Read Northwest Gbaya ƊUKA-TAAMƆ 17 Bible Online

ƊUKA-TAAMƆ 17 - Northwest Gbaya bible

ƊUKA-TAAMƆ 17

¹Gasa Wan, o taamɔ k’ Ɛ́nɛ́ ɔ ɗuka, wi zii mgbara wa yɛkɓɛlɛk na mbɛt. Kalɛa a̧‘i̧ sa o wi nɛ iŋ ŋma mɔ na yɔ kaya.

²O wi nɔ‘i nɛ iŋ‘Nɛ́ na'i ta so nɛ mɔ mɛ gbɔsi sa̧-a̧ dukbii k’Ɛ́nɛ́ si ɗɔɔ. Wa ɔ so nɛ nu ɗɔɔ tum, hee wi-zɔɓɔ ga; nyɛia̧ ɗoŋ zɛ hɛra wa hee o bara ga, ɓɛɛ tum kpe wa e kɔ̧ tua; wa bó nɛ ɗɔɔ ɗafamɔ k’Ɛ́nɛ́ nɛ dúk ɓɔnsɛnɛ ɓɔ na.

³Wa ta so kɔ-wa'e ndaa o hu̧sa-ɗaŋmɔ kɔ-wa tɛ̀ɛ́ tu̧, wen zu bii-ɗoŋ-tɛ-mɔ k ko bii nɛ kpe zu mɔ hee laa-babir ga’ɛ. Gba kii nɛ hɛra zaŋ-wa pɛsa wa sót-sót ɓɛɛ bele o ŋma mɔ nɛ wa zɔk so hee hɔɔ-tɛ-bíí ga zár wa.

⁴Tum nɛ kpe zu wa hee di̧ ga dor wa tɛ dee kii na, o giti mɔɔ-pi-kii deemɔ dam ka tɛ wa, ɓɛɛ wa zɔk so nɛ o ŋma mɔ nɛ ya nyara-nyiri hee o sɔ̧-fio ga.

⁵Ŋma ŋga wee nɛ nyɛma mɛ nyɛk ee zu wa bo na, tokaa ko o sɔra zarara nyɛm so mɛ ha̧ ŋma be sa̧a̧mɔ kɔ‘i mɛ zaŋ-zɛ kii'i na.

⁶Kana nɛ́ ŋma saŋa-wee nɛ ba nɛ tɛ pi̧ nɛ kii tɛ bii a wa zɔk ɓɛɛ. Nɛ́ ŋgimbi nɛ wa zɔk mɔ‘i ɓɔna a bele zar nɛ wa siti, ɓɛɛ mɔ nɛ wa zɔk lɛŋ tɛɛ pi̧ nɛ́ kii tɛ wa gan woyo.

⁷O mɔɔkifi ko wan-gbana bo gee boaa nɛ ŋgai ɓɔna, ɓɛɛ duka-tɛ kɔ̧-a̧‘e “wi iŋa mɔ nyɛmna wo'i” tɛɛ dak nɛ́ foe pi zu a̧.

⁸O wi nɛ tɔ̧ so'e “wi nyɛma mɛ ndak zɛɛ-kii in o zɛɛ-sakalamɔ tɛ o bii wo’ɛ”, tɛɛ tik nɛ gasa zɛɛ-kii nɛ dee ha̧ mami mɛ mam nɛ wa woyo.

⁹Ɓɛɛ kóó ŋma mɔ-sakali-wi a ká bo kɔ‘i mɛ pi kii tɛ-wa na mbɛt, gee giti naŋ o saɗi in dɔma fɔ̧i̧ ko o gɔ́k nyɛma so mɛ zar wa nɛ bele a nu.

¹⁰Wa fe fee ko kii, ɓɛɛ wa kɔ̧ gee kɔ̧ɔ̧ hu̧i̧a̧ yí-wa mɛ zɔk tum nɛ ŋma be yuwar yuu mɔ ti a̧ bo gee boaa ha̧ wa na mbɛt'i na.

¹¹Ɗaŋ nɛ́ mɔɔ-sedaako bele ko bii, ɓɛɛ a̧ tɛ̀ɛ́ dak nɛ wen pi̧ zu wi nɛ zu-wi woyo. O taamɔ nɛ de biro kɔ̧ see-a̧ ŋmáŋ nɛ́ zaŋ o ŋgamɔ n'aa a̧-a̧ sɛnɛ.

¹²Wen, kà mbɔzu-wi gbak bii tɛ taamɔ ɓɔna, ɓɛɛ kii hɔa.

¹³Kà bii e ta-wi nɛ gbakamɔ‘i batɛ ɓɔ na, ɓɛɛ kiaa mɛ iŋ ndaa mɔ nɛ ɓili wi'i tɛɛ ŋgai ŋgai woyo.

¹⁴Ɓɛɛ wa lɛŋ, wa ɔɔ nɛ́ kale kpɔk yá mɛ zaŋ-zɛ ŋmana-see nɛ daŋa nɛ ye-kii ko o fio mɛ‘i.

¹⁵Ŋma, nɛ́ o zaka-ziki sɔ̧-fio a ndak so wa, ŋma mbɛt, nɛ́ tɛ-wa a mɔk gbɛlɛ-suwɛɛ kár nɛ wa, wen nɛ kii tika zu wa gbaŋa-nyaŋa.

¹⁶Hegɔ mbɛt, wi nɛ a̧-a̧ so hi̧i̧ lɛŋ tika nu, ɓɛɛ wa kpe wa, a̧ kɔ̧ ŋma tua-zɔɓɔ nɛ‘i ŋgasi nú-a na.

¹⁷Kóó a bó nɛ́ wi-gɔm-fɔ, wi-kɔr-mɔdai, kóó ŋma bii nɛ de nɛ́ ŋga tom sɛn ŋga gbara mɛ, nɛ́ kale kpɔk ŋgaŋamɔ a tika zu wa,

¹⁸wen, nɛ́ kpɔk nyak-tum a hɛra wa lɛŋ. Giti búk, de gɛr gima ko o nɔi̧ poo o da̧-a̧ te, giti foka-yi nɛ demɔ nɛ ŋgai,

¹⁹giti ta nɛ ai piinɛ nɛ zaŋ kaya mɛ, giti ndɔraa ko o ŋma saɗi nɛ‘i zɔk na, bembaa ko o ŋga bokonam, kóó o yaŋgaya tigɛr nɛ demɔ tɛnɛ nɛ kɔ̧ kaya mɛ, o mɔ nɔ‘i lɛŋ hɛra zaŋ-wa nɛ kii.

²⁰Wen sa̧a̧mɔ toka lak-lak dam zu nu lɛŋ, o nde lɛŋ de nɛ o tom kɔ‘i, hee mɔ nɛ see kɔ̧ɔ̧ ga.

²¹Ŋga dik-dik tum tika tikaa zu wa ɓɛɛ, kana hee saa-nú tum nɛ zɛm wa'i ga. Mɔ kpɔk, nɛ́ tɛ-wa a tɛɛ diti ditaa woyo gan tum'i.