Read Northwest Gbaya GIMA KO SALOMƆŊ 7 Bible Online

GIMA KO SALOMƆŊ 7 - Northwest Gbaya bible

GIMA KO SALOMƆŊ 7

¹«Mɛ̀ zík tɛ-mɛ, mɛ̀ zík tɛ-mɛ, boko be Sulam! Mɛ̀ zík tɛ-mɛ, mɛ̀ é h’ɛ́ɛ́ zɔk yí-mɛ!» Ɛ́nɛ́ kɔ̧ɔ̧ mɛ zɔk boko be Sulam fara yɔ yɔyɛ-e-ha̧-ŋmaa wen ge?

²Boko be-wan, naŋ-mɛ baa nɛ ndara’ɛ batɛ! Guntir-mɛ duk hee ŋma de kana nɛ‘i duia dui ga.

³Kɔn-mɛ[16] duk hee ku̧i̧ɓutu maguu ga, duk hee be ɗele-nɔ-mɔ nɛ dɔ̧ɔ̧ nyaŋ kɔ̧ a̧ na ga; zaŋ-mɛ hɔɔ ŋmaa in duk gba̧a̧ alkamaari nɛ gba-dɛŋ zika kpa nu ŋmaa.

⁴Saŋa ber-mɛ duk hee o gbama be kalamba nɛ naa kɔ-wa gbaia nɛ dan ga.

⁵Ber-mɛ duk hee zika tua-pɛm-mɔ nɛ wa sa'e Gba̧a̧-nin-fɔrɔ ga; o gbaayí-mɛ ɔ gɛɗa hee o gɔna-yi mɛ Hɛsbɔŋ nɛ a̧a̧ ká̧ nu garo gasa ye'i ga; ɓɛɛ zɔ̧ɔ̧-mɛ duk gɔ́mɔ́mɔ́ hee tua-pɛm-mɔ mɛ Libaŋ nɛ zɔk mɔ si Damas mɛ ga mbɛt.

⁶Zu-mɛ hɔɔ ŋmaa in kaya Karmɛl; o mui̧-zu-gba-waka nɛ mɛ ɗafa'i nɛ mɔɔ-ba-see wannu.

⁷Yaa-wiyɛ, daŋ-ká-wese-bia kɔ‘m, dua-see-am, mɛ yora zɔŋa batɛ!

⁸Zɔ́k de be yora-a kɔ-mɛ ɗɛ́ŋɛ́n hee ndɛŋgɛ ga wo, sáŋá ber-mɛ duk hee waya kóɓò[17] ga.

⁹Nɛ mɔ‘i sa'm tɔ̧‘e, «Mi tɛ daŋ kana kóɓò‘i mɛ ɓi o waya-a.» O ber-mɛ a̧ ya hee o waya nyak-dɔ̧ɔ̧ ga, pɛr kɔ̧ nú-mɛ a̧ nun ɓisisi hee pɛr de waya-te ga;

¹⁰kɔ̧ nú-mɛ a̧ ga̧ hee nyɔ̧ɔ̧ dɔ̧ɔ̧...! ...nɛ‘i baa e ha̧ yaa-dua-see-am, ɓɛɛ fók a kɔ̧ nú-ɛɛ, o wan-ɔ-ya ga.

¹¹Mi duk nɛ ko yaa-dua-see-am, ɓɛɛ kintɛ-a a̧a̧ pii tɛ‘m.

¹²Yaa-dua-see-am, mɛ̀ tɛ́ ɛ̀ɛ̀ yák si zaŋbɛɛ, ɛ̀ɛ̀ nɛ́ɛ̀ ɔ tɛ ŋma be ye;

¹³mɛ tuyɛ sut, ɓɛɛ ɛ́ɛ́ yaka si kpɛɛfɔ nyak-dɔ̧ɔ̧, h’ɛ́ɛ́ mɛ zɔk mɔ kà o nyak-dɔ̧ɔ̧ nɛ ɓɔa, kà wa nɛ doa, in kà o kóɓò nɛ doa mbɛt, ɓɛɛ nɛ́ ŋgimbi'i a̧‘m tɛ usi nɛ kɔ̧ɔ̧mɔ kɔ‘m ha̧ mɛ.

¹⁴Pɛr yiŋgi-nyɔnɔ[18] nɛ mɔ'ɔ nɛ nun tɛnɛ ɓisisi’ɛ; o de waya-te a̧a̧ nu tua k’ɛɛ: o mbe-a in o gba̧‘a̧-a̧ mbɛt; mi ee wa ha̧ mɛ, yaa-dua-see-am.