Read Northwest Gbaya ƊUKA-TAAMƆ 15 Bible Online

ƊUKA-TAAMƆ 15 - Northwest Gbaya bible

ƊUKA-TAAMƆ 15

¹Ɓɛɛ k’Ɛ́nɛ́, Sɔ̧ k’ɛ́ɛ́, Ɛ́nɛ́ ɔ dee, ɓɛɛ Ɛ́nɛ́ yor ɗoŋ ha̧a̧nú k’Ɛ́nɛ́ yor, Ɛnɛ a̧-a̧ nɛ munyal, ɓɛɛ Ɛnɛ ɔ wan zu mɔ lɛŋ nɛ ko.

²Kóó ɛɛ de ɗaŋmɔ, ɛɛ tɛ ɓɔn kana nɛ́ k’Ɛ́nɛ́, wen ɛ́ɛ́ iŋa'e Ɛ́nɛ́ nɛ́ Wan k’ɛ́ɛ́ ɓɛɛ, hee mɔ n’ɛɛ́ iŋa'e ɛ́ɛ́ nɛ́ k’Ɛ́nɛ́ ga, ɛ́ɛ́ beka de ɗaŋmɔ‘i na.

³Iŋa'e Ɛ́nɛ́ nɛ́ a mgbɔ nɛ bii sitɛ kpasa deemɔ nɛ yuwar-a, ɓɛɛ iŋa'e Ɛ́nɛ́ ɔ wan zu ɛɛ nɛ́ gun duká-kpasá kpoo nɛ kpoo.

⁴O mbe ɗaŋ tom nɛ o bii foo gbonɛ de h’ɛ́ɛ́ mɛ yɔ na; kóó tumui̧ tom ko o wi-gɔn-dap nɛ de nɛ́ gi̧ɔ̧-bii gɔn nɛ dap zaŋa-nyaŋa sɛnɛ de h’ɛ́ɛ́ mɛ yɔ na mbɛt;

⁵zɔka o mɔ nɔ‘i zik nɛ zu o mgbelewi mɛ kɔ̧ wa, ɓɛɛ dee ha̧ wa mɛ nyɛŋgí gee tumui̧ gi̧ɔ̧ fio-mɔ.

⁶Ɓɛɛ o wi nɛ de o pɛrti mɔ nɔ‘i, o wi nɛ de wɔ wa, kóó nɛ gasi wa hee sɔ̧ ga, nɛ́ o wi nɛ kɔ̧ɔ̧ ɗaŋmɔ, ɓɛɛ nyɛma so kana ha̧ mɔɔ-oi pɛrti tumui̧ ee-ta'i mɛ kpa wa.

⁷Ɛnɛ zɔk ŋma wi-ɓu-kpana nɛ va̧i̧ gii nɛ dea, ɓɛɛ ɓuu nɛ o yí-nyɛk nɛtɛ nɛtɛ h’ɛ́ɛ́ wen dea tom k’ɛɛ'ɛ: nɛ́ kalɛ kpɔk gii'i a'a̧ ɓu nɛ o nyɛk wen dea o kpasa tom, in o wan mɛ dea gee tom mbɛt, kana lɛŋ hee ŋmaa ga; ɓɛɛ nɛ́ wi-ɓu-kpana'i a hok o tom nɛ‘i tɛ de nɛ wa kpɔk kpɔk.

⁸Hɔɗoŋ-aa, a̧ yee tɛ dee ŋma ɗaŋ mgbele tom, ɓɛɛ a̧ baa kale kpɔk gii'i ɓó nɛ́ ŋma ɗaŋ geesɔ̧. Zua'i, a̧ nɛ́ bii nɛ gboo nɛ tɛ nu, zɛ dɔk na, ɓɛɛ nɛ dekpaa sia ɗoŋ sitɛ nu n'aa gboo nɛnɛ‘i, ŋgimbi nɛ Sɔ̧ tɛ ak nɛ ɔmi kɔ‘i er-a̧.

