Read Northwest Gbaya ƊUKA-TAAMƆ 12 Bible Online

ƊUKA-TAAMƆ 12 - Northwest Gbaya bible

ƊUKA-TAAMƆ 12

¹Ɓɛɛ Ɔmi k’Ɛ́nɛ́, nɛ dúk kpoo nɛ kpoo'i, a̧-a̧ tɛ mɔ lɛŋ nɛ ya kpasa.

²Hegɔ mbɛt, Gasa Wan, nɛ́ tikiɗi tikiɗi Ɛnɛ usi nɛ ɗoŋ mɔ ha̧ o wi nɛ tik. Ɛnɛ gai nɛ́ wa, gbo nɛ yí ɗaŋmɔ kɔ-wa ha̧ wa; gbakna, wa bɛ̧ɛ̧ ɗaŋmɔ ha̧ wa mɛ kɔ̧ɔ̧ɗɔa h’Ɛ́nɛ́.

³Nɛ́ hegɔ Ɛ́nɛ́ dee nɛnɛ in o kuti bii nɛ ɔɔ tɛ sa̧a̧ nù k’Ɛ́nɛ́ mbɛt.

⁴Ɛnɛ sɛna so wa wen zu o mɔɔ-sɛ̧ɛ̧ kɔ-wa: dee o mɔɔ-dua, in o ɗaŋ dó-ɗafasɔ̧ kɔ-wa,

⁵gbɛɛ o obem nɛ saka-yí, dee dina nyɔŋ murtɛ in tɔktɛ o bii, nɛ oi nyak-zaŋ-wa lɛ̧ŋ; o gasa kpáŋ-de-ɗaŋmɔ nɛ‘i baa fara de ndiŋmɔ‘i,

⁶o dáà in nàà nɛ gbɛ so nɛ́ o bem nɛ bo nɛ ŋgai yee ɗoŋ wa na'i, Ɛnɛ dee so ha̧ o dáà k’ɛ́ɛ́ mɛ gbɛ wa,

⁷wen ha̧ zikanu̧ nɛ baa see'Nɛ́ gan o dɔkaa'i mɛ kpa nɛ́ mbe bii nɛ tɛ ya nɛ́ o kpasa bem ko Sɔ̧.

⁸Ɓɛɛ kóó o wi-nɔ‘i mbɛt, Ɛnɛ zɔka kana wa nɛ ko, wen nɛ wa nɛ́ o bii, ɓɛɛ Ɛnɛ tom nɛ́ o dɛnɛ-ŋgandi yak ti ha̧ o wi-biro k’Ɛ́nɛ́, wen kuma wa mɔktɛ mɔktɛ.

⁹Nɛ mbetɛ, Ɛnɛ nyɛma so mɛ tui ŋma biro pi nù, kai nɛ o ɗaŋwi ha̧ o tanawi, kóó mɛ fo o ŋga saɗi a zu wa, kóó mɛ tok o ɗaŋ yoŋgo kum nɛ wa yinɛ.

¹⁰Ɓɛɛ tɛ gɔna kita hai na'i, Ɛnɛ kii so nɛ́ yuwar ha̧ wa mɛ kpai see-wa. Zua'i, Ɛnɛ iŋa so kana nɛ dea'e wa nɛ́ o ɗaŋ kpár, dika tɛ tugun-aa mɛ, wa koo wa nɛ oi o ɗaŋmɔ kɔ-wa, in mbɛt nde taamɔ kɔ-wa beka kpai na ndó-ndó-ndɔ́.

¹¹Wen, mɛ nɛ́ ŋma dukbii nɛ fom baa dika tɛ ku̧u̧naŋ-a mɛ. Ɓó nɛ́‘e Ɛnɛ yuu nɛ́ ŋma bii, bi nɛ zu o ɗaŋmɔ kɔ-wa sɔɔgee'i na mbɛt.

¹²Nɛ́ o'o nyɛma bɔɔ benaŋ mɛ ak'Nɛ́ nde mɛ nɛ ge Ɛ́nɛ́ dea’ɛ ge nde o? Nɛ́ o'o tɛ bɛ̧ gɔna kita k’Ɛ́nɛ́ o? Ɓɛɛ nɛ́ o'o tɛ de wen in'Nɛ́ɛ́ wen zu feaa ko o dukbii n’Ɛnɛ dea o? Nɛ́ o'o tɛ tɛ̀ɛ́ de wen in'Nɛ́ɛ́, ye nɛ ɗoŋ o ɗaŋwi o?

¹³Ŋma Sɔ̧ nɛ hakali mɔ lɛŋ gan zu ‘Nɛ́, ɓɛɛ n’Ɛnɛ tɛ kii mɛ usi ti a̧‘e wi gɔna kita nyɛm sɛnɛ wo’ɛ, bó na.

¹⁴Ŋma wannu, kóó ŋma wan nɛtɛ, nɛ nyɛma mɛ ba zu dúk nɛ Ɛ́nɛ́, ye nɛ ɗoŋ o wi n’Ɛnɛ aa tɛ bɔnɛ, bó na mbɛt.

