Read Northwest Gbaya ƊUKA-TAAMƆ 5 Bible Online

ƊUKA-TAAMƆ 5 - Northwest Gbaya bible

ƊUKA-TAAMƆ 5

¹Hegɔ, widemɔ nɛ yuwar-a tɛ yor nɛ nɔaa, in nɛ kpee-see, ti o wi nɛ yaa so usi nɛ bɔnɛ ha̧ a̧, e nɛ o tom kɔ̧-a̧ mbɛt tɛ geemɔ‘i.

²Tɛ zɔka a̧, bele tɛ zár wa, wa tɛ ya ɓeke-yeke, wen n'aa kpasa yek nɛ wa.

³Taamɔ tɛ diti see-wa, hiɗi-wa tɛ gɔn, ɓɛɛ wa aia nú tɔ̧ nɛnɛ ha̧ o ŋmaa'e:

⁴«Zɔ́k, mɛ nɛ wi n’ɛɛ́ yaa so mam nɛnɛ, k’ɛ́ɛ́ baa so nɛ mɔɔ-zɛkɛɗɛ k’ɛɛ'ɛ. Oe bɔkɔ k’ɛ́ɛ́ wa! ɛ́ɛ́ baa k’ɛ́ɛ́ dukaa kɔ̧-a̧ e tɛ mgbele-tom, zɔ́k nɛ fio kɔ̧-a̧ hee mɔɔ-búú ga.

⁵Nɛ́ hee ge a'a̧ yee bɔɔ nɛ mgbara o bem ko Sɔ̧, ɓɛɛ n'aa kpa nɛ kale kpɔk mɔ in o sa̧a̧-bíí'ɛ ge?

⁶Nɛ mbetɛ, ɛ́ɛ́ yambala so nyɛi̧ nɛ yuwar kpasawen. Sa̧a̧mɔ nɛ tɛ́ nɛ tɛ́ deemɔ nɛ yuwar-a nyɛk so zu yɛ na, wese daŋ wen ɛ́ɛ́ na mbɛt.

⁷Ɛ́ɛ́ baa tɛ-yɛ pi̧ tɛ o yuwar daŋmɔ in yɔɔkaya, yambali nɛnɛ hɔ tɛ mɔɔ-nyɛ̧r; ɛ́ɛ́ ɓira nɛ ŋga gbara nɛ yuwar bó sɛnɛ na, ɓɛɛ ɛ́ɛ́ bɛ̧ baa yuwar ko Gasa Wan.

⁸Gasazu gbaka ɛ́ɛ́ tɛ ge? Mɔɔ-oi mbɔi n’ɛɛ́ dúk so nɛ tɛ-yɛ‘i a̧-a̧ dée?

⁹Mɔɔ nɔ‘i lɛŋ yaka hee géé giɔ̧ ga, hee ŋma tom nɛ‘i pi̧ yaknɛ ɓeleŋ'ɛ ga.

¹⁰Hee mɔ nɛ gasa kombon mbaŋ nɛ pɛŋa-yì, ɓɛɛ ka'i nyɛm mɛ zɔk oi-aa, ká bó nɛ fara n'aa ɓira nɛnɛ na’ɛ ga,

¹¹kána hee nɔi̧ nɛ bu̧ nɛ yiwese, ɓɛɛ nɛ‘i zɔk kóó géé be oi-aa na’ɛ ga, wen wi zɔ́k oi fara n'aa gbá búk nɛ wɔr-ɓaa na, ká bó nɛ zɔka oi fara n'aa ɓira nɛnɛ na,

¹²in hee goo nɛ‘i pi̧ si ŋma fara, ɓɛɛ beebeé-mɔ‘i̧, búk n'aa mbaŋa ɓir nɛnɛ kpee ŋmaa, wi iŋ oi fara n'aa yaka nɛnɛ na’ɛ ga.

¹³Nɛ hegɔ mbɛt ɛ́ɛ́ yɔɔ nɛnɛ dika tɛ koa ɛ́ɛ́ kasak, ɓɛɛ ɛ́ɛ́ nyɛm mɛ usi nde ŋma bɛɛ-oi deemɔ k’ɛ́ɛ́ nɛ yuwar-a nɛ́ mɔ'ɔ na. Ɗaŋ k’ɛ́ɛ́ gbɛɛ yɛ.

¹⁴Nɛ mbetɛ, ee-ta ko wi nɛ iŋ Sɔ̧ na, dúk hee púmyúlú gbafón nɛ búk pɛsi yaknɛ, kóó hee be dúíá-tɔp nɛ gba-búk yai a taŋ'ɛ ga. A̧ bu̧ yak hee tura ziwee zaŋ búk ga; a̧ kaɗi hee mɔ nɛ tɛ-wi bi nɛ ɗoŋ gɛnɛ-kpɔk-zɛ'ɛ ga.

¹⁵Ɓɛɛ o widemɔ nɛ yuwar-a ya kɔ‘i kpoo nɛ kpoo. Mɔɔ-oi tom kɔ-wa tɛ́ nɛ tɛ Gasa Wan, ɓɛɛ Wan mɛ ŋgɔn mɛ‘i kɔ́r nɛ wa.

¹⁶Hegɔ mbɛt, wa tɛ kpa de laasɔ̧i̧-wan in gba de mɛtɛwol sɛn er Gasa Wan, wen wíi-er-A tɛ pɛm wa, ɓɛɛ ɓaá-A̧ kpee ti wa hee ŋgee ga.

¹⁷A̧ tɛ ba see-dee-gɔyá e ti nɛ boi-biro, ɓɛɛ A̧ kaia o mɔ n'Aa dea mɛ nasi nɛ o wisɛn kɔ̧-A̧.

¹⁸A̧ tɛ hɛr tɛ-A̧ nɛ deemɔ nɛ yuwar-a, hee laa-biro ga, laasɔ̧i̧-biro kɔ̧-A̧ nɛ́ kɛ̧ɛ̧-mgbara-wen nɛ sa̧-a̧ ɓɔnti.

¹⁹Sa̧a̧-see kɔ̧-a̧, nɛ ŋma mɔ nyɛm mɛ gan na'i, tɛ dùk nɛ́ ŋgee-biro kɔ̧-a̧.

²⁰Ŋga nyimsea kɔ̧-a̧ nɛ ŋma mɔɔ-ga̧-a̧‘a̧ bóna'i, tɛ dùk hee tɔ̧ɔ̧nú gbapaa ga, ɓɛɛ o mɔɔ-zu-nu lɛŋ tɛ mɔi̧ ya ɗoŋ-aa mɛ dik a zu o mgbelewi.

²¹O pi̧i̧-koro tɛ gɔm tɛnɛ zééŋ, nɛ zaŋ duule mɛ, si tɛ wa, hee goo a'i ŋgaŋa kuusaa bereŋ pi̧ nɛnɛ ga.

²²A tɛ de ŋga nyimsea yo nɛ wa nɛ ɓɔrɔ hee o ta-birndíŋ ga. O pɛŋa-yì bóŋgólóŋ tɛ de ŋmaa in wa, ɓɛɛ o nanayi hura wa lɛŋ liŋgɔm, kó bona.

²³Ŋma ŋgá búk tɛ ɓoɓori wa, ɓɛɛ pɛsa wa hee gba búk ga. Hegɔ, gɔɔmɔ tɛ de ha̧ zaŋnu mɛ kifi bɛɛ-oi, ɓɛɛ kiti-wan ko o wan-ŋgai tɛ zik gu nu, wen zu ɗaŋmɔ kɔ-wa.