Read Northwest Gbaya ƊUKA-TAAMƆ 10 Bible Online

ƊUKA-TAAMƆ 10 - Northwest Gbaya bible

ƊUKA-TAAMƆ 10

¹Ɗuka-taamɔ yora zu dáà ko o bii-zaŋnu, kuti bii nɛ Sɔ̧ ɓoo nɛ nù kpɔk kerek ɛnɛ'ɛ. Nɛ́ Ɗuka-taamɔ‘i a baa a̧ e ŋgɔn ɗoŋ tikaa kɔ̧-a̧,

²ɓɛɛ ha̧ nɛ ŋgai ha̧ a̧ mɛ ɔ nɛ wan zu mɔ lɛŋ.

³Ɓɛɛ wese nɛ ŋma ɗaŋwi dee nɛ nyimsea zik nɛ ɗoŋ ha̧ Ɗuka-taamɔ, a̧ fee fio ŋgasee-dawa n'aa dee sitɛ nya a̧‘i.

⁴Ha̧-a̧-yì ndiɓa-koro hura nù wen zu ɗaŋwi'i, ɓɛɛ nɛ́ Ɗuka-taamɔ nɛ mgbɔɔ so tanawi nɛ gee kombon nɛ zu-yì nɛnɛ‘i, a kpasa nu'i woyo.

⁵Ɓɛɛ ŋgimbi nɛ o zuduk lɛŋ yee nɛ tɛ dee o ɗaŋmɔ, wa zii nɛ nú o ŋmaa ɓɔ na’ɛ, nɛ́ Ɗuka-taamɔ a kpaa yí-tanawi. A̧ pɛma tanawi'i ká a̧ tɛ̀ɛ́ de ɗaŋmɔ ti Sɔ̧, ɓɛɛ a̧ e ha̧ a̧ mɛ kpa ŋgai gan zu kɔ̧ɔ̧mɔ, n'aa de sitɛ bem kɔ̧-a.

⁶Nɛ́ Ɗuka-taamɔ mbɛt a kpasa tanawi nɛ yuu so mɔ ti wee nɛ zira nɛ yiwese mɛ, dɔ nɛ o gasa ye mɔɔrɔ a nù'ɛ.

⁷O mɔɔ-sedaako ɗaŋmɔ kɔ-wa nɛ́ puturu-nù, nɛ ziwee daŋ sɛnɛ hɔ sɔsɔɔ‘i, o te nɛ o wayaa sɔk na ŋgimbi lɛŋ, in ŋma ɓɛ̧i̧a̧ ta-tɔŋ nɛ zu̧u̧ nù, wen mbaŋa tɛ-wi zu mɔ nɛ kpaa so ŋma wi-si-kafɛ.

⁸Bó nɛ́‘e o wi nɛ bɛ̧ɛ̧ baa yuwar Ɗuka-taamɔ nyuna nɛ́ iŋa kɛ̧ɛ̧ mgbara demɔ ɓɛɛ na, wa ee mɔɔ-oi mgbele kɔ-wa ha̧ o bezaŋ mbɛt, wen ká ndaa ɗaŋmɔ nɛ wa dee so'i tɛ̀ɛ́ tu̧.

⁹Ɓɛɛ Ɗuka-taamɔ gboo o widetom kɔ‘i yinɛ tɛ bɔnɛ.

¹⁰Nɛ́ A̧‘a mgbɔɔ tanawi nɛ yuu so nyimsea ko zɔm-wi kɔ‘i’ɛ nɛ tɛ o de yuwar nɛnɛ. A̧ usa wan ko Sɔ̧ ha̧ a̧, in o mɔ ko Sɔ̧ nɛ ya nɛ sa̧-a̧. A̧ dee ha̧ a̧ mɛ kpa mɔɔ-oi gbɛŋmɔ kɔ̧-a̧, in ha̧ o mɔɔ-oi bɔnɛ kɔ̧-a̧ mɛ dɔk.

¹¹A̧ gbaka wi’ɛi ti o wi-de-wɔ-mbɔi nɛ nukura a̧, ɓɛɛ a̧ de ha̧ a̧ mɛ kpa mɔ nɛ dɔkaa.

¹²A̧ pɛma a̧ wen o wisɛn kɔ̧-a̧, ɓɛɛ a̧ ye ɗoŋ-aa ti o wi-tui-pɛr ha̧ a̧. Ɗuka-taamɔ dee ha̧ tanawi mɛ gbin ŋma ŋga biro, wen ha̧ a̧ mɛ iŋ nde ee-ta nɛ Sɔ̧ gana mɔ lɛŋ.

¹³A̧ siŋ widemɔ nɛ yuwar-a, nɛ wa ɗɔra so’ɛ e duk ɛnɛ-a na, ɓɛɛ a̧ dor a tɛ dee ɗaŋmɔ.

¹⁴Ɗuka-taamɔ zira in a̧ si kɔ̧ gɔna-yi, ɓɛɛ a̧ e a̧ duk ɛnɛ-a kɔ̧ zɔɓɔ na, hɔ nɛnɛ wese n'a̧-a̧ ha̧nɛ dɔ́rá-wan ha̧ a̧, bá nɛ a̧ e zu o wi nɛ usa so bɔnɛ ha̧ a̧. Hegɔ Ɗuka-taamɔ usa nde o wi nɛ ɓira so wen e nú-a̧ nɛ́ o wi-ndela, ɓɛɛ a̧ de ha̧ nin tanawi'i mɛ hu̧r kpoo nɛ kpoo.

¹⁵Ɗuka-taamɔ gboo sa̧-a̧ dukbii, zuduk nɛ bó nɛ wen zu na, yinɛ er dukbii nɛ nasi so wa.

¹⁶Ɗuka-taamɔ yee kɔ̧ see ŋma widetom ko Gasa Wan, ɓɛɛ wi’ɛi de o mɔɔ-kifi in o mɔɔ-usi-mɔ tɔn nɛ gɛr-ŋmaa in o ŋgaŋa wannu.

¹⁷Ɗuka-taamɔ ha̧a̧ mɔɔ-oi ŋga tom ko o sa̧-a̧ bii ha̧ wa. A̧ mgbɔɔ wa nɛ ŋma yuwar gɔn-ɗɛɗɛ-wi, ɓɛɛ a̧ duk nɛ́ giɔ̧-kpe-zu wa mɛ wese, in sɔra nɛ toka zu wa mɛ zaŋ-zɛ.

¹⁸A̧ dee ha̧ wa mɛ ku gbɛ̧ gbatɔp nɛ korá náŋ, a̧ mgbɔɔ wa ɓir nɛ mgbara pɛŋa-yì.

¹⁹Ɓɛɛ nɛ ko o wisɛn kɔ-wa, nɛ yì a'a̧ timgba hur nɛ wa, sɛka a̧ ŋmai wa nɛ ndaa yì mɛ́ gbonɛ.

²⁰Hegɔ o widemɔ nɛ yuwar-a kaia mɔɔ-oi ko o wi nɛ iŋ Sɔ̧ na. Gasa Wan, wa bia gima zɔn nɛ nin-‘Nɛ́, nɛ ɔ sa̧-a̧ nyɛmna, ɓɛɛ wa kɔ̧ gima zɔn nɛ ŋgai k’Ɛ́nɛ́ nɛ yora ɗoŋ wa'i.

²¹Wen Ɗuka-taamɔ hu̧i̧a̧ nú o mukɛ, ɓɛɛ a̧ bur leɓe o be-geɗɛk obem.