Read Northwest Gbaya GIMA KO SALOMƆŊ 4 Bible Online

GIMA KO SALOMƆŊ 4 - Northwest Gbaya bible

GIMA KO SALOMƆŊ 4

¹Daŋ-ká-wese-bia, yaa-wiyɛ kɔ‘m! Gbaayí-mɛ ɔ kàlàkùlɛ̀ɛ̀ ɗɔɔ laa-kpe yí-mɛ. O mu̧i̧-zu-mɛ duk hee gii gbadua nɛ gbin piinɛ fɔɗɛɛ nɛ zu kaya Galad mɛ ga.

²O gba̧a̧-nin-mɛ ɔ ndáká-ndáká hee gii sami nɛ‘i zuia,[6] ɓɛɛ nɛ̀ daŋ nɛ̀ fara-zui-wa’ɛ ga. Wa lɛŋ gbama yiitoo yiitoo, kóó ŋma kpɔk mɛ duk ɛnɛ-wi bo na.

³Zɔ́k de be tu̧ ndàrá-nú-mɛ[7] mít-mít hee ɗáŋ ga wo! Zɔk gba de leɓe-mɛ wo! Nɛ̀ ɗɔɔ laa-kpe-yí-mɛ mɛ tɛnɛ, o zaɗa-mɛ ya hee reeta kìì-kóɓò[8] ga.

⁴Gba de bɔ̧i̧a̧ ger-mɛ hɔɔ ŋmaa in tua-pɛm-mɔ ko David n'aa dee nɛ yɔka-a in nɛ zika-a; ɓɛɛ kísí ga̧i̧ sɛnɛ hee o ŋgee ko o yaa-ŋgo-biro booro ga.

⁵Tua ber-mɛ duk hee o gbama be kalamba nɛ naa kɔ-wa gbaia nɛ dan, nɛ nyɔŋ mɔ poo o gba-dɛŋ'ɛ ga.

⁶Mi tɛ nɛ si zu kaya nɔ̧́-nyama, si zu kaya fuu-nyama, nɛ oi ndaa-wese, ká tum ba nu!

⁷Mɛ yora zɔŋa batɛ, yaa-wiyɛ kɔ‘m! Ŋma gee ndɔla bo tɛ-mɛ na.

⁸Kóò n'am hara, mɛ̀ kúr ɛ̀ɛ̀ é Libaŋ duk, mɛ̀ tɛ́ ɛ̀ɛ̀ yak k’ɛɛ e Libaŋ duk; mɛ̀ é kaya Amana duk, ɓɛɛ mɛ̀ bá yí-mɛ pii ɗɔɔ; ká mɛ zɔk mɔ si zu o kaya Senir in Hɛrmɔŋ, nɛ duk nɛ fara-yaa ko o dila in o gɔ̧ na.

⁹Mɛ́ pi̧i̧ dawa zu'm, boko-nya'm! Kóò n'am hara, tɛ gee zɔka mɔ kɔ-mɛ pii tɛ‘m, in tɛ gee zɔka o kísí nɛ ya ger-mɛ n'am zɔk'i, ɓɛɛ ɗɛɗ‘am gɔn gɔn baram-baram!

¹⁰Kɔ̧ɔ̧mɔ kɔ-mɛ dee tɛ‘m nyɛmna, boko-nya'm, kóò n'am hara! Kɔ̧ɔ̧mɔ kɔ-mɛ ɔ̧ɔ̧ nyɔ̧ɔ̧ tɛ‘m gan dɔ̧ɔ̧, in de pɛr nyama nɛ kur tɛ-mɛ gana o dɔka nyama lɛŋ.

¹¹Kà‘m dui nú-mɛ, ɓɛɛ o ndara nú-mɛ ɔ ɓisisi; leɓe-mɛ ɔ dɔk-dɔk hee gɔrɔ in yibere ga. Nyama nɛ mɛ aa tɛ o laa kɔ-mɛ nun hee pɛr kombo Libaŋ mɛ ga.

¹²Mɛ́ nɛ́ mgbák fɔ kɔ‘m, boko-nya'm, kóò n'am hara! Mɛ́ nɛ́ gɔna-yi kɔ‘m; mɛ nɛ kpút-kpút-yì kɔ‘m ɛn'am.

¹³Mɛ hɔɔ ŋmaa in fɔ nɛ̀ kóɓò dɛm sɛnɛ nɛ de-a, nɛ o gba waya-te a̧a̧ sɛnɛ nɛtɛ nɛtɛ, nɛ o kímbá in o masoro a̧a̧ sɛnɛ,

¹⁴ká bá nɛ̀ nyama-gi-kpoo, in o gba de nyama-a-tɛ in nɔ̧́-sɔ̧-tɛ mbɛt.[9]

¹⁵Mɛ̀ nɛ́ zu-zer-yì a̧ de ha̧ o fɔ‘i mɛ dɛm, mɛ̀ nɛ́ kpút-kpút-yì nɛ fok nɛ Libaŋ mɛ tɛnɛ!

¹⁶Búk mɛ ká̧-zan-mɛ́-ŋgɔn, mɛ kur! Búk mɛ ká̧-zan-mɛ́-ɗɔɔ, mɛ tɛ mbɛt! Ɛ̀nɛ̀ yú pii zu fɔ kɔ‘m, ha̧ o pɛr mɔɔ-kpɛɛfɔ kur dam fara lɛŋ. Yaa-dua-see-am a̧ ye kpɛɛfɔ kɔ‘i, a̧ a̧ nyɔŋ o gba de waya-te kpɛɛfɔ-a.