Read Northwest Gbaya ƊUKA-TAAMƆ 2 Bible Online

ƊUKA-TAAMƆ 2 - Northwest Gbaya bible

ƊUKA-TAAMƆ 2

¹Wen, tɛ o taamɔ-ndela kɔ-wa'i, nɛ hegɔ a wa tɔ̧ nɛnɛ ha̧ o ŋmaa’é: «Ɗoŋ duká-kpasá k’ɛ́ɛ́ nyɛi na, ditasee duna sɛnɛ mbɛt. Ka ŋgimbi ko bii a hɔ kaɗi laŋ, ŋma nyina-a bo ɓɔna; ɛ́ɛ́ tɛ iŋ ŋma bii nɛ pia ɗoŋ nɛ Hadɛs hɔ̧ɔ̧ na mbɛt.

²Ɛɛ́ hɔɔ zaŋnu nɛ kpandoe, ɓɛɛ, nɛ ɗoŋ fio k’ɛ́ɛ́ tɛ duk hee ɛ́ɛ́ ya so nɛti na ga. Ɔmi kɔ̧ zɔɔ-yɛ nɛ gee búk sɔɔgee, ɓɛɛ taamɔ nɛ gee mbul-wee nɛ gɔm ŋgimbi toaa nɛ nyu̧mu̧-yɛ to nɛnɛ.

³Kà taamɔ bo ɓɔna, kiitɛ-wi kifa gee bùk, ɓɛɛ ɔmi bu̧i̧ a yaknɛ, hee gee be yuu-bùk ga.

⁴Ɗoŋ tikiɗi, tɛ-wi tɛ bi ɗoŋ nin-yɛ, tɛ ŋma bii beka dúk tɛ o mɔ n’ɛɛ́ dea so na. Dukaa k’ɛ́ɛ́ zaŋnu hɛ̧ɛ̧ tɛ yak hee duule nɛ oi-aa bona’ɛ ga. A̧ tɛ yɔ hee kútú nɛ naŋ wese pɛsi, ɓɛɛ ká gbɛŋmɔ yela a nu’ɛ ga.

⁵Ŋgimbi dukaa k’ɛ́ɛ́ zaŋnu hɛ̧ɛ̧ hɔɔ ŋmaa in dukaa ko giɔ̧, ɓɛɛ kà sɔŋkur ŋgimbi k’ɛ́ɛ́ hɔ kaɗi, ŋma mɔ nyɛm mɛ dor a̧ na. Wen, ŋgimbi-a gɔna so kaɗi, ŋma mɔ'ɔ tɔ̧ zu-a woyo bo ɓɔna.

⁶Ɓɛɛ hegɔ‘i, ɛɛ nyɔŋ k’ɛ́ɛ́ o demɔ zaŋnu kinii ŋgaɓo, ɛɛ nyɔŋ k’ɛ́ɛ́ zaŋnu ba nú-yɛ, hee ŋgimbi daŋa-ŋgai ga.

⁷Ɛɛ nɔ o de ŋga dɔ̧ɔ̧, a nɛ o de si̧i̧-nyama tɛ yɛ. K’ɛ́ɛ́ nyaŋ ɓií de mbɔɗi mɔ'ɔ nú-koro na.

⁸Ɛɛ ɗafi tɛ-yɛ nɛ o do-te ŋgaɓo, ká wa tɛ̀ɛ́ nyar zer.

⁹Ká ŋma bíí kpɔk poo yɛ mbosi yɔyɛ-ari k’ɛ́ɛ́ na. Ɛɛ usi nyɛŋɛ k’ɛ́ɛ́ dam fara lɛŋ, wen nɛ war k’ɛ́ɛ́ a̧‘i̧.

¹⁰Ɛɛ usi bɔnɛ ha̧ wisan, kóó zu deemɔ kɔ̧-a̧ nɛ yuwar-a'i, k’ɛ́ɛ́ e kogɛra na mbɛt, ɓɛɛ k’ɛ́ɛ́ yu mbuizu sɔkawi mɛ tu̧ nɛ tɛ-a na.

