Read Northwest Gbaya ƊUKA-TAAMƆ 16 Bible Online

ƊUKA-TAAMƆ 16 - Northwest Gbaya bible

ƊUKA-TAAMƆ 16

¹Nɛ́ hegɔ sa Sɔ̧ de ha̧ o ŋma saɗi nɛ hɔɔ ŋmaa in o ndiŋ saɗi nɔ‘i mɛ usi bɔnɛ ha̧ wa, in ha̧ gba gii kókóɗómɔ mɛ nukuri wa.

²Ɓɛɛ war ko dukbii k’Ɛ́nɛ́, Ɛnɛ de bɔnɛ in wa na, Ɛnɛ dee nɛ́ o demɔ in wa. Ha̧ mɛ ga̧ nɛ nú nga wo kɔ-wa, Ɛ́nɛ́ ha̧nɛ́ o kpaŋanaŋa nɛ ya nɛ́ o de nyɔɔ̧ mɔɔnyɔŋ ha̧ wa.

³Hegɔ, kóó zu wɔ nɛ gbɛɛ so o be-Egyptɛ‘i, dika tɛ zɔka o ndiŋ saɗi n’Ɛnɛ toma a zu wa'i, wɔ gboo tɛ wa. Ɓɛɛ, nɛ ko o bii k’Ɛ́nɛ́, ɗoŋ be zima-nú nɛ wa zima, Ɛ́nɛ́ ha̧nɛ́ gba de nyɔɔ̧ nyɔŋmɔ ha̧ wa.

⁴Nyɛma so kana ha̧ gasa kaɓa mɛ tik zu o be-Egyptɛ, ɓɛɛ gee zɔka bɔnɛ nɛ dikiɗi o wisɛn kɔ-wa'i nyɛma so kɔ‘i o be-Israɛl.

⁵Ɓɛɛ kóó ŋgimbi nɛ ŋga nyimsea ko o saɗi-da̧ tika nɛnɛ zu o bii k’Ɛ́nɛ́, ká o dɔwɔ́k ŋga gɔ́k gɔm nɛ o ŋma mbɛt gbɛ'ɛ, nyimsea k’Ɛ́nɛ́‘i ŋgai zu wa hɔ ti na.

⁶Mɛ́ mbaŋ tɛ-wa, Ɛ́nɛ́ pi̧i̧ be kii tɛ wa tɛ be ŋgimbi tikiɗi, ɓɛɛ Ɛ́nɛ́ e ŋma mɔɔ-usi-yuwar-kpasa ti wa, wen ha̧ tɛ-wa mɛ mbaŋ ɗoŋ o geŋa Heembea k’Ɛ́nɛ́.

⁷Wen wi nɛ zik so tɛ sitɛ mɔɔ-usi-mɔ‘i lɛŋ kpasá. Bó nɛ́ mɔɔ-usi-mɔ n'aa zoka'i a kpasa a̧ na, ɓɛɛ nɛ́ Ɛ́nɛ́ ɛ̧, Wan-kpasi-bíí lɛŋ.

⁸Hegɔ‘i, Ɛ́nɛ́ usa ha̧ o wisɛn k’ɛ́ɛ́ nde nɛ́ Ɛ́nɛ́ a kpasi bii yi ɗaŋmɔ lɛŋ.

⁹O wisɛn nɔ‘i kuma lɛŋ wen zu da̧-nú o gba-doya in o gba-zí̧í̧, ŋma nyina mɛ kpasi nɛ wa bó na, wen nyɛma so kana sɛnɛ ha̧ o pɛrti saɗi nɔ‘i mɛ usi bɔnɛ ha̧ wa.

¹⁰Ɓɛɛ ko o bem k’Ɛ́nɛ́, kóó gakɛ-nin o ŋga gɔ́k nyɛm so mɛ ziɓi wa na, wen deako k’Ɛ́nɛ́ gbaka wa, ɓɛɛ kpasi wa.

¹¹Nyɔŋa wa nɛ gɔk nyɔŋa'i dee ha̧ tɛ-wa mɛ mbaŋ ɗoŋ wen k’Ɛ́nɛ́. Mɔ kpɔk, Ɛ́nɛ́ kpasa wa nɛ hayaa, wen ká tɛ-wa tɛ̀ɛ́ bi ɗoŋ mɔ nyɛi, ɓɛɛ ká wa tɛ̀ɛ́ gbo ɗɔɔ dee demɔ k’Ɛ́nɛ́.

¹²Kóó ŋma zɔ̧ kóó ŋma nɔ̧ kpasi wa na, kana nɛ́ wen k’Ɛ́nɛ́ nɛ kpasi mɔ lɛŋ'ɛ ɓɛɛ, Gasa Wan.

¹³Ɛnɛ a̧-a̧ nɛ ŋgai zu duká-kpasá in fio. Ɛ́nɛ́ zir bii si ye ko fio, ɓɛɛ Ɛ́nɛ́ baa a̧ daŋnɛ́ mbɛt.

¹⁴Bíí nyɛma mɛ de ɗaŋ gbɛ nɛ ŋma wi. Mɔ kpɔk, a̧ fo ɔmi nɛ gboo kaɗi piinɛ ɗoŋ woyo ɓɔ na, a̧ nyɛm mɛ ba sɔ̧tɛ nɛ yaka kaɗi piinɛ e oi-aa na.

¹⁵Wi nyɛm mɛ gbo kɔ̧-ɛr-‘Nɛ́ na.

