Read Northwest Gbaya ƊUKA-TAAMƆ 1 Bible Online

ƊUKA-TAAMƆ 1 - Northwest Gbaya bible

ƊUKA-TAAMƆ 1

¹Ɛnɛ hɛr tɛ-‘nɛ nɛ deemɔ nɛ yuwar-a, ɛ́nɛ́ o wi nɛ ɔ wan zu nù. Ɛnɛ dé nɛ o de taamɔ zu Gasa Wan, ɛnɛ kii A̧ nɛ mɔkasee.

²Wen, ɓán ná, A̧ ee ha̧ wi nɛ ba zu we nɛ A̧ na mɛ kpa A̧. A̧ usi yí-A̧ usi ha̧ wi nɛ kɔɗɔaa ha̧ A̧.

³O gɔɔ taamɔ fo nɛ bíí nyɛi̧ nɛ Sɔ̧, ɓɛɛ foe tɛ ba o mgbelewi nɛ we Wan-ŋgaiamɔ‘i mbɛt.

⁴Kpasa ɗuka-taamɔ ye kɔ̧ see ɗaŋwi na, a̧ dúk tɛ wi nɛ ɗaŋmɔ yuɓur a na

⁵Wen Sa̧-a̧ Ɔmi nɛ yekeli bii yu nɛ dukaa nɛ see yiitoo, A̧ wɛr nɛ tɛ-A nɛ o taamɔ bɔkɔ, see-A̧ nyɔŋ ŋgɔr-ŋgɔr mbɛt ŋgimbi lɛŋ n'Aa zɔk nɛ ŋma gɔɔmɔ.

⁶Ɗuka-taamɔ nɛ ŋma ɔmi nɛ de kɔ̧ɔ̧mɔ in bii, ɓɛɛ a̧ beka e wi-tɔ̧ ɗaŋ wen ha̧ Sɔ̧ nɛ yɔli na; wen Sɔ̧ nɛ́ sedaako mɔ nɛ a̧-a̧ kɔ̧ see-aa, in wi nɛ zɔk mɔ nɛ kpasaa hɔ nduti taamɔ kɔ̧-a̧, ɓɛɛ nɛ yéŋ nɛ́ zer zíí nɛ be mɔ nɛ gbo nɛ nú-a̧.

⁷Nɛ mbetɛ, Ɔmi ko Gasa Wan kpee zu nù lɛŋ, ɓɛɛ héé mɛ nɛ A̧‘a ndaɗi mɔ lɛŋ nɛ ŋmaa ga, A̧ iŋa be wen lɛŋ nɛ gbo nɛ kɔ̧ nú bii mbɛt.

⁸Hegɔ, wi-tɔ̧ ɗaŋ nú lɛŋ nyɛm mɛ hu̧si tɛ nɛ A̧ na, ɓɛɛ bɔnɛ oi ɗaŋmɔ beka nyun wi’ɛi na mbɛt.

⁹Wi tɛ ɓa ndaa mɔ nɛ ɗaŋwi kɔ̧ɔ̧ mɛ de lɛŋ, giti wen kɔ̧-a̧ tɛ daŋ hɔ tɛ Gasa Wan, nɛ sedaako o ɗaŋmɔ kɔ̧-a̧.

¹⁰Zer de gɔya zii mɔ lɛŋ, kóó be giti fui̧a-wen nyaŋ a̧ na.

¹¹Ɓɛɛ ɛnɛ e ku̧i̧amɔ sɔɔgee dúk, ɛnɛ dor leɓe'nɛ, k’ɛ́nɛ́ tɛ̀ɛ́ tɔ̧ ɗaŋ wen wen kóó ŋma be ɓɛlɛk-wen tik nù ɓɔn mbulɛɛ na. Ndara-nú wi-ɓir-wen ndela gbɛ nɛ wan-aa.

¹²K’ɛ́nɛ́ e ha̧ yɔɔkaya k’ɛ́nɛ́ mɛ dak fio pi zu'nɛ́ na, in ha̧ o tom mɛ er-‘nɛ́ mɛ de h’ɛ́nɛ́ mɛ tik na.

¹³Sɔ̧ de kɔ‘i fio na, ɓɛɛ A̧ bó nɛ desee zu fea ko bii na.

¹⁴Wen A̧ dee o mɔ lɛŋ ha̧ wa mɛ ya kpasa, ɓɛɛ o mɔ n'Aa dee a zaŋnu lɛŋ, nɛ́ wen duka kpasa ba nɛ kpara-a si ti. Ŋma ɔ̧na gbɛ fio bo tɛ o mɔ nɔ‘i na, ɓɛɛ ŋgai ko Hadɛs (ye ko o fio) ɔ wan zu nu na mbɛt,

¹⁵wen deemɔ nɛ yuwar-a dúk kpoo nɛ kpoo.

¹⁶Ɓɛɛ o ɗaŋwi aŋ nɛ er, sa nɛ fio; see-wa gbɛŋ zɛ̀k-zɛ̀k wen aa; nɛ mɔ'ɔ nɛ wa baa a̧ nɛ sɛm, ɓɛɛ wa nɔ tɔk in a̧. Nɛ mbetɛ, nyɛma so kana ha̧ wa mɛ ya o ŋgaiwi kɔ̧-a̧.