Read Northwest Gbaya ƊUKA-TAAMƆ 14 Bible Online

ƊUKA-TAAMƆ 14 - Northwest Gbaya bible

ƊUKA-TAAMƆ 14

¹Ŋma bii woyo kura kɔ‘i nɛ kombon mɛ yar nɛ zu o ŋga pɛŋa-yì gbatɔp, ɓɛɛ a̧ tɛ̀ɛ́ kɔfi nɛ gee te, nɛ ɓuka gan kombon nɛ ba a̧ yar nɛnɛ‘i.

²Wen kombon'i, nɛ́ wɔ-mbɔi a dee ha̧‘i mɛ ta mɔ de nɛ a̧, ɓɛɛ nɛ́ gɔna kɔ-ta ko wi-sɛk-te a dee a̧.

³Mɔ kpɔk, nɛ́ ɗafamɔ k’Ɛ́nɛ́, Dáà, a̧ ba a̧ nɛ́ nɛ nɔ ɛ̧ wa. Ɛnɛ mbaŋa yuwar zu gbatɔp, ɓɛɛ Ɛnɛ mbaŋ de bɔtɔ-ɓɔtɔ war nɛ poo o ŋga pɛŋa-yì,

⁴mɛ usi nde Ɛ́nɛ́ nyɛma mɛ kpasi bii tɛ ŋgaŋamɔ lɛŋ, kóó wi’ɛi a iŋ tom yi na, bá nɛ kombon mbɛt.

⁵Ɛnɛ kɔ̧ ha̧ o tom ko Ɗuka-taamɔ k’Ɛ́nɛ́ mɛ de geemɔ mbulɛɛ na. Mɛ nɛ́ hegɔ sa bii ee nɛ ta nɛ gee be te, ɓɛɛ ká wa ku nɛ o ŋga pɛŋa-yì gbatɔp nɛ zu gee saŋa-te, ŋma mɔ ndɔ wa na’ɛ.

⁶Hegɔ mbɛt, tɛ ku̧u̧naŋ-a ɓeemɛ, ŋgimbi nɛ o gba kusa-wi-ŋmaŋ-tɛ kuma nɛnɛ, ɓɛ́ mɔɔ-e-nɛ-ta ko bii duka so nɛ́ zu gee saŋa-te, n’Ɛnɛ baa yar nɛ zu yi, ɓɛɛ ká de nɛnɛ ha̧ mbe kpár o mɔɔ-zaŋnu mɛ ya nɛ kpasa siti’ɛ.

⁷De yoŋgo a dúk zu saŋa-te nɛ dee ha̧ déémɔ k’Ɛ́nɛ́ nɛ yuwar-a mɛ hɔ gba̧a̧‘i.

⁸Ɓɛɛ fom a tik zu gee sɔ̧ nɛ bii dee nɛ er'i, in zu wi nɛ dee a̧ mbɛt: ko wi’ɛi, nɛ́ wen n'aa sɛka a̧, ɓɛɛ, kɔ̧-a̧, nɛ́ wen n'aa nɛ́ geemɔ nɛ tɛ ɓuk ɓuk'i nɛ‘i tɛɛ sa'e sɔ̧‘i.

⁹Wen Sɔ̧ sɛna ɗaŋwi in tom kɔ̧-a̧ mbɛt,

¹⁰ɓɛɛ wi tɛ usi bɔnɛ ha̧ widetom'i, gu nɛ mɔ n'aa dee mbɛt.

¹¹Sɔ̧ tɛ tɛ̀ɛ́ de ŋmaa in o geesɔ̧ ko o dukbii, wen wa kifa nɛ́ ŋma mɔɔ-nyɛr mgbara o mɔ nɛ Sɔ̧ dea, mɔɔ-ir-bii a tɛ ɗaŋmɔ, ŋma pɛ́r nɛ‘i tuia ɗɔɔ naŋ o mgbele-wi.

¹²Ku̧u̧naŋ ee kpasa Sɔ̧ dúk tɛ̀ɛ́ nɛ tɛ taamɔ sɛka o gi̧ɔ̧ geesɔ̧, ɓɛɛ o mbe tom nɛ wa foo gbɔnɛ‘i ɗáŋ dukaa ko o bii.

¹³O giɔ̧ geesɔ̧ nɔ‘i ya so nɛti tɛ ku̧u̧naŋmɔ mɛ na, ɓɛɛ wa beka ɓɔn yaknɛ sɔ̧i̧i̧ na mbɛt.

¹⁴Nɛ́ tumui̧ taamɔ ko o bii a dee ha̧ wa mɛ ye zaŋnu, hegɔ mbɛt kaɗaa kɔ-wa tɛ duk nɛ́ gee gɔma-yí.

¹⁵Ŋma dáà wan bem nɛ see ɗaŋa wen zu bem nɛ fee nɛ mbui tɔ̧ɔ̧‘e wa'a sɛk giɔ̧ tɛ bem kɔ‘i, nɛ fio baa nɛ haya'i. Ɓɛɛ kinii, a̧ tɛɛ gasi nɛ́ mɔ nɛ duka so nɛ ge wɔr’ɛ, hee ŋma sɔ̧ ga. Hegɔ ɓɛɛ a̧ e nɛ ŋma yuwar ɗafa-sɔ̧‘i in o dó-a, ha̧ o bii kɔ̧-a̧.

