Read Northwest Gbaya ƊUKA-TAAMƆ 3 Bible Online

ƊUKA-TAAMƆ 3 - Northwest Gbaya bible

ƊUKA-TAAMƆ 3

¹Sɔ̧tɛ o widemɔ nɛ yuwar-a a̧-a̧ kɔ̧ er Sɔ̧, ɓɛɛ ŋma bɔnɛ beka hɔ zu wa ɓɔna

²O mgbelewi zɔka kɔ‘i hee wa fea fee kaɗi ga, ɓɛɛ yakaa kɔ-wa'i dúk so hee ŋma ŋgayamɔ ga,

³Yakaa kɔ-wa nyɛi̧ nɛ ɛ́ɛ́ duk hee ŋgaŋamɔ ga. Zu-a'i bó, wa ya kɔ-wa zaŋ ga̧a̧mɔ ko Sɔ̧.

⁴Kóó nɛ tɛ zɔka mɔ ko o bii, nɛ́ bɔnɛ a tika zu wa'i, ee-ta kɔ-wa yora so kana ndé wi beka fe na.

⁵Ɗoŋ o be bɔnɛ nɛ wa zɔka'i, wa tɛ kpa nɛ o zɔm demɔ. Sɔ̧ wee wa ɓɛɛ kpa'e wa nyɛma yí-wi.

⁶A̧ wee wa hee mɔ nɛ lɔr ŋmai nɛnɛ kɔ̧ lɔk’ɛ ga. A̧ kpɛka wa hee ŋma ɗafasɔ̧, nɛ‘i do nɛ oi-aa, nɛ nyɛma sɛnɛ ga.

⁷Ŋgimbi tɛa ko Sɔ̧, saŋa-yí-wa tɛ tok bàr bàr, wa tɛ ndɔr hee mbul-wee a dár zɔ̧ nɛnɛ ga.

⁸Wa tɛ gɔn kita zu o tugun bii, wa tɛ ɔ wan zu o dukbii ɓɛɛ Gasa Wan tɛ dùk nɛ wan kɔ-wa kpoo nɛ kpoo.

⁹O wi nɛ tɛ e ta nɛ A̧ tɛ zii mgbara kpasawen kɔ̧-A̧. O wan nɛ kasa kɔ̧ɔ̧mɔ nɛ nɔaa tɛ ya ka tɛ A̧. Wen, Sɔ̧ ha̧ nɛ mɔ nɛ ta-tɛ, de nɛ ko mbɛt ha̧ o bii n'Aa hoka.

¹⁰Nɛ ko o ɗaŋwi, wa tɛ zɔk nɛ́ bɔnɛ nyɛm ɗoŋ o taamɔ kɔ-wa, wen wa ee widemɔ nɛ yuwar-a tɛ geemɔ, ɓɛɛ wa zik ɗoŋ ha̧ Gasa Wan.

¹¹Wen, bɔnɛ a̧-a̧ zu wi nɛ sɛ́n ɗuka-taamɔ in yuwar dukaa n'aa usi. Ee-ta kɔ-wa nɛ́ tom-takaɗi, tom kɔ-wa nɛ́ gee tum-mɔ, ɓɛɛ ŋma gba̧a̧ o mɔɔ-dee kɔ-wa bó na.

¹²Koo kɔ-wa nɛ́ o mgbelewi, o bem kɔ-wa nɛ́ o wiɗaŋ, fom a̧-a̧ zu o bezaŋ-wa.

¹³Ko-yar-ndɔra nɛ ndiŋ ba tɛ-a na, in nɛ gbin heembea ba ŋmaa na, a dúk nɛ desee, wen a̧ tɛ kpa mɔɔ-oi wese gɔn kita.

¹⁴Kpàná nɛ de ŋma ɗaŋmɔ na, in nɛ bó nɛ ɗaŋ taamɔ zu Gasa Wan na, a dúk nɛ desee mbɛt, wen a̧ tɛ kpa gba demɔ oi yora ɗoŋ ha̧a̧nú kɔ̧-a̧ ha̧ Sɔ̧‘i, ɓɛɛ a̧ tɛ dùk tɛ gba de fara kɔ̧ Tua ko Gasa Wan mɛ.

¹⁵Wen mɔɔ-oi dee tom nɛ yuwar-a nɛ́ kpaa gasi, deemɔ nyɛm nɛ ɗoŋ Heembea duk hee kúnínte nɛ nyɛm mɛ fe na ga.

¹⁶Ɓɛɛ dukaa ko o be-dala beka hɔ ti na, o bezaŋ be-dala tɛ kum lɛŋ mbɛt.

¹⁷Kóó pɛ-wa a dɔk zaŋnu mbɛt, wi beka tɔr wa nɛ mɔ na, ɓɛɛ wi tɛ e sɔki kɔ-wa tɛ geemɔ hɔ nɛnɛ sɔŋkur wese kɔ-wa.

¹⁸Kà wa fe nɛ hayaa, wa beka kpa ŋma mɔɔ-e-nɛ-ta na, kà bó nɛ mɔɔ-ga̧-see tɛ sɔŋkur kita na.

¹⁹Oe ŋga bɔnɛ nɛ zɛm kpara wi-de-ɗaŋmɔ tɛ sɔŋkur ŋgimbi wa!