Read Northwest Gbaya ƊUKA-TAAMƆ 18 Bible Online

ƊUKA-TAAMƆ 18 - Northwest Gbaya bible

ƊUKA-TAAMƆ 18

¹Gasa sa̧a̧mɔ a̧-a̧ so sɛnɛ wen o sa̧-a̧ bii k’Ɛ́nɛ́, ɓɛɛ o be Egyptɛ zii so kɔ‘i nɛ́ gɛr-wa sɔɔgee, wa zɔk gee zɔka zizi-wa na. Wa tɔ̧ so tɔ̧ɔ̧‘e o be Israɛl ya nɛ desee wen nɛ wa zɔk kɔ-wa bɔnɛ‘i mbɛt na'i.

²O be-Egyptɛ zɔna wa wen nɛ wa kii so mɛ de ɗaŋmɔ oi bɔnɛ nɛ wa zɔka na ɓɛɛ wa gɔm er ti wa, wen zu ŋgamɔ nɛ wa dee sitɛ wa'i.

³Ɓɛɛ oi tum, Ɛ́nɛ́ toma nɛ́ nyɛka leɓe-wee ha̧ o bii k’Ɛ́nɛ́ mɛ duk ti ha̧ wa si ŋma fara nɛ wa iŋ na, in ga̧-a̧ wese nɛ duka zu wa tɛ gasa gbina ye kɔ-wa.

⁴Ɓɛɛ nɛ ko o i̧i̧ wi nɔ‘i, nyɛma so kana sɛnɛ ha'i mɛ dor sa̧a̧mɔ tɛ nyɛkaa zu wa in ha̧ tum mɛ kpe zu wa, wen wa kaia o bem k’Ɛ́nɛ́ nɛ bara, o bem k’Ɛ́nɛ́ nɛ tɛ̀ɛ́ ba sa̧a̧mɔ Heembea nɛ bi na ɓɔnsɛnɛ tɛnɛ zaŋnu’ɛ.

⁵Wa ee so nú-wa mɛ gbɛ o zɔɗi-bem ko o sa̧a̧ bii, ɓɛɛ nɛ́ ŋma zɔɗi-bem kpɔk, nɛ‘i baa so siŋ e kpɛ̧ɛ̧mɔ a kpasa ɓɛɛ. Ɓɛɛ mɛ kifi er ɗaŋmɔ‘i, Ɛnɛ kaia gba gii o bem kɔ-wa yinɛ er-wa, ɓɛɛ Ɛnɛ kum wa lɛŋ gbuɗuk sɛn ɗɔɔ ŋga ŋmaia-yi.

⁶O zɔmdáà k’ɛ́ɛ́ iŋa so kɔ‘i zɛ‘i nɛti, wen kà tɛ-wa mbaŋ ɗoŋ o kanamɔ kɔ-wa, ɓɛɛ ká wa dee nɛ́ nyɛŋɛ wese'i nɛ kpee-see.

⁷Dukbii k’Ɛ́nɛ́ zɛma zɛ‘i, hee wese kpasaa ko o widemɔ nɛ yuwar-a, in wese tikaa ko o wisɛn ga.

⁸Hegɔ, kpɔk mɔ n’Ɛnɛ usa nɛ bɔnɛ ha̧ o wisɛn k’ɛɛ‘i tɛɛ kifi nɛ́ mɔɔ-hu̧r nin-yɛ, wen n’Ɛnɛ sa so nɛ́ ɛ́ɛ́ sitɛ‘Nɛ́.

⁹O sa̧-a̧ bezaŋ tanawi ɗafa Sɔ̧ nɛ ti-fu̧i̧, ɓɛɛ wa e nú-wa lɛŋ kpɔk, kɔ̧ nɛ ɗɔɔ heembea ko Sɔ̧ nɛ tɔ̧ nde: “o sa̧a̧ bii tɛ iŋ kana nɛ kpɔk kale o demɔ in o bɔnɛ mbɛt wɔ‘i”, ɓɛɛ wa ŋma nú-wa tɛ o gima-zɔn-Sɔ̧ ko o zɔmdáà.

¹⁰Hiɗimɔ ko o wisɛn sɔia kpoowoyoo sitɛ wa, ɓɛɛ tigɛr o wi nɛ ai nú, hi̧i̧ nɛ kɔ̧a̧ bem yaŋgi yaknɛ sɔ̧i̧i̧.

¹¹Kale kpɔk bɔnɛ tika zu bara in dàá-bara, gee bii zɔk so nɛ́ kpɔk bɔnɛ in wannu.