¹⁶Ɛ́nɛ́ gusa o wi nɛ bɛ̧ɛ̧ iŋa'Nɛ́ nɛ ŋgai mɛ wii-er-‘Nɛ́: o koro in o ɓɔrɔ nɛ‘i tɛ zɔk nɛti na, in o ŋga ndiɓa-koro tika zu wa, ɓɛɛ wee kum wa gbuɗuk.

¹⁷Ŋma mɔ nɛ yeka bii gan nɛ́ mɔ'ɔ: nɛ́ sɛn ɗɔɔ yì nɛ bi mɔ bii’ɛ a wee tɛ̀ɛ̀ dár dar siti woyo, wen mɔɔ-zaŋnu lɛŋ de so nɛ biro zu widemɔ nɛ yuwar-a

¹⁸Ŋma, leɓe-wee de ɓɛɛ ga̧-a̧ ká‘a̧ tɛ̀ɛ́ dɔ o saɗi nɛ tika zu o wi-iŋ-Sɔ̧-na'i, ha̧ wa mɛ zɔk mɛ iŋ nde nɛ́ kita ko Sɔ̧ a dikiɗi wa.

¹⁹Ŋma mbɛt, mgbak ɗɔɔ yì‘i, leɓe-wee'i tɛɛ ɓoɓi dar nɛnɛ siti gan deemɔ ko gee wee, mɛ dɔ o nyɔnɔ zu nù ko o wi-iŋ-Sɔ̧-na yinɛ.

²⁰Ɓɛɛ, nɛ ko dukbii k’Ɛ́nɛ́, Ɛ́nɛ́ kɛ̧ɛ̧ nɛ́ nyɔŋmɔ ko o betom k’Ɛ́nɛ́ mɛ yiwese ha̧ wa; Ɛ́nɛ́ toma nɛ́ ŋma dɔ́ɔ́ brɛd, nɛ wa pi̧ er-wa tɛ tom-aa na, ha̧ wa, nɛ yiwese mɛ. Mɛ nɛ́ ŋma brɛd nɛ nyɔ-aa gana kere, ɓɛɛ nɛ ɔ so nyɔɔ̧ nú bii lɛŋ.

²¹Nyɔŋmɔ, n’Ɛnɛ ha̧so ha̧ wa'i, usí nɛ́ deemɔkamɔ k’Ɛ́nɛ́ sitɛ o bem k’Ɛ́nɛ́. Ɓɛɛ a̧ kpai so kana nyɔɔ̧-a̧ nyɛm nɛ kɔ̧-nú o nde lɛŋ nɛ nyɔŋ a̧.

²²Kóó zua nɛ nyɔŋmɔ‘i dúk so hee dɔmbɔrɔ in ɓɔrɔ ga'i, a̧ ɓɔn so kana nɛ ŋgaia ti wee, ɓɛɛ a̧ yeli na mbɛt. Hegɔ dukbii k’Ɛ́nɛ́ tɛ̀ɛ́ iŋ hee mɔ nɛ wee nɛ dara nɛ poo ɓɔrɔ ká o pa̧i̧-a bu̧i̧ nɛ ɗɔ koro nɛnɛ‘i, dɔɔ nɛ o nyɔnɔ ko o wisɛn yinɛ ga.

²³Ɓɛɛ ha̧ o widemɔ nɛ yuwar-a mɛ kpa war mɔɔ-nyɔŋ kɔ-wa, kpɔk wee'i iŋ so oi ŋgai dɔɔ-mɔ kɔ‘i ɓɔ na.

²⁴Mɔ n’Ɛ́nɛ́ dea nɛ dúk dɔ̧ɔ̧ mɛ de tom h’Ɛ́nɛ́, Wi-de-a̧‘i, daka zu wen usa bɔnɛ ha̧ o ɗaŋwi, ɓɛɛ tɛ-mɛ de demɔ in o wi nɛ e ta nɛ Ɛ́nɛ́.

²⁵Kalea a̧‘i sa a̧ dúk dɔ̧ɔ̧ mɛ kpai nɛ mɔ nɛtɛ nɛtɛ; a̧ dee tom kpɔk in ha̧a̧mɔ k’Ɛ́nɛ́ nɛ ta-tɛ, dai nɛ o bii nyɛm nɛ ɗoŋ mɔ nɛ o nde kpɔk kpɔk kɔ̧ɔ̧.

²⁶Gasa Wan, sɛn tɛ mɔ‘i o bem k’Ɛ́nɛ́ n’Ɛnɛ kɔ̧ɔ̧ tɛ̀ɛ́ iŋ nde, bó nɛ o nyɔnɔ nɛtɛ nɛtɛ nɛ‘i de a dai bii na, ɓɛɛ nɛ́ wen k’Ɛ́nɛ́ a de dea ha̧ o wi nɛ kɔ̧ɔ̧ɗɔa h’Ɛ́nɛ́ mɛ ya kpasa.

²⁷Mɔ nɛ wee dɔ na yeli so yelaa ɗɔɔ gee gbɛŋmɔ naŋ-wese,

²⁸wen ha̧‘i mɛ iŋ nde ɔ dee ha̧ bii mɛ gbo tuyɛ wen gasa Ɛ́nɛ́, in mɛ kpa'Nɛ́ tɛ daŋa-wese.

²⁹Ɓɛɛ ee-ta ko wi-zɔn-mɔ-ná tɛ yeli hee dɔmbɔrɔ ɓar ga, a̧ tɛ fok hee ŋma gee ɗaŋ ndiŋ yì ga.