¹⁵Gasa Wan, Ɛnɛ nɛ́ tanawi, mɛ nɛ hegɔ s’Ɛ́nɛ́ ɔ wan zu mɔ lɛŋ nɛ yuwar-a. Ɓɛɛ gɔna ɗaŋ kita zu bii, nɛ bɔ nɛ wen zu na, yé ŋmaa in ŋgai k’Ɛ́nɛ́ na.

¹⁶Wen deemɔ nɛ yuwar-a k’Ɛ́nɛ́‘i gbo nɛ tɛ ŋgai k’Ɛ́nɛ́, ɓɛɛ wan n’Ɛnɛ ɔ zu mɔ lɛŋ‘i dee h’Ɛ́nɛ́ mɛ demɔ lɛŋ nɛ ko.

¹⁷Kà ŋma bii si kafɛ ɔɔ-wan k’Ɛ́nɛ́ zu mɔ lɛŋ‘i, ɓɛɛ Ɛnɛ usa ŋgai k’Ɛ́nɛ́ ha̧ a̧, kpe nɛ nú wi-fe-ndela in'Nɛ́ɛ́‘i,

¹⁸ɓɛɛ k’Ɛ́nɛ́ n’Ɛnɛ a̧-a̧ ti ha̧ ŋgai k’Ɛ́nɛ́'ɛ, Ɛnɛ gɔn k’Ɛ́nɛ́ kita nɛ ga̧-a̧-see, ɓɛɛ Ɛnɛ ɔɔ wan zu yɛ nɛ mɔkasee. K’Ɛnɛ kɔ̧, ɓɛɛ Ɛnɛ deemɔ lɛŋ zu ŋgai k’Ɛ́nɛ́.

¹⁹Tɛ deemɔ hegɔ‘i, Ɛnɛ usa ha̧ dukbii k’Ɛ́nɛ́ nde widemɔ nɛ yuwar-a tɛ duk kana nɛ́ sɛm ko o bii; ɓɛɛ Ɛnɛ dun see o bem k’Ɛ́nɛ́ nɛ ee-ta siti, wen n’Ɛ́nɛ́ hu̧i̧a̧ yuwar kpaia-see oi ɗaŋmɔ ha̧ wa.

²⁰Ɛnɛ usa bɔnɛ ha̧ o wisɛn ko o bem k’Ɛ́nɛ́, o wi nɛ nyak-fio hɛra so kaɗi'i, nɛ mu̧nyal in ko, ha̧ nɛ ŋgimbi in yuwar ha̧ wa wen siŋa ɗaŋmɔ e dúk;

²¹ɓɛɛ Ɛ́nɛ́ tɛ̀ɛ́ ɗafi wen ko o bem k’Ɛ́nɛ́ nɛ mu̧nyal gan, ɗoŋ n’Ɛ́nɛ́ kana nɛ mɔ, nɔ nɛ tɔk in o dáà kɔ-wa, wen ha̧o gba demɔ ha̧ wa’ɛ.

²²Hegɔ, Ɛnɛ usa ɗoŋ mɔ h’ɛ́ɛ́ tɛ gusa o wisɛn k’ɛ́ɛ́ nɛ mu̧nyal, wen ha̧ tɛ-yɛ mɛ mbaŋ ɗoŋ kɔ̧ɔ̧mɔ k’Ɛ́nɛ́, ŋgimbi lɛŋ n’ɛɛ́ gɔn kita zu bii, in h’ɛ́ɛ́ mɛ e ta nɛ deeko k’Ɛ́nɛ́, ŋgimbi n’Ɛnɛ gɔn nɛ kita zu yɛ.

²³Mɛ nɛ hegɔ s’Ɛnɛ usi bɔnɛ ha̧ o wi nɛ dee so mɔɔ-mgbele ba nɛ gɔɔ yuwar'i, nɛ kale kpɔk o mɔɔ-buu kɔ-wa'i woyo.

²⁴Wen wa yambala so tɛ gɔɔ-yuwar ɗoŋ-wa nyɛi̧; wa ba so nɛ́ o gee sɔŋkur saɗi-nyɛr in o tumu̧i-a hee o sɔ̧ ga, ɔr nɛ tɛ-wa nɛ tɛ-wa, hee o geɗɛk obem nɛ kɔ-ta bo na ga.

²⁵Ɓɛɛ Ɛnɛ fo ŋma bɔnɛ pi̧ zu wa wen zɛkɛɗa wa, hee mɔ nɛ‘i de nɛnɛ in o mgbele obem’ɛ ga.

²⁶Hegɔ o wi, nɛ zii so mgbara o be bɔnɛ tɔ̧-mbɔrɔ‘i na, tɛ̀ɛ́ zɔk bɔnɛ mgbak ŋga kita ko Sɔ̧.

²⁷See-wa ɗaŋa nyɛmna tɛ o bɔnɛ nɛ o saɗi nɔ‘i usi ha wa'i, ɓɛɛ nɛ wa be zɔk'e nɛ́ o saɗi nɛ wa ba so hee o sɔ̧ kɔ-wa ga a de wa nɛ bɔnɛ wo, yi-wa hu̧i̧a̧, ɓɛɛ wa iŋ ti kpasa Sɔ̧ nɛ wa bɛ̧ɛ̧ so’ɛ. Mɛ nɛ hegɔ sa gasa fom tik zu wa.