Read Northwest Gbaya ƊUKA-TAAMƆ 13 Bible Online

ƊUKA-TAAMƆ 13 - Northwest Gbaya bible

ƊUKA-TAAMƆ 13

¹O bii lɛŋ nɛ iŋa-Sɔ̧-na baa fara kɔ̧ see-wa nɛ́ o gee tum-bíí; tɛ zɔka o mɔ nɛ ya nɛnɛ, wa nyɛm so mɛ iŋ ti Wi nɛ a̧-a̧ sɛnɛ na. Tɛ zɔka o tom nɛ déá, wa iŋ ti Wan-dea na mbɛt.

²Ɓɛɛ o mɔ nɛ wa ba hee o sɔ̧ ga nɛ́ o wee, búk, kóó fɛ̀ɛ́-búk, o mɔɔ-yízan, kóó o som-yì, in o sa̧a̧mɔ lɛŋ nɛ nyɛk ŋgɔn kɛ̧ nɛ mgbara ŋgimbi

³Kà bó nɛ dèé ko o mɔ nɔ‘i a ɔr o wi nɔ‘i, mɛ ba nɛ wa hee o sɔ̧ kɔ-wa ga, wa'a iŋ hee mɔ nɛ Wan-de o mɔ nɔ‘i gana nɛ wa ga mbɛt, wen nɛ́ Wi nɛ́ dúk nɛ tugun dèé, a dee wa.

⁴Ɓɛɛ nɛ́ boo nɛ ŋgai in o tom ko o mɔ nɔ‘i a zik yí-wa, nɛ́ wa'a iŋ hee mɔ nɛ Wi nɛ dee wa a̧-a̧ nɛ ŋgai gan wa ga.

⁵Wen kà‘i mbaɗi gasi in dée ko o mɔ féé, ɓɛɛ wi iŋa ti Wi-de-wa.

⁶Ɓɛɛ wi nyɛm mɛ dɔk wen a zu o wi nɔ‘i gan batɛ na mbɛt: ŋmafara, wa yɔɔ kaya tɛ yuwar kia Sɔ̧ kɔ-wa mɛ kpa A̧‘i.

⁷Tɛ dukaa mgbara o mɔ nɔ‘i, wa mbaɗa wa féé, ɓɛɛ o gee gi̧ɔ̧ mɔ nɔ‘i ɔr wa, wen o mɔɔ zaŋnu ɔ dee nyɛmna.

⁸Ɓɛɛ kóó hegɔ‘i mbɛt, wi beka e ɗaŋmɔ kɔ-wa ha̧ wa na.

⁹Wa yamba o mɔ nɛtɛ nɛtɛ hegɔɔɔ, wa ye nɛ tɛ yamba o ɗɔɔkɔri mɔɔ-zaŋnu; ɓɛɛ nɛ́ ge a dee bɔɔ ha̧ wa mɛ iŋ nɛ ti Wan-de o mɔ nɔ‘i nɛti na ge?

¹⁰Ɓɛɛ bɔnɛ a̧-a̧ zu o wi nɛ ee ta nɛ o fio-mɔ‘i: wa baa o mɔɔ-de-nɛ-er hee o sɔ̧ ga; mɔ nɛ wa dee nɛ lɔr in bu-mbɔi, nɛ‘i ɓoo nɛ dea, ɓɛɛ nɛ hɔɔ ŋmaa in o saɗi, kóó ŋma gee ta nɛ ŋma bii sɛka so ɓeemɛ.

¹¹Hegɔ mbɛt ŋma wi-sɛk-te ɓira te nɛ diti na, a̧ gbɛra io-a lɛŋ yinɛ nɛ dea, a̧ ɗafa ɗoŋ-a nɛ dea, ɓɛɛ a̧ dee nɛ nyɛk nɛ bii de nɛ tom wese lɛŋ.

¹²Ɓɛɛ, nɛ ko o sɛɓɛla-a, a̧ kai wa a ɗɔ wee wen gii nyɔŋmɔ kɔ̧-a̧, ɓɛɛ a̧ nyɔŋ mɔ zaŋ súr.

¹³Oi-aa nɛ ɓon nɛ́ wan nɛ‘i nyɛm mɛ de nɛ ŋma mɔ na, wen mɛ nɛ ŋma gɔɔ-te nɛ duk kpóɗó-kpo-kpóɗó. A̧ ba ŋgona-a, ɓɛɛ a̧ sɛka ɗaŋ nɛ ŋgimbi. A̧ gbɛr a̧ mɔktɛ mɔktɛ, ɓɛɛ a̧ dee ha̧ ŋgɔna te'i mɛ hɔ ŋmaa in bii,

¹⁴kóó ha̧ a̧ mɛ duk hee ŋma gee tumui̧ saɗi ga. A̧ sɔ̧ kui tɛ te'i, a̧ gɔna dap sɛnɛ nɛ gbɛ̧ mɔ, ɓɛɛ a̧ yɔka tɛ-a kpɛɗɛ-kpɛɗɛ kpe zu o ɗaŋ dap-aa lɛŋ.

¹⁵A̧ tɛ ɗafi de fara ha̧ a̧, a baa a̧ e zaŋ ŋgeŋ, ɓɛɛ a̧ mgboia a̧ nɛ boi e sɛnɛ.

¹⁶A̧ ɗafi mɔ lɛŋ hegɔ nɛti, ká a̧ tɛ̀ɛ́ hɔfi tik nu, wen n'a̧-a̧ iŋa nde te'i nyɛm mɛ gbak tɛ nɛ tɛ na, wen mɛ nɛ́ ŋma gee sɛka-te nɛ kɔ̧ɔ̧ nde wi tɔn a̧ tɔni.

¹⁷Ɓɛɛ ŋgimbi n'aa kɔfi mɔ wen kpaa mbɔi, baa koo in kpaa bem, foe de a̧ tɛ aka mɔ er fio-mɔ‘i na. A̧ ak hayatɛ er mɔ nɛ bó nɛ ŋgai na.

¹⁸A̧ kɔfi duká-kpasá sɛn er fio-mɔ, A̧ ai nú ha̧ ŋma mɔ nɛ nyɛm mɛ gbak bii na mɛ pɛm a̧, ɓɛɛ a̧ ee o nɔ kɔ̧-a̧ ɗɔɔ ŋgai ko ŋma mɔ nɛ nyɛm mɛ hu̧i̧ naŋ baɗúk na.

¹⁹Ɓɛɛ mɛ kpa mɔ nɛ tɛ kasi a̧, ha̧ tom kɔ̧-a̧ mɛ nɛ siti, in mɛ kpa mɔɔ-oi-tom mɛ er-a, a̧ tɛ̀ɛ́ kɔfi kɔfa ŋgai er mɔ nɛ bó nɛ gee gba̧a̧-er na.