Read Northwest Gbaya ƊUKA-TAAMƆ 11 Bible Online

ƊUKA-TAAMƆ 11 - Northwest Gbaya bible

ƊUKA-TAAMƆ 11

¹Ɗuka-taamɔ dee ha̧ tom kɔ-wa mɛ hɔ gba̧a̧, wen zu ŋma sa̧-a̧ witɔ̧wen oi nú Sɔ̧.

²Wa ɓira nɛ ŋma ŋga gbara nɛ bii ɔ sɛnɛ na, ɓɛɛ wa de o tua-laa kɔ-wa sɛn ŋma fara nɛ bii tɛ hɔ sɛnɛ nɛti na.

³Wa baa zu duk nɛ o wisɛn kɔ-wa, ɓɛɛ wa ndak o wi-kur-zu-wa yaknɛ.

⁴O be-Israɛl zɔka bɔnɛ wɔ-yi, ɓɛɛ wa ai nú h’Ɛ́nɛ́ mɛ gbak wa. Hegɔ yì foka nɛ zaŋ ɗuka kamta tɛnɛ ha̧ wa, nyina-ga̧-wɔyi kɔ-wa gboo nɛ tɛ go.

⁵Hegɔ mbɛt, kale kpɔk mɔ nɛ usa so bɔnɛ ha̧ o wisɛn kɔ-wa'i kifa nɛ́ mɔɔ-kpasi wa, ŋgimbi sakalamɔ.

⁶Mɛ́ usi bɔnɛ ha̧ o wisɛn nɛ ha̧so nú mɛ gbɛ o zɔɗi bem ko dukbii k’Ɛ́nɛ́ lɛŋ‘i, Ɛnɛ ɓuta yi nɛ beka gɔn na nɛ tɔk ha̧ wa. Ɓɛɛ nɛ ko o be-Israɛl, Ɛnɛ ha̧nɛ dɔka yi nɛ wa ta so na ha̧ wa.

⁸Nɛ́ tɛ wɔ-yi nɛ gbɛɛ wa'i, Ɛ́nɛ́ usa nɛnɛ ha̧ wa heege Ɛ́nɛ́ dee so nɛ bɔnɛ in o wisen kɔ-wa nɛ kia yi-nɔ takaɗi’ɛ ga.

⁹Tɛ bɔnɛ n’Ɛnɛ usa ha̧ o be Israɛl, n’Ɛnɛ gɔna kita nɛ ko zu wa, Ɛnɛ dee ha̧ wa mɛ iŋ bɔnɛ n’Ɛnɛ usa ha̧ o ɗaŋwi tɛ gɔna kita-nyimsea zu wa.

¹⁰War ko o bii k’Ɛ́nɛ́, Ɛnɛ usa bɔnɛ ha̧ wa, hee mɔ nɛ ŋma dáà mbaŋ nɛ tɛ o bem’ɛ ga, ɓɛɛ nɛ ko o i̧i̧-wi-nɔ‘i, Ɛnɛ ɓaa ndaa mɔ kɔ-wa vɛ́r-vɛ́r, hee ŋma wannu nɛ dúk dɔ̧ɔ̧ mɛ gɔn ɗaŋ kita zu bii’ɛ ga.

¹¹Ɓɛɛ kana nɛ kale bɔnɛ a nukura wa nɛ yí o bii k’Ɛ́nɛ́, in nɛ nyɛia̧a mbɛt.

¹²Hegɔ ditasee kɔ-wa gbaia dan: aia nú, ta nɛ o gba'a mɔ nɛ yaka so,

¹³in mbɛt, ŋgimbi nɛ wa zɔka nɛnɛ‘e kpɔk mɔ nɛ nukura wa tɛɛ kifi nɛ́ zɔm demɔ wen o be-Israɛl wó, nɛ́ hí̧í̧ a wa iŋa nɛ ti tom ko Gasa Wan.

¹⁴Wi nɛ wa siŋa so pi̧ ka̧ zaŋ yi ɓeemɛ, ɓɛɛ ká wa tɛ̀ɛ́ ndak nɛ ɗoŋ woyo zɛkɛɗi nɛnɛ'ɛ, deemɔ yek nɛ wa nɛ ɗoŋ, wen wɔ-yì nɛ gbɛɛ wa nyɛm ŋmaa in war ko o bii ko Sɔ̧ na.

