Read Northwest Gbaya ƊUKA-TAAMƆ 4 Bible Online

ƊUKA-TAAMƆ 4 - Northwest Gbaya bible

ƊUKA-TAAMƆ 4

¹Gana so deemɔ nɛ yuwar-a, bá nɛ koo bem, wen tɛ-wi tɛ duk doŋ widemɔ nɛ yuwar-a kpoo nɛ kpoo, Sɔ̧ in o bii mbɛt kɔ̧ɔ̧ nɛ deemɔ nɛ yuwar-a.

²Kà a̧ dúk, wi zɔk nɛ ɗoŋ mɔ kɔ̧-a̧, kà a̧ bó na, ɓɛɛ wi de wɔ-a. Hee mɔ'ɔ n'aa aa yaa-gan-ŋmaa nɛ yuwar-a, ɓɛɛ a̧ hɔ ti ga, sɛn fara ko Sɔ̧ wa tɛ suk a̧ nɛ laasɔ̧i̧-wan

³Ɓɛɛ, mɔɔ-oi gba dɔka bezaŋ o wi nɛ iŋ Sɔ̧ na bó na. Wa nɛ́ o bezaŋ be-dala nɛ hɔɔ ŋmaa in ŋgina-te, nɛ nin-a̧ ye nu ɗúk na, ɓɛɛ nɛ gun-aa nɔ nu na.

⁴Kóó a̧ a gba er-a tɛ be ŋgimbi tikiɗi mbɛt, ɓán ná búk mbia a̧, ɓɛɛ ŋga hara-búk zuɗa a̧ pi̧ nu, wen n'aa nɔ nu na.

⁵O be gbaa-er-a tɛ gbin nɛ zɔɗi-a, o waya-a tɛ ai nɛ mbui gbílílí, nɛ́‘i nyɛm mɛ nyɔŋ na, ɓɛɛ nɛ ŋma mɔ de nɛnɛ bó na mbɛt.

⁶Wen wese ɓaa-wen, o bem nɛ́‘i ko ɗɔɔ heembea na tɛ ya sedaako ɗaŋmɔ ko o dáà in nàà kɔ-wa.

⁷Zu-a'i, Widemɔ nɛ yuwar-a, kóó a̧‘a fe nɛ mbui mbɛt, a̧ tɛ duk nɛ́ zaŋ ga̧a̧mɔ.

⁸Wen, de sɔki bó nɛ́ gbɛraa kúkúɗú na, wi wɛ a̧ nɛ dɔka pɛ na mbɛt.

⁹Ɗuka-taamɔ nyɛma ŋmaa in hɔɔ mbui, deemɔ nɛ yuwar-a nyɛma ŋmaa in dɔka pɛ.

¹⁰Hee mɔ'ɔ n'aa dee yí Sɔ̧ ga, Sɔ̧ kɔ̧ɔ̧ a̧; ɓɛɛ, hee mɔ'ɔ n'aa dúk so mgbara o ɗaŋwi ga, Sɔ̧ baa a̧ yaknɛ.

¹¹Sɔ̧ baa a̧ yinɛ, wen ká ɗaŋmɔ tɛ̀ɛ́ kpai taamɔ kɔ̧-a̧, in ká ɔrmɔ tɛ̀ɛ́ kpai see-a,

¹²wen wɔ-geemɔ nɛ zár wi kpe nɛ zu o kpasa mɔ, ŋga wɔ-mɔ nɛ zik zu wi mbɛt ɗaŋ nɛ́ de taamɔ.

¹³Ɗoŋ be zɛ tikiɗi, a̧ deemɔ nyɛm yí Sɔ̧ ɓɔnti, hee ŋma wi nɛ dee dɔka pɛ zaŋnu ga.

¹⁴Sɔ̧tɛ-a dee yí Gasa Wan, mɛ nɛ hegɔ sa a̧ gbo tɛ ndiŋ fara nɛ hayaa. O bii zɔka mɔ‘i, ɓɛɛ wa zíí mgbara-a na. Sɔ̧ ha̧ mɔ nɛ ta-tɛ bɛɛ A̧ de ko ha̧ o bii n'Aa hoka, A̧ ye nɛ ɗoŋ o sa̧-a̧ bii kɔ̧-A mbɛt: Ɗuka hu̧samɔ‘i ye kɔ̧ tɛ o bíí na.

¹⁶Fio ko o widemɔ nɛ yuwar-a dak nɛ wen pi zu o ɗaŋwi nɛ ya kpasa, ɓɛɛ fea ko de wi nɛ mbuí fóm nɛ́ dɔka pɛ dukaa ko ɗaŋwi.

¹⁷Hegɔ, wa tɛ zɔk fio ko widemɔ nɛ yuwar-a, ɓɛɛ wa beka zii mgbara mɔ nɛ Gasa Wan kɔ̧a mɛ de in a̧, in gun baa a̧ n'Aa baa e tɛ ga̧-a̧ fara'i na.

¹⁸Wa tɛ zɔk zɛkɛɗi nɛnɛ, ɓɛɛ Gasa Wan tɛ mám kɔ‘i nɛ wa.

¹⁹Ɗoŋ tikiɗi, wa tɛ kifi nɛ́ ɗaŋ géé fio-mɔ, ŋma mɔɔ-búù nɛ tɛ dùk mgbara o fio ɓɔnsɛnɛ, A̧ tɛ sɔmgbi wa nɛ gɛ́r a nu, ŋma kpɔk nyɛm mɛ kifi nú-wen na. A̧ tɛ pɔkɔsi wa hɔ nduti ŋgai kɔ-wa, ɓɛɛ A̧ ziɓa wa wen ɓɔnsɛnɛ. Wa tɛ ya tɛ bɔnɛ, ɓɛɛ tɛ-wi tɛ bi ɗoŋ wa.

²⁰Ŋgimbi nɛ Sɔ̧ tɛ ak ndaa o ɗaŋmɔ kɔ-wa, wa tɛ tɛ nɛ kíí, ɓɛɛ o ɗaŋmɔ nɛ wa dee lɛŋ tɛ kur zu wa, mɛ de wen in wa.