¹²Wa lɛŋ hee o ŋmaa ga, wa a̧-a̧ so nɛ gba dɔka wɔr nɛ‘i nyɛm so mɛ tɔr na, nɛ fee nɛ́ kale kpɔk fio. Ɓɛɛ o wan nɛ ɓɔna kpasa nyɛm so gee nyɛmaa mɛ gun wa na, wen o bezaŋ-wa, yaa-dua-see-wa, kuma lɛŋ gbuɗuk, hee gɔma-yí ga

¹³Tɛ feaa ko o kaya bem kɔ-wa'i, wa nɛ o mɔɔdua mgbee so zer-wa mɛ bɛ̧ nɛ kɔ̧ɔ̧ɗɔɔwen’ɛ zɔka nɛ sa̧-a̧ nde dukbii'i nɛ́ o bem ko Sɔ̧.

¹⁴Mɔ lɛŋ yaa selele, ká bindi-zɛ dee so kaɗi.

¹⁵Nɛ́ mɔ'ɔ nɛ Wen k’Ɛ́nɛ́ nɛ a̧-a̧ nɛ ŋgaiamɔ lɛŋ kura zu kiti-wan mɛ yiwese mɛ, ɓɛɛ ndɔr hee ŋma ŋga wi-biro nɛ bó nɛ kó na ga, tik zu nu nɛ fom baa'i;

¹⁶A̧ kasa nɛ geŋa k’Ɛ́nɛ́ nɛ nyɛm mɛ kpai na'i er-a̧, hee tɔ̧ɔ̧-nú gbapaa ga. A̧ yora, ɓɛɛ a̧ gbɛ bii mbɔlɔlɔ dam fara lɛŋ. Ndɔŋ-zu-a̧ fo nɛ́ yiwese, ɓɛɛ o naŋ-a̧ a̧-a̧ mbɔɗɔnu.

¹⁷Soɓee o ŋga mɔ nɛ o bii ɔ zu zɔk nɛnɛ‘i ku̧u̧naŋ zika zu wa, ɓɛɛ o gasa kii zár wa gbaŋa-nyaŋa.

¹⁸Mɔ zára wa nɛ fio a nù kpɔk kpɔk nɛnɛ, kóó o nde lɛŋ tɔ̧ɔ̧ ndɛ́ fio kɔ‘i,

¹⁹wen o ɔɔ-zu nɛ sakala wa'i usa so mɔ‘i ha̧ wa nɛti, ká wa tɛ̀ɛ́ iŋ gun bɔnɛ kɔ-wa na, fe nɛnɛ.

²⁰Nɛ mbetɛ, bɔnɛ fio hɔɔ zu o widemɔ nɛ yuwar-a mbɛt, ɓɛɛ o ŋma nɛ dɔkaa fe sɛn ŋga gbara mɛ. Mɔ kpɔk, nyimsea k’Ɛ́nɛ́ duk ɗoŋ-aa nyɛi̧ na.

²¹Wen ŋma bii, nɛ wen bó zu a̧ na, yee ɗoŋ wa nɛ hayaa. O boi-biro n'aa kaia nɛ́ o mgbak wan mɛ tom kɔ̧-a̧: mɛ nɛ́ kɔfasɔ̧ in fuunyama nɛ‘i dɔ ga̧ nɛ see-Sɔ̧'ɛ. A̧ baa zu-a̧ duk nɛ nyimsea k’Ɛ́nɛ́, ɓɛɛ a̧ de ha̧ ŋgaŋamɔ mɛ kaɗi, usi nɛnɛ‘e wi nɛ́ widetom k’Ɛ́nɛ́ nɛ mbetɛ.

²²A̧ gana zu nyimsea k’Ɛ́nɛ́, bó nɛ́ zu ŋgai mɛ tɛ-a, kóó zu ŋgai ko o boi- biro na, ɓɛɛ nɛ́ tɛ wen mɛ nú-a a'a̧ kpaa nɛ ŋgai zu wan-usi-bɔnɛ‘i, tɛ mbaŋa tɛ-a n'aa mbaŋa zu o kanamɔ in o nɔɔtɔk n'aa dea in o zɔmdáà k’ɛ́ɛ́.

²³Ŋgimbi n'aa zɔka'e o wɔr ku̧u̧naŋ gbisaa nɛnɛ kembeŋ kembeŋ kaɗi, a̧ yee mgbara wa, am nɛ mɔ, ga̧ nɛ nyimsea, ɓɛɛ a̧ gɔn ti a̧, ká‘a̧ tɛ̀ɛ́ hɔ tɛ o oi-wi nɛ ɓɔna kpasa.

²⁴Dap foto-nù lɛŋ gɔna so tɛ zɔm ɗilɛɛ-laa-ɗafi-sɔ̧ kɔ̧-a̧‘i. O nin ko o zɔmdáà nɛ‘i gasi yɔra so zu o be sɛka ta nɛ‘i nɛka so tɛ fara naar zu laa'i, ɓɛɛ mɔɔ-usi-gasi k’Ɛ́nɛ́ yɔr so tɛ-mɛtɛwol nɛ duk zu a̧.

²⁵Tɛ zɔka mɔ‘i, Wikumbii pɛa nɛ ndaa, ɓɛɛ kii hɛr zaŋ-aa. Gee be nú nyimsea nɛ usa tɛ‘i nyɛma.