¹⁵Ɓɛɛ gɔɔmɔ ko o wi-nɔ‘i baa so wa pi̧ tɛ taa o ɗaŋ mgbele-mɔ nɛ dee ha̧ wa mɛ yɔ́ kɔ́yá tɛ-wa tɛ wora o saɗi-gbur-zaŋ nɛ nu, nɛ bo nɛ ŋma taamɔ na, in o ŋma gee ɗaŋ kókóɗó saɗi. Hegɔ Ɛnɛ toma gba gii o be-saɗi nɛ bo nɛ taamɔ na mbɛt mɛ de ŋmaa in wa.

¹⁶Wen ha̧ wa mɛ iŋ ndé nɛ kale kpɔk bɔnɛ ɗaŋmɔ nɛ‘i de a tik zu wi.

¹⁷Ɛr-‘Nɛ́ nɛ a̧-a̧ nɛ ŋgaiamɔ lɛŋ, nɛ baa nɛ́ gee kiŋɗiŋ-mɔ de nɛ o mɔɔ- zaŋnu’ɛ, nyɛma so mɛ tom o gba dɔka baŋgiiɗoŋ kóó o ŋga dila, a zu wa,

¹⁸kóó Ɛnɛ nyɛma so mbɛt mɛ de o ŋgaŋa ndiɓa, nɛ‘i tɛ zɔk nɛti na, nɛ pɛ nɛ da̧, nɛ nyɛma mɛ ɔ̧i̧ wee, in mɛ pɛ nɛ́ o ɗaŋ pɛr ziwee, kóó nɛ gba̧a̧yí du nɛ wee tom nɛnɛ a zu wa.

¹⁹Bó nɛ‘e nɛ́ ɗaŋ ko o saɗi nɔ‘i a tɛ̀ɛ́ kum o wi nɔ‘i ɓɛɛ na; gee bele zɔka o saɗi nɔ‘i sɔɔgee nyɛma so mɛ zar wa gbɛ a nu nɛnɛ mbɔlɔlɔ.

²⁰Ɓɛɛ kóó o ndiɓa nɔ‘i a bó so na mbɛt, Ɛnɛ nyɛma so mɛ ndur wa a nu nɛ gee be búk nú-‘Nɛ́ gee, sóm nɛ deemɔ nɛ yuwar-a k’Ɛ́nɛ́ ɗoŋ wa, in mɛ pɛsi wa sót-sót nɛ ŋga búk k’Ɛ́nɛ́. Ɓɛɛ zu-a'i bó, Ɛnɛ ɗafa mɔ k’Ɛ́nɛ́ lɛŋ nɛ wara, nyɛm nɛ ɗoŋ gasaa, dɔkaa in ditaa.

²¹Zɔm ŋgai k’Ɛ́nɛ́ dúk gɛɗɛ-gɛɗɛ wese lɛŋ mɛ de tom h’Ɛ́nɛ́, ɓɛɛ nɛ́ o'o nyɛma mɛ yor ti ken ɓaa-‘Nɛ́ o?

²²Nɛ mbetɛ, zaŋnu nɛ oi-aa duk ti'Nɛ́, hee gee be ɗik-ɗik fuunu nɛ de ha̧ kilo mɛ wɛr’ɛ ga, in hee mbɛŋ-tuyɛ nɛ zur a nu’ɛ ga.

²³Ɓɛɛ Ɛ́nɛ́ zɔk bii lɛŋ nɛ ko, wen n’Ɛnɛ a̧-a̧ nɛ ŋgai zu mɔ lɛŋ, ɓɛɛ Ɛ́nɛ́ zɔk mɔ mbɛt zɔk yak zu ɗaŋmɔ ko o bii, wen ha̧ wa mɛ kpai taamɔ kɔ-wa.

²⁴Ɛ́nɛ́ kɔ̧ɔ̧ o mɔ nɛ ya lɛŋ, ɓɛɛ Ɛ́nɛ́ sɛn ŋma mɔ kpɔk n’Ɛnɛ dea na, wen Ɛnɛ'ɛ sɛ́n so ŋma ga’ɛ, bó nɛ́ Ɛ́nɛ́ tɛ̀ɛ́ de so a̧ dee na.

²⁵K’Ɛnɛ kɔ̧ so na, nɛ́ tɛ ge yuwar ge a ŋma mɔ tɛ̀ɛ́ duk nɛnɛ zaŋnu ge? Kóó nɛ́ hee ge a'a̧ tɛ ɓɔn nɛnɛ zu nu, k’Ɛnɛ hok so a̧ na ge?

²⁶Ɛ́nɛ́ yor zu wa lɛŋ za̧-a̧ nɛ ko, wen wa lɛŋ nɛ́ k’Ɛ́nɛ́, Gasa Wan, Ɛ́nɛ́à Wan nɛ kɔ̧ɔ̧ nɛ́ duká-kpasá'ɛ.