¹⁶Ɓɛɛ nɛ zɛ be dɔk, ɗaŋ yuwar dee dómɔ‘i baa fara tɛ-wi, hee ŋma heembea ga. Nɛ́ kale kpɔk mɔ mbɛt in doole nɛ o wannu dee nɛ o bii mɛ gasi nɛ o sɛka-te’ɛ.

¹⁷Hee mɔ'ɔ nɛ ɗoŋ o wannu nɔ‘i ɔ so nyɛia̧, ɓɛɛ nɛ wa nyɛm so mɛ gasi wa nɛ gba̧a̧yi-wa na ga, wa yaa nɛ nyɛia̧a ta nɛ dukaa kɔ-wa, ɓɛɛ wa sɛk giɔ̧-tɛ wannu nɛ wa gasi'i e ka tɛ wa, gɔm nɛ er ti bee-a, hee a̧ a̧-a̧ nɛ gba̧a̧yí-a sɛn hi̧i̧ ga.

¹⁸Kóó o wi nɛ iŋ so wannu'i nɛti na tɛ gas'a̧ hu̧r nɛ nin-a̧ dam nu, wen wɔ dee polamɔ ko wi-sɛk-mɔ‘i.

¹⁹Wen, hee mɔ'ɔ nɛ wi’ɛi kii so kana ha̧ wannu mɛ zɔk wi nɛ de yí zɔ̧i̧i̧ ga, a̧ ha̧ŋgai tɛ-a lɛŋ ha̧ sɛkamɔ kɔ̧-a̧‘i mɛ poli gan kiitɛ saŋayí-wannu.

²⁰Nɛ mɔ'ɔ nɛ gba de pólá tom'i baa see o bii, ɓɛɛ wa ye tɛ gasa wi nɛ wa tu̧ so nɛ tɛ-a ɓɛɛ‘i, hee sɔ̧ ga.

²¹Nɛ́ hegɔ a bii tika nɛnɛ yí pɛ́r, ŋgimbi nɛ o bɔnɛ zaŋnu in ŋgaŋamɔ ko o wannu dee nɛnɛ ha̧ wa mɛ a nin nɛ‘i nyɛm mɛ sa ha̧ bii na ha̧ mɔ nɛ wa dee nɛ ta in nɛ te.

²²Yɔɔkaya tɛ yuwar kia Sɔ̧‘i nyɛm wa na, ɓɛɛ zu iŋa mgbara mɔ kɔ-wa na nɛ dak wen pi zu wa'i, wa tɛ̀ɛ̀ sa kɔ-wa o ɗaŋmɔ nɔ‘i'e mɔɔ-ha̧-ga̧a̧mɔ.

²³Wa gbɛ nɛ́ o obem ɗafi nɛ sɔ̧, wa dee nɛ́ o hu̧sa dómɔ. Wa gbɛ nɛ́ o dɔ̧ɔ̧-dawa, de nɛ o kpokomɔ.

²⁴Hegɔ, wa de kii tɛ bii, kà bó nɛ kasa yuwar baaŋmaa ɓɔna. Ɓɛɛ ɛ̧ɛ̧ tɛ̀ɛ́ e nɛ́ ɗɔra tɛ wi’ɛ́ɛ́ gbɛ nɛ a̧, kóó baa nɛ́ koo kɔ̧-a̧ nɛ dala.

²⁵Mɔ ya ɗutukui dam fara lɛŋ: tɔk in gbɛɛ-zu, zu̧zu̧ in deemɔ nɛ see yiitoo, yee ŋmaa nɛ ti fu̧i̧, dee gɔɔmɔ, ɗaŋa mgbara bii, yora ɗoŋ ha̧a̧nú kɔ‘i na,

²⁶zɔka mɔ lɛŋ a zu ŋmaa, zɔna mɔ na, ndiŋ-see, baa ŋmaa ko o wiwii in o wiwii, o okóò in okóò, dee dala, in dee o ndiŋmɔ.

²⁷Wora o geesɔ̧ nɛ bó so nɛ nin na, nɛ́ ku̧u̧naŋ ɗaŋmɔ, gun-aa in gbɛɛ zu-a.

²⁸Ŋmafara, tortɛ pi̧ nɛ́ o wigasi o geesɔ̧ nɔ‘i de nɛ nyɛŋɛ gan kere, kóó wa dee ndela nɛ nin-Sɔ̧, kóó wa dee nɛ́ gɔɔmɔ, kóó wa yor nɛnɛ ɗoŋ kanamɔ kɔ-wa hɔ ti na.

²⁹Wen, hee mɔ nɛ wa e so ta nɛ o geesɔ̧ nɛ yaa nɛ fio-mɔ ga, wa ta kɔ-wa'e ŋma ɗaŋmɔ beka tik zu wi wen zu kanamɔ-ndela kɔ‘i'i na.

³⁰Ɓɛɛ ŋga kita tɛ tik wa zu mɔ yiitoo: wen nɛ wa hɛra tɛ-wa nɛ o sɛka-te e kpasa Sɔ̧ dúk, in wen nɛ wa gɔna tɛ-wa kan nɛ o mɔɔ-ndela de nɛ mɔŋgono.

³¹Bó nɛ́ ŋgai ko o mɔ nɛ o ɗaŋwi kan a de ŋmaa in wa na, ɓɛɛ nɛ́ bɔnɛ nɛ dúk wen o ɗaŋwi'i a ndak ɗoŋ wa.