¹¹Ɓɛɛ nɛ́ deemɔ nɛ ŋgai a tɛ ba fara oi heembea k’ɛ́ɛ́, wen nɛ ŋma mɔɔ-oi ɓɔsi bó na.

¹²Ɛɛ tui pɛ́r ha̧ widemɔ nɛ yuwar-a: a̧ mbár nɛ nú-yɛ, tɔn nɛ tigɛr-yɛ, wor nɛ mɔ tɛ-yɛ wen zu gbina heembea n’ɛɛ́ gbin, dɔk nɛ wen a zu yɛ mbɛt'e ɛ́ɛ́ ndak pata mɔ nɛ wa usa h’ɛ́ɛ́ na.

¹³A̧ dúk nɛ tɛ-a'e wi iŋa Sɔ̧, tɔ̧ nɛnɛ mbɛt'e wi nɛ́ bem ko Gasa Wan.

¹⁴A̧ kifa kana nɛ́ mgbak wi ɗaŋ o taamɔ k’ɛ́ɛ́, ɓɛɛ gee zɔka a̧ sɔɔgee dúk nɛ́ zɔm tui.

¹⁵Wen dukaa kɔ̧-a̧ hɔ ŋmaa in ko dɔka bíí na, yuwar deemɔ kɔ̧-a̧ mbɛt nɛtɛ.

¹⁶Ɛɛ ya yí-a hee gee tum-mɔ ga, a̧ a̧r nyɛi̧ nɛ yuwar k’ɛ́ɛ́, hee mɛ nɛ zukupaa ga mbɛt. A̧ tɔ̧ nɛ hee-gɛr nɛnɛ‘e sɔŋkur mɔ ko widemɔ nɛ yuwar-a nɛ́ desee, ŋmaŋ nɛ tɛ-a mbɛt'e Sɔ̧ nɛ dáà kɔ‘i.

¹⁷Ɛɛ zɔk kà a̧ nɛ́ tɔ̧ɔ̧ nɛ́ kpasawen, in hee mɔ n'aa tɛ kaɗi nɛnɛ ga.

¹⁸Kà widemɔ nɛ yuwar-a a boo nɛ bem ko Sɔ̧, Sɔ̧ tɛ ye ɗoŋ aa, ɓɛɛ kpasa a̧ er o wisɛn kɔ̧-a̧.

¹⁹Ɛɛ da̧ a̧, usi nɛ bɔnɛ ha̧ a̧, mɛ we see-aa, h’ɛ́ɛ́ mɛ zɔk ga̧-a̧ kɔ̧-a̧ in nyɔŋa-nin kɔ̧-a̧.

²⁰Ɛɛ gɔn kita fio-foe zu a̧, ɛ́ɛ́ zɔk kà Sɔ̧ nɛ tɛ̀ɛ́ ye ɗoŋ aa, hee mɔ n'aa tɔ̧ ga.

²¹Taamɔ kɔ-wa nɛ mɔ‘i, ɓɛɛ wa ɔr nɛ́ tɛ-wa. Ɗaŋ kɔ-wa kpee yi-wa,

²²ɓɛɛ wa iŋ o hu̧sa ɗafamɔ ko Sɔ̧ na, wa e ta nɛ mɔɔ-oi deemɔ nyɛm yí Sɔ̧ na, wa e kɔ-wa nɛ́ gasi nɛ o wan-sa̧a̧-see tɛ kpa, tɛ geemɔ.

²³Zu-a'i, Sɔ̧ dee bii mɛ dùk kpoo nɛ kpoo, ɓɛɛ e ha̧ bii mɛ hɔ ŋmaa in A̧.

²⁴Ɓɛɛ mɛ nɛ aa-see-mɔ ko wan-ɗaŋmɔ a daka fio pi zaŋnu. Hegɔ mbɛt, o wi nɛ ndak pata a̧ zɔk kana nɛ bɔnɛ fio'i.