⁹Ha̧ a̧ mɛ ta nɛ mɔ wen zu fio n'aa tɛ fe, in zu dukaa kɔ̧-a̧ zaŋnu, nɛ ɗoŋ-aa nyɛi na, bó na, ɓɛɛ a̧ tɛ̀ɛ́ ba nɛ zu-a we nɛ o widuilɔr in bumbɔi, zɔk nɛ ɗoŋ mɔ ko wi-kpai̧-ndɛrɛ; a̧ ŋmaŋ nɛ́ tɛ-a tɛ duia gee kókóɗó mɔ‘i.

¹⁰See-a nɛ́ gee bùk, ee-ta kɔ̧-a̧ dee geemɔ gan fuunu, ɓɛɛ duká-kpasá kɔ̧-a̧ de nyɛr tɛ wi gan gii.

¹¹Wen a̧ iŋ ti Wi nɛ dee a̧ na, a̧ iŋ ti Wi nɛ ha̧ɔmi nɛ de ha̧ a̧ mɛ de tom, ɔmi nɛ de ha̧ a̧ mɛ duk kpasa'i na mbɛt.

¹²A̧ zɔk kɔ̧-a̧ duká-kpasá k’ɛ́ɛ́ hee mɔɔ-saa ga. Kɔ̧-A̧, dukaa zaŋnu nɛ́ ŋma lumɔ ba mɔ nɛ ŋgai. A̧ hee ge nde, ɔ dee mɛ kpa mɔ, kóó nɛ ge yuwar ge nde lɛŋ, kóó nɛ dea, kóó nɛ ɗaŋa mbɛt.

¹³Wi’ɛi iŋa kana nɛ dea gan bii lɛŋ nde wi de nɛ́ ɗaŋmɔ tɛ baa fuunu mɛ ɓu nɛ o kɛsa-nyɛk in o geesɔ̧‘i.

¹⁴Ɓɛɛ o wisɛn nɛ dee ŋga bɔnɛ nɛ dukbii k’Ɛ́nɛ́ lɛŋ usa'e wi nɛ o mgbelewi, in o wi nɛ taamɔ ɗuk na, hee o geɗɛk obem ga.

¹⁵Wa baa nɛ́ o geesɔ̧ ko o dukbii zaŋnu hee sɔ̧ kɔ-wa ga. Gba̧a̧yí-wa a̧-a̧ sɛnɛ, ɓɛɛ wa zɔk mɔ na, kɔ̧zɔ-wa a̧-a̧ sɛnɛ, ɓɛɛ wa ɔm nɛnɛ na, zer-wa a̧-a̧ sɛnɛ ɓɛɛ wa zii mɔ na, waza-er-wa a̧-a̧ sɛnɛ, ɓɛɛ wa tam mɔ na, naŋ-wa a̧-a̧ sɛnɛ, ɓɛɛ ba wa nɛ́ nɛ nɔ na.

¹⁶Wen, nɛ́ ŋma bii a dee wa, nɛ́ bii nɛ a̧-a̧ nɛ gɔni ɔmi a ɓoo wa. Zua'i bó, ŋma bii zaŋnu nɛ nyɛma mɛ ɓo ŋma sɔ̧ nɛ tɛ hɔ ŋmaa in a̧ nɛ tɛ-a bó na.

¹⁷A̧ nɛ́ fio, ɓɛɛ mɔ lɛŋ n'aa tɛ de nɛ ŋdiŋ er-a'i, nɛ́ gee fio-mɔ mbɛt. A̧ nɛ tɛ-a, a̧ gana zu o mɔ n'aa gasi'i: kɔ̧-a̧, a kpaa kɔ̧-a̧ ɔmi, ɓɛɛ wa beka kpa kɔ-wa gee ŋma be-ɔmi'i na ndó-ndó-ndó.

¹⁸Wa gasi nɛ́ o gee ndiŋ saɗi-sɛ̧ɛ̧ hee sɔ̧ ga, o saɗi nɛ mgbela mgbeli gan o dɔkaa lɛŋ.

¹⁹Ŋma gee be demɔ nɛ nyɛma mɛ ba see-wi tɛ zɔka o saɗi nɔ‘i, hee sɛn tɛ o ŋma saɗi ga bó na. Wa kpa ŋma be zɔnamɔ in de yoŋgo ko Sɔ̧ na mbɛt.