ tɛ dai o mɔ-dai kɔ-mɛ si dee? Mɛ tɛ a wa mɛ ɔm tɛ wese-see-zu’ɛ si dee? Mɛ tɛ dai o mɔ-dai kɔ-mɛ si dee? Wen ka'm tɛ̀ɛ́ yambali nɛ ɗoŋ o mɔ-dai ko o sɛm kɔ-mɛ.

⁸Daŋ-ká-wese-bia kɔ‘m, kà mɛ nɛ iŋa fara'i na, ɓɛɛ mɛ ɓa nɛ ɗoŋ o mɔ-dai nɛnɛ; mɛ kai o be gbadua kɔ-mɛ nɛnɛ ha̧ wa mɛ nyɔŋ mɔ ká̧ ɓoramɔ ko o wan-dai-mɔ.

⁹Sɛm kɔ‘m, tɛ zɔkamɔ kɔ‘m, mɛ duk hee gba de nyaŋa ko Faraɔŋ ga.

¹⁰Mɔɔ-a-zer-mɛ baa nɛ mɛ, mɛ yaa ger-ba-nɛ-kisi’ɛ.

¹¹Ɛɛ tɛ de kísí nɛ lɔr, a nɛ bu-mbɔi sɛn mgbara-a ha̧ mɛ.

¹²Ŋgimbi nɛ wannu kɔ‘m duk fara-nyɔŋ-mɔ kɔ‘i, ɓɛɛ de pɛr nɔ̧́-nyama kɔ‘m kura ɓisisi.

¹³Yaa-dua-see-am duk hee de dak nɔ̧́-nyama, nɛ ɔ mgbara ber-am ga.

¹⁴Yaa-dua-see-am'i hɔɔ ŋmaa in sikila do-te,[1] nɛ duk kpɛɛfɔ nyak-dɔ̧ɔ̧ ká̧ gɔna-yi Ɛn-Gedi.

¹⁵Daŋ-ká-wese-bia, yaa-wiyɛ kɔ‘m, mɛ yora zɔŋa batɛ! Zɔk gba de gɛɗa yí-mɛ wo!

¹⁶Yaa-dua-see-am’ɛ, mɛ mbɛt, yora ŋgaiwi kɔ-mɛ bo nɛ mɔɔ-tɔ̧-na; yara k’ɛɛ nɛ de ɓɔɔ wa̧a̧-te.

¹⁷O kpaakpee-tua k’ɛ́ɛ́ nɛ́ o gbaa-er gbatui, ɓɛɛ wi gɔn o babir-aa nɛ̀ o gbaa-dɛ̧ɛ